Pulakeshüzho 33 - Angami Naga CL (Re-edited) Bible (BSI)

Mosa Japie Israel Ketsü Thelau

¹ Ukepenuopfü themiau Mosae puo se mhodzü theja hau japie Israel nuonuoko tsüshü.

² Puoe sie: Jihova Sinai geinu tsur, Seir geinu teikeso chü hie gei zie tsur, Paran Kijüthou geinu zieshü, kemesako phrü hulie kelho ze tuo, puo vie zokecüko thuo puo zatsa tuo.

³ U we, themia pete donu rei puo khriekepfüu, kemesako pete pie n dzie nu shü; süla ukoe n siemedzi, n kinu chatha ngulie.

⁴ Jakob mechükehou bu se puo vie chünu di, Mosae thezho-u khapie hie peleshü.

⁵ Sidi themia krütako kengulie, Israel seyie pete keze puochülie tse, Jeshurun nu kedi puo sier.

⁶ Reuben bu rheikelieu chülie, sia kata hie, puo thuo tsa zorei.

⁷ Siro puoe Juda la hau pu: He-i Jihova, Juda pfhe rünyüshücie, puo themiako ki puo ze vocie. Puo la puo dzie chü pekuoshücie, mu puo khruohi di puo keperhieko petsoushücie.

⁸ Mu Levi la hau pu: N Thumim se Levi tsücie, mu n Urim se n gei kedietho-u tsücie, no Masa nu puo dojükecüu, tsiu Meriba dzü nu puo ze kegeikecüu;

⁹ Puo puo mu puo zuo ki pu di, “A unie rünyülie lho” iketau, puo siezedzürie sanyü moketau, puo nuonuo zorei si moketau. Ukoe n dieu mu n dietseidiekho-u sebacü la.

¹⁰ Ukoe no pethokeshüko pie Jakob pethatuo, mu n zho pie Israel pethatuo, ukoe kethengu pie n mhodzünu shütuo mu n ruosuoba gei mote kethe ruosuo khashütuo.

¹¹ He-i Jihova, japie puobo-u tsücie mu puo dzienie mhatho lieliecie; puo keperhieko, puo mecüyakecüko chie vütshewalie, uko bu la sier moketuo la.

¹² Benjamin la puo pu di: Jihova khriekepfüu zo, puoe rülei tshüipfü baya; Kerükrietho Kepenuopfü thuo zhate puo yapfü baya, puo khriekepfüu puo boukanie geinu puo ba chüya.

¹³ Josef la puo pukeshü: Puo kijü bu Jihova thejapfücie, tei pesogei keba, mu kesou pekhro nu keba mha kevi khe bu puo vie chücie,

¹⁴ niaki vie puosikevü kevithoko, tsiu thekhrüko vie vükeshü keviko,

¹⁵ mu thiedzütho kijüthouko geinu ngukelie mha kevithoko, tuo seiketuo kijüthouko, u ketshukelhuo kechüko rei sa.

¹⁶ Kijü nu vie kevithoko pete mu Sinai gei keba ngukemezhie sa. Theja hako bu Josef tsü gei vorlie, mu puo vi kreikhrokecüu siezedzürie donu kedinuou teikhie gei vorlie.

¹⁷ Puowe kevi thudonuo nuorie tuoi zo, therhu sü puo vie! Puo kia sü nhathudo kia tuoi zo; puo kia pie mia thutuo, sidi süko whuopie kijü vala nu shüwatuo, Efraim phrü hulie kelhoko sü si zotuo, Manasseh mia nyienyieko si zotuo.

¹⁸ Tsiu puo Zebulun la pukecü: Zebulun, n neiliecie, no tuokepra nu mu Isakar n pfhekiu nunu.

¹⁹ Unie-e themia kiepie kijüthou gei shütuo, sünu puotoukecü ruosuo chütuo; kekreilamonyü dzükezha nu kinyiko, mu huocanyo nu keviekeba kinyiko mete cütuo.

²⁰ Siro Gad la puoe pukecü: Gad chü pezhakeshüu thejapfütuo! Gad sü losha puo tuoi zhüya, puoe mia bou ciekhouwaya mu mia tsüru ciekhrawaya.

²¹ Puoe puo thuo puo la kevitho-u kedalie, krütau ya la khapie kezhüu puoe seyie nu peyuko ze vor, puoe Jihova kethocau se mhachüshü mu Israel la pethokeshüko seshü.

²² Tsiu Dan la puoe pukecü: Dan sü loshanuo puo zo, Bashan nunu proukepar.

²³ Mu Nafatali la puoe pukecü: O Naftali, n noulie pekreikeshü la n nei tsiu Jihova theja pie n ketshu chükeshü la niakratsa mu pekhrotsa lielie.

²⁴ Asher la puo pukecü: Asher bu thepfunuoko mho thejapfülie puo bu puo siezedzürie khriekepfüu chü mu puo bu puo phipie tier nu selie.

²⁵ N dahouko thegi mu mese pie chütuo, n kekuo rei n teisozhako tuoituo.

²⁶ Ukepenuopfü kemhie miapuorei tuo mo, O Jeshurun, puoe n khruohituo üdi teiko gei pfüya, tei pete nu zapuzayie chü di.

²⁷ Puo kerieki rhuoko penyüwate, mu thiedzü kekuoko bietshewa, puo n mhodzüki nu n ngumvümia whuowa tsiu “Pekawa,” si.

²⁸ Süla Israel khrukhre bate, mhapuorei Jakob kebachüu kebvü mote, lhacülhale mu khubezu kijü, teigei nu thezei krütsuryakezha kijüu.

²⁹ Harie, u kenei, Israel! N tuoikecü supuo tuo ga? Jihova bu kelaliekecü themia, n kekhruohi zhüu, no kuokelie zhiechau! N ngumvükoe u hulie pie n ki vortuo, mu noe uko chie kedetuo.