Pulakeshüzho 30 - Angami Naga CL (Re-edited) Bible (BSI)

Ukepenuopfü Dietho Zoketuo

¹ Siro ae n mhodzünu keshü mha hako pete, theja rei mu rüse rei, n gei vorwa, mu Jihova n Kepenuopfü n whuopie shükewa seyieko donunu noe süko rükralie,

² sidi Jihova n Kepenuopfü ki la vorlie, no rei n nuonuo rei a thie n ki diekhakeshü peteko nu, n melou pete se mu n ruopfü pete se puo pfhe zelie ro,

³ siro Jihova n Kepenuopfü n pelhou lashütuo, mu n ngumezhie lashütuo, sidi puoe n whuopie cürekewa seyie peteko donunu n pfhü kengu lalietuo.

⁴ Nie mia huo vo teiboteiyo nu tuota rei Jihova n Kepenuopfüe sümia rei pfhü kengulietuo, mu sünunu puoe n ze la vortatuo,

⁵ siro Jihova n Kepenuopfü n ze la vor n puonuoko pie u viekecü kijüu nu la vorshütuo, sidi n bu süu pie n vie chütuo, n chü pekruoshütuo, sidi n chü pekrapie n puonuoko ki krashütuo.

⁶ Siro Jihova n Kepenuopfüe n bu n melou pete se mu n kerheiro pete se Jihova n Kepenuopfü khrielie di rheilieketuo la n melou mu n nuosenuoyie melou zhürewatuo.

⁷ Sidi Jihovae rüse hako pete pie n ngumvümia gei, mu n mecü mu n peseyakecü peteko gei shütuo.

⁸ Sidi noe la vor di Jihova pfhe zelietuo, mu puo diekhakeshüko, a thie n ki khakeshüko pete chülietuo,

⁹ mu Jihova n Kepenuopfüe n dzie mhatho pete nu, n phou si kevü nu, n kiri si kevü nu, mu n kijü sikevü nu n chü pekruo penyishütuo; Jihovae n puonuoko gei puo neikecü tuoi n chü pekruokeshü puo nei lalietuo.

¹⁰ No Jihova n Kepenuopfü pfhe ze di thezho leshüda hanu thupie keba, puo diekhakeshüko siro puo ahzako zelie mu n melou mu n kerheiro pete se Jihova n Kepenuopfü kitsa vorlie ro.

Kerhei Kedalienu Tarhokeshü

¹¹ Ketho zo, a thie diekhakeshü se n ki khakeshüu n la rethor mo zo, morei peciethor mo.

¹² Süu teigei ba di no, “Supuonie hie la teigei kho di hie ki se tsurshü hie bu rünyülie mu chüüzelietuo ga?” itacüpfü mo.

¹³ Morei süu dzükezha ciekevo nu ba di noe, “Supuonie dzükezha cie vo di süu se hie ki vorshü di hie bu rünyülie mu chüüzelietuo ga?” itakecüpfü mo.

¹⁴ Mo zo, dieue n penuo phi ba, n tie nu ba, mu n melou nu ba mu no chülie vi zo.

¹⁵ Harie, a thie n mhodzünu kerhei mu kevi; kesia mu kesuo khashüe.

¹⁶ Noe a thie n ki pukeshü, Jihova n Kepenuopfü diekhakeshüko zelie di puo khrielie, puo chako nu tuolie, mu puo diekhakeshüko, puo ahzako mu pethokeshüko zelie ro; noe rheilietuo tsiu kruolietuo, mu no tsie pevielietuo üdi, vokezhü kijüu nu Jihova n Kepenuopfüe jashü n tsütuo.

¹⁷ Derei n noue rüdita, noe rünyü mvüta di terhuo kekrei rüsuo mu süko lie chüta ro,

¹⁸ a thie n ki pushüzhie, no kaüjütatuo; no Jordan cielie di le pevielietuoükezhü kijüu nu rhei chalie lho.

¹⁹ A nieko mhodzünu kerhei mu kesia, theja mu rüse khashüükecü a thie nieko zhapu la tei tsiu kijü kieshüzhie; süla kerhei kedaliecie, no rei mu n nuosenuoyie bu rei rheilieketuo la,

²⁰ Jihova n Kepenuopfü khrielie, puo die zelie, puo kutopfülie, süu n la kerheiro zo, mu n kelhou teisozhako zo, sitse noe Jihovae rüse di n puonuoko Abraham, Isak mu Jakob tsütuo ükeshü kijüu nu lhoulietuo.