Pulakeshüzho 34 - Angami Naga CL (Re-edited) Bible (BSI)

Mosa Se Dze

¹ Süsie Mosae Moab razha nunu Nebo Kijüthou, Pisga zü gei kholie, süusü Jeriko rütsietsa ba, mu kijü pete pie puo kieshü Gilid nunu Dan ketso.

² Naftali pete, Efraim mu Manasseh kijü tsiu Juda kijü pete Niakratsa Dzükezha ketso.

³ Negeb nu kijü mu Razha süusü kukuobo keba Jeriko nadiu vo Zoar ketso.

⁴ Sitse Jihovae sie puo ki, “Abraham, Isak mu Jakob ki rüse di, ‘A hau pie nie nuosenuoyie tsütuo’; idi pupie kezhü kijüu sü hau. A n bu n mhipie ngushüte, derei n bu we sünu pfülie lho.”

⁵ Sidi Jihova kituou Mosa sü Jihova die tuoi Moab kijü nunu siata.

⁶ Sidi puoe Bet-peor rütsietsa Moab kijü nu kijü razhau nunu puo khruwa, derei thie ketso miapuorei puo kekhru chüu si mo.

⁷ Mosae siaketa ki, cie krie puo di mepfüta, puo mhi merüta mo mu puo phou kekuo thachüta mo.

⁸ Mu Israelkoe Moab razha nu zha ser Mosa mezhie, süsie Mosa mezhiekecü mu puo krükecü zhako tseita.

⁹ Mu Nun nuou Joshua sü mhasi ruopfü thuo puo ketshu chülie, Mosae puo dzie pie puo gei khashükewa la, sidi Israelkoe puo die zelie, Jihovae Mosa ki diekhakeshü tuoi.

¹⁰ Süsie Israelko donu Mosa tuoi siedzekesi Jihova ze kesi toukecü sier mota,

¹¹ Jihovae puo ketseshü di puo bu Ijipt kijü nu, Faro mu puo kituoko pete kinu puo kijü pete nu zasiko mu ungomhathoko chükeshü kemhie miapuorei sier mo,

¹² siro kekuo kezha mu mhatho kezha tsiu kemeriekecü pete Mosae Israel pete mhodzünu chüshü.