Pulakeshüzho 31 - Angami Naga CL (Re-edited) Bible (BSI)

Joshua Mosa Sou Chükelie

¹ Siro Mosae die hako pete se Israelmia pete ki pushükewasie,

² uko ki, “A cie krie puo di mepfüte; a pra mu lelie kenjüte, siro Jihova a ki, ‘N bu Jordan hau ciepfülie lho’ sishüte.

³ Jihova n Kepenuopfü thuo n mhodzü hau ciepfütuo, puoe n mhodzü seyie hako pekawatuo, sidi noe uko vie lielietuo. Siro Jihova pukeshü tuoi, Joshuae n mhodzü pratuo.

⁴ Tsiu Jihova Amorko kediu Sihon, Og mu uko kijü pekakewa ki, chükeshü tuoi, uko gei chüshütuo,

⁵ Jihova uko khapie nieko tsüshütuo, mu niekoe a diekhakeshü tuoi, uko gei diekhakeshüko pete chüshütuo.

⁶ Meteilie mu thepfulie, michie hie, mu uko preita hie; Jihova n Kepenuopfü thuo n ze vo zotuo; puoe n vajowa lho morei n khawalie lho.”

⁷ Siro Mosae Joshua kielie di Israelmia pete mhinguki nu puo ki pu di sie: “Meteilie mu thepfulie, kekreilamonyü noe themia hako ze Jihova uko puonuoko ki rüse di pie uko tsütuo ükeshü kijüu nu uko ze letuo; mu noe uko bu süu lielietuo.

⁸ Jihova thuo n mhodzü tuotuo. Puo n ze tuotuo, puoe n vajowalie lho, morei n khawalie lho, michieta hie morei n nou thachüta hie.”

Cie Thenie Metsei Thezho-u Phrüketuo

⁹ Mosae thezho hau thulie di khapie Jihova dietseidiekhobouu kepie Levimia zievoko mu Israel phichüko pete tsüshü.

¹⁰ Mosae uko ki, “Cie thenie tseiketa ki, vaketsü teicieu nu puotei touki, pruunyi ki,

¹¹ Israelmia petekoe Jihova n Kepenuopfü thechü kedakeshüu nu puo mhodzünu volie tse, noe Israel pete bu silie kevi nunu thezho-u phrüshütuo,

¹² themiako kie kengulie, thepfuko mu thenuko, nhicuko mu n ra keba solhimiako, uko bu rünyülie di Jihova dieko pete menuo di chüüzelieketuo la.

¹³ Uko nuonuoko süu si kemoko bu rei rünyülie di nie Jordan cie pra pevietuoükezhü kijüu nu lhou keba chie Jihova n Kepenuopfü prei seilieketuo la.”

Jihova Mosa mu Joshua Tarhokeshü Thelau

¹⁴ Jihovae Mosa ki, “Harie no siataketuo tei penuo vortazhie; Joshua kieshülie, sidi nnie rüsuopfhekiu nu volie, a bu puo mhathoko pie puo pelewaketuo la.” Sitse Mosa mu Joshua unie rüsuopfhekiu nu vo balie.

¹⁵ Ru Jihovae kimhou co puo nunu vor, di kimhou co-u rüsuopfhekiu kikha nu thalie.

¹⁶ Sitse Jihovae Mosa ki, “Telhe mo di, no n puonuoko ze zhütatie, mu themia hakoe vo mia ze batuoükezhü kijüu nu si kemo rhuoko ze thethelietatuo, ukoe a khawatuo, mu a uko ze dietseidiekho chükeshüu varhuowatuo.

¹⁷ Sünhie a nouyieu uko gei tusietuo, sidi a uko khawatuo mu uko mhodzüki nu a zie kevietatuo, sitse ukoe mia chüte chütatuo, tsiu kemezhiekecü kekra uko gei vortuo, sitse ukoe sünhie sie, ‘Mha kesuo hakoha u gei kevor Kepenuopfü u donu ba motakecü la mo me?’

¹⁸ Mu ae sünhiesü a zie kevielieta ketho zotuo, ukoe terhuo kekrei kitsa vata di mha kesuo pete chüketa la.

¹⁹ Süla tsie tsali hau thulie, di pie Israelko pethashülie; süu khapie uko tie nu shülie, tsali hau bu Israelmiako petsou di a zhapu puo chülieketuo la.

²⁰ Kekreilamonyü ae rüse di uko puonuoko tsütuo üdi pukeshü mithunudzü mu mepfhidzü krukezhü kijüu nu uko ze vorshü, ukoe mhacü pevülie di tuolie tse, ukoe rürei terhuo kekrei kitsa vata di süko lie chütatuo, di a zhase mu a dietseidiekho varhuowatuo.

²¹ Tsiu mha kesuo mu kemezhiekecü kekra uko gei vorlie ro, tsali haue zhapu puo tuoi sier, uko petsoutuo, uko nuosenuoyieko tie nu tuo seituotuo, rükra mota mo di. Kekreilamonyü tsie a uko ze rüse di a pie uko tsütuo ükeshü kijüu nu vorshü moluokecü nu zorei, uko nei uko medo rhükezhü a si phre ba.”

²² Sidi Mosae sünhiesü tsali hau thulie di pie Israelmiako pethashü.

²³ Siro Jihovae Nun nuou Joshua bu thepie pfülie di puo ki, “Meteilie mu thepfulie, noe Israelmiako ze a rüse di pie uko tsütuo ükezhü kijüu nu vorshütuo, a n ze tuo zotuo.”

²⁴ Mosae thezho hau dieko pie leshüda puo nu thu tseilie tse,

²⁵ Mosae Jihova dietseidiekhobou kepie Leviko ki pu di sie,

²⁶ “Thezho leshüda hau pielie, di pie n petsou ketuo zhapu puo la, Jihova nie Kepenuopfü dietseidiekhobouu khieki khapie balie.

²⁷ Kekreilamonyü a no mia perhiepetsoukecü mu no kenyietokecü si; tsiu harie a thie rhei di nieko ze baluokecü nu, niekoe Jihova perhiepetsouta, mu a se sie we hapfülie lho zo.

²⁸ Nie seyie nu phichüko, mu kezhako pfhü kengulie, a bu die hako pie uko nyie kinu phrüshüketuo la, sidi tei mu kijü kie pie uko petsou di zhapu chüketuo la.

²⁹ Kekreilamonyü, a se sie, nieko mha kesuo chü phi zotuo, sidi a nie ki diekhakeshü chau nunu rüditatuokecü a si ba zo; mu thelatsa kesuo nieko gei vortuo, niekoe Jihova mhinguki suo zokecüu chüshü di, nie dzie mhatho nunu puo nei kemo chüketuo la.”

Mosa Tsali

³⁰ Sitse Mosae Israel mechükehou pete ki tsali hau die pete pushü puo thela tso: