Pulakeshüzho 3 - Angami Naga CL (Re-edited) Bible (BSI)

Israelko Bashan nu Og Penyükelie

¹ Süsie hie rüreise Bashan cha nu kho, mu Bashan kediu Og, Edrei nu u ze terhü chütuo üdi puo themia pete ze par.

² Derei Jihovae a ki, “Puo prei hie, ae puo mu puo themia pete tsiu puo kijü khapie n dzie nu shüwate mu noe puo gei rei Heshbon nu keba Amorko kediu Sihon gei chükeshü mhiei chüshütuo,” sishü.

³ Süla Jihova úko Kepenuopfüe Bashan kediu Og rei mu puo themia peteko rei khapie u dzie nu shü mu we puo geigei vo puorei lhieshü puo tsü mo.

⁴ Süteiki we puo nadiko pete lielie, pete kesa hiesorou, uko kinu nadi puorei lielie kemo ba mota, Bashan nu Og kediu rüvie, Argob kijü pete lielie.

⁵ Hako pete nadi dahou chü kerükriekecü rüna, kharu kenienie mu cakha nyi phre, süko zo kemo kijü rüna kekra sa.

⁶ Tsiu uko süko peka phrewa, Heshbon kediu Sihon pekakewa tuoi, nadi pete, thepfumia tsiu thenumia mu nhicumia rei peka phrewa.

⁷ Derei periko pete mu nadiko nu mha vakelie pete liepie u vie chülie.

⁸ Sidi süu va hie-e Jordan tse kepratsa keba Amorko kedi kenie dzie nunu kijüu lielie, Arnon Rüu nunu Hermon Kijüthou ketso kijüko,

⁹ (Sidonkoe Hermon üse Sirion üya; mu Ammonmiakoe Senir üya),

¹⁰ Kijü kemezhü gei keba nadiko pete mu Gilid pete mu Bashan pete, Saleka mu Edrei ketso, Bashan mu Og kedirüvie nu keba nadiko.

¹¹ (Refamia lhiekelie Bashan kediu Og rübei zota; harie, puo zhü thegi pie chü, süu Ammon nuonuoko Raba nu ba. Puo kecha thu thepfü, puo kezha thu dia, themia miakrau thu pie mejükeshü).

Jordan Niathutsa Lhou Keba Seyieko

¹² Süteiki hiekoe kijü lielieketako liro, ae Arnon Rüu khie keba Aroer mho pesotsa kijüko mu Gilid kijükhru ketou puo üse puo nadiko sa pie Reubenko mu Gadko tsüshü,

¹³ mu Gilid kijü keshako, tsiu Og kedirüvie Bashan pete pie Manasseh seyie tietsako tsüshü, süu Argob kijü pete (Bashan kijü süu pete üse Refamia kijü üya.

¹⁴ Manasseh nuou Jair-e Argob kijü pete, süusü Bashan Geshurko mu Makatko rie ketso lielie di rünako za pie puo za kie di Havot-jair tholie, tsie ketso rei süu kieya).

¹⁵ Ae Gilid pie Makir tsüshü,

¹⁶ mu Gilid kijü nunu Arnon Rüu tietsa ketso pie Reubenko mu Gadko tsüshü, kerü metsuou pie therie chü di Jabok rü ketso;

¹⁷ mu Jordan pie therie chü di Araba rei sa, Kineret nunu Araba dzükezha ketso, niathutsa Pisga tsiekhie khro nu keba Kesia Dzükezha ketso.

¹⁸ Siro süki a nieko ki diekhashü di sie: “Jihova nie Kepenuopfüe nie bu pie nie vie chütuo üdi kijü hau khapie nie tsüshü; nie donu terhü nu pralie keviko pete bu u rünyie selie di Israelmia nie siezedzürieko mhodzü tuoshülie.

¹⁹ Derei nie nupfünuoko, nie nuonuo kecüko mu nie kiriko (Ae nie khurinuo kekra bacü si) bu we a pie nie tsüwaketa nadiko nu ba zolie,

²⁰ Jihova kerülei khapie nie ketsü tuoi nie siezedzürieko rei tsüshü kemochie, mu uko rei Jordan khie kekreitsa, Jihovae khapie uko ketsü kijüu pevielie kemochie.”

²¹ Siro a süki Joshua ki diekhashü di sie, “Jihova nie Kepenuopfü kedi hanie gei kedipuo chüshü shikecü n mhipie nguwate; sütuoi Jihova no votuoüzhükecü kedirüvieko gei rei chüshütuo.

²² Nie süko prei morei vi, Jihova nie Kepenuopfü thuo nie la kegeizhü zokecü la.”

Mosa bu Kanan nu Le Mvüketa

²³ Siro a süki Jihova ki cha di sie,

²⁴ “He-i Niepuu Jihova, no n kezha mu n dzie kekuo pie n thekeu pekieshüte; teigei shierei kijü shierei terhuo kikecüpuonie mhatho haikecü no chükeshü mhie kekuo mhathoko chülie vituo ga?

²⁵ A n ki chaya, a bu pra di Jordan khie lutsa kijü keviu kijüthou rüna keziviu, mu Lebanon ngushücümu.”

²⁶ Derei Jihova nieko la a gei puo nei mota di a die rünyü mvüta; sidi Jihovae a ki, “Puo mesete; mha hau dze a ki pu la hieta.

²⁷ Pisga mezü gei sielie, di niakratsa, pesotsa, pekhrotsa mu niathutsa rei mehoshülie, n bu Jordan hau cie pralie lhokecü la.

²⁸ Derei Joshua pethoshülie, di puo chü kethepfu mu chü pekuoshülie; puoe themia hako mhokezha chü di pratuokecü la, mu puoe uko bu no nguketuo kijüu pevielietuokecü la,” sita.

²⁹ Süla hieko Bet-peor rütsietsa razhau nu bata.