Pulakeshüzho 32 - Angami Naga CL (Re-edited) Bible (BSI)

¹ Harie teiko, nie nyie kedeishücie, a die pushütuo, mu kijüu bu a tie nu die rünyüshücie.

² A kepethadie bu teirü tuoi tetsurcie, a diepu bu thezei tuoi krü tsurlie, tei rümhie pie nhanuothe keva tuoi, teirü tsur nha the kepar keva tuoi.

³ Ae Jihova za pu keyieshüketuo la; kezha zau pie Ukepenuopfü tsüketuo la.

⁴ Tsiekrieu, puo mhatho sü vi lotso, puo chako pete mezhü. Kemiatho Kepenuopfü, puo gei kecürü tuo mo, puoe dietho mu mezhü zo.

⁵ Derei ziezhü moketa nuonuoko tijüpie puo tsü, uko ziezhükemo mu rüpfhikecü seyie.

⁶ Kenya mu mharhi si kemo themia, hai di Jihova pu chü laya me? Puo sü n puou, n pelhoukeshüu, n chükeshüu mu pesiekeshüu mo me?

⁷ Teisozha keviko rükrashücie, phou kekra teicieko leshücie, n puo ketsolie, puo n ki pushütuo; phichüko ketsolie, uko pushütuo.

⁸ Kerükrietho-ue seyieko ya chükeshü ki, puoe themianuo kho kekreikeshü ki, therie rhiepie themiako tsüshü, Israel nuonuoko ketsakekra le di.

⁹ Jihova yau sü puo themiako zo, Jakob sü pie puo phruokeshüu zo.

¹⁰ Puo thuo kijükesia nunu puo ngulie, mhapuorei lhou kemo rayha nunu; puoe puo yapieshü, puo meho menuoshü, puo mhishülou kekhrie tuoi puo khrieya.

¹¹ Tsüüra puo kru nu puo nuo yukrishü di puo nuonuo mho pruo zhayakezha tuoi. Süu shülhashü di uko pie puo shüka gei shülie, di uko ze pruo lugei sieshüyakezha tuoi,

¹² Jihova rübei puo cha tha ze tuo, terhuo kekrei puorei puo ze tuo mo.

¹³ Puoe puo pie kijü kerükrie zü gei shü, sidi puo bu lie nu rüchükelieko cü; tsiekrie geinu mepfhidzü mu tier se puo theke;

¹⁴ kirinuoko geinu puo thunudzükhie, kiriko geinu puo nudzü, tekuonuo, mu tekuochü luokecüko, Bashan nu tekuochüko mu mvüdoko geinu rei, thoulha kemesathoko rei sa, se puo theke; khube zie nunu se kepar khubezu kevithopfü pie krie.

¹⁵ Jakob-e cü pevülie, mu Jeshurun luolie tse, phichapie mia mesüta. Noe luota, zhata, mhekeshü chülieta, cüpie pholieta! Sitse puoe puo chükeshü Kepenuopfü khawa, sidi puo kelakelie Tsiekrieu kreta.

¹⁶ Ukoe terhuo krei sekecü pie puo nou vakerüda; kerütse mhathoko chüpie puo nei kemo chü.

¹⁷ Ukoe ruosuo chüpie Kepenuopfü tsü mo di terhuotemi tsü, siya kemo rhuoko, tsie nu keler terhuo kesako, n puonuokoe prei tuoya kemo terhuoko.

¹⁸ No n pelhoukeshü Tsiekrieu sanyü mota, mu no n penuokeshüu Ukepenuopfü rükra mota.

¹⁹ Jihovae süu ngushü di puo rota, sidi süko meliewa, puoe puo nuo thepfu rei thenu rei melieta.

²⁰ Sidi puoe sie: A uko kinu a zie kevielietatuo, uko thelau kimhietuo shi a mehoshütuo, ukoe ziezhükemo phou puo zo, kedietho u gei tuo kemo nuonuo phre.

²¹ Uko sü terhuo kemo puo pie a nou vakemeyie mu miarhi se a nou vakerüpeshü. Süla a rei themia kemo kro puo pie uko nou vapesuoshütuo, A seyie kenya kro puo pie uko petsoushütuo.

²² A nouyie nu mi puo thushüte, süu tutsu Sheol kesoutho nu tso, kijüu mu puo gei kelhouko the pejüwa, mu kijüthou mvüdzeko theshü.

²³ Mu ae mha kesuo pie uko petsoushütuo; ae uko gei a theütsieko cieshütuo.

²⁴ Merü sekecü, u the pejü zokecü, thepetheruo kere. Nhachü hu ketsepie uko petsoutuo, mu nyophe nu tinyhüko geinu therei rei sa.

²⁵ Chazou ro zhiecha, kinu ro kemeriekecü se khriesamia tsiu rüümia, kenunuomia mu tsüpouko rei pekatuo.

²⁶ Ae uko bie kezawa di themia donu uko dze si sa kemo chüwaketuo lesie,

²⁷ derei ae uko ngumvümia keka se parkeshü preite, sükoe mhale kekrü di sie, “U dzie kuo ba zo, hau chükeshüu Jihova mo,” italie vicü la.

²⁸ Ukoe mharhi si kemo seyie puo zo, uko donu kesikelemia tuo mo.

²⁹ Ukoe mhasi ücü we, ukoe hau sikelie mese, uko thiesie rüli lelietieciü.

³⁰ Kimhie di mia puo thuo thenyie peprie, mu mia kenie thuo mia nyie kercü whuolie ta? uko Tsiekrieu thuo uko zewa, mu Jihova uko khawata mocü we?

³¹ Ketho zo, süko tsiekrieu we u Tsiekrieu mhie mo, u ngumvüko kenyamia zo.

³² Uko khubeko ro Sodom khube mvüu nunu par, mu Gomora khube zieko nunu par, uko khubesiko we therei khubebo zo, puo phroko pfhümezha.

³³ Uko zuko we tinyhü therei tsiu nyhübvü therei kerhupfü.

³⁴ Mha hau a gei kengupie ba mo me? A kinyibouko nu kha tsapie ba mo me?

³⁵ Khepu sü a mese, zhadakevü rei; uko phi tsierhiekeshü ki la; uko kataketuo zhau penuoketa la, mu uko gei kepekau phir mhatatuo.

³⁶ Ketho zo, Jihovae puo themiako ca chüshütuo, mu puo thekeko ngumezhieshütuo, puoe uko kekuo puorei tuo moketa ngushü ro, kedieu rei, kedie kemo-u rei.

³⁷ Sitse puoe sie: Uko rhuoko, uko rüzhükelie tsiekrieu kirapuo tuota ga?

³⁸ Uko ruosuoko nu puoshuoko supuo cülie ga? Tsiu uko kekrie ruosuo nu khubezu supuo krielie ga? Uko bu sie di nie khruohiliecie, uko bu nie keya chüliecie!

³⁹ Tsie A sü, A zokecüu siliecie, a sie terhuo kekrei jü; ae biekhrishü mu chü perheishüya, ae bie kerüzashü mu chü kemeneshüya; mu a dzie nunu shüphrase talieketuo puorei tuo mo.

⁴⁰ A dzie yhase teitsa va di, rüseshüya: A kechachie rhei tuoyakezha tuoi,

⁴¹ Mu a zhiecha kerü kemephrielie di, a dzie pie thecau theze kemeteilieta ro; a keperhiemia gei a khepu lietuo, mu a rütsekecüko zhadavüshütuo.

⁴² A theütsieko bu thezie krie mezetuo, mu a zhiechae ngumvümia u tsütha kechako, dukhrikewako mu kedieko zie sa mia chü cütuo.

⁴³ Teiko puo tsheliecie, puo themiako ze di, puo rüsuoliecie, terhuoko rei sa siliecie! Puoe puo nuonuoko zie kheputuocü la, siro puo keperhiemia gei puo kheputuo, tsiu puo ngukemecümia gei zhadavütuo, mu puo themiako la kijüu chü kemesashütuo.

⁴⁴ Mosae Nun nuou Joshua sa ze di vor themiako kesi kinu tsali hau dieko pete phrüshü.

⁴⁵ Siro Mosae Israel pete ki die hako pu tseishüwa tse,

⁴⁶ puoe uko ki: “A thie nieko ki kepu dieko se nieko nou shüliecie, süko pie nieko nuonuo ki diekhashülieketuo la, uko bu thezho hau dieko pete menuo di zelieketuo la.

⁴⁷ Hau nie la mhathomharo puo mo, derei nie kerheiro zo, mu sügeinu nie-e Jordan cie vo pevielietuoükezhü kijü nu rhei chalietuo.”

Mosa Se Pedzü Pukeshü

⁴⁸ Mu Jihovae teisozha sünhie Mosa ki,

⁴⁹ “Moab kijü Jeriko rütsietsa keba Abarim kijüthouro gei keba Nebo Kijüthouu gei sielie; di ae khapie Israelmia bu uko vie chünu di uko ketsü Kanan kijüutsatie mehoshülie,

⁵⁰ sidi n dzürieu Aron Hor Kijüthou geinu siata di, vo puo yiemiako salieketa tuoi, no kijüthou melikesie geinu siatuo, sidi n yiemiako salietatuo;

⁵¹ kekreilamonyü nnie kenienie Zin rayha nu Meriba-kadesh dzü khieki Israelmiako mhodzünu a kemesau sethalie moketa la.

⁵² Noe pecie nunu kijüu we ngutuo derei no sünu lelie lho; a khapie Israelko tsütuo ükezhü kijüu.”