Pulakeshüzho 29 - Angami Naga CL (Re-edited) Bible (BSI)

¹ Horeb geinu uko ze dietseidiekhokelie zo kemo, Kepenuopfüe Moab kijü nu Israelko ze dietseidiekholienu di Mosa ki diekhakeshü hakoha.

Moabmia Kijü nunu Dietseidiekho-u Chü Kesa Lakelie

² Mosae Israel pete kielie di, uko ki: Jihovae Ijipt nu nie mhinguki nu, Faro gei, puo kituomia pete gei, mu puo kijü pete gei mhachükeshü pete nie nguwate;

³ thepie kere, zasi mu u ngo sekecüko, n mhipie nguwate.

⁴ Derei thie ketso Jihovae süu lelie kevi melou, ngulie kevi mhi mu rünyülie kevi nyie pie nieko tsüshü mo.

⁵ A cie hiedia rayha nu nieko cha tha tuote. Nie geinu pfhenei prieta mo; mu n phi geinu n phikou suota mo.

⁶ Nieko bu niekhrüda cü mo, mu khubedzü morei zu kekuo krie mo, nieko bu a Jihova nie Kepenuopfü ücü silieketuo la.

⁷ Tsiu niekoe thechü hanu vorlie tse, Heshbon kediu Sihon mu Bashan kediu Og ze kegeituoü par, derei we uko penyüwa.

⁸ Sidi we uko kijü lielie di khapie Reubenko, Gadko mu Manasseh yie ketou puo phruowa.

⁹ Süla diekhakeshü hau dieko menuo di chüüzelie, nie mhakechü pete nu chükhrielieketuo la.

¹⁰ Thie nie pete Jihova nie Kepenuopfü mhodzünu tha, nie thinuo krütako, nie donu phichüko mu nie mhatho keseko, Israelmia pete,

¹¹ nie nuonuo kecüko, nie nupfünuoko mu solhimia vor nie donu kebako rei, nie sei duyakecüu nunu nie dzü üyakecüu ketso,

¹² n bu Jihova n Kepenuopfü dietseidiekho-u mu puo thie n ki rüse di phrakeshüu nu lelieketuo la.

¹³ Puo bu thie n pie puo themia chülieketuo la, mu puo bu n Kepenuopfü chülieketuo la, siro puoe n puonuoko, Abraham, Isak mu Jakob ki rüsekeshü tuoi.

¹⁴ A thie rüse di nie haki kethako rübei ze ae dietseidiekho rüse hau chüzhü mo,

¹⁵ derei thie úko ze Jihova úko Kepenuopfü mhodzünu tha kemoko rei ze chüzhie.

¹⁶ We kikidi Ijipt nu lhou shikecü mu we kikidi seyieko donu pfüthe vor shikecü nie-e si ba.

¹⁷ Niekoe uko vie kerütseko, sei tsiu ketsie pie kechü, rakachü mu suna pie kechü, terhuorhiko uko donu bakecüko nguwate.

¹⁸ Nieko donu thepfumia puo morei thenumiapfü puo, morei puotsanuo puo, morei seyie puo thie puo Jihova Kepenuopfü kinu puo nou rüdita di vo terhuo kekrei süko lie chükecü le bata rei si mo, nieko donu therei mu chüthesie tsiu petheshüketuo puomie kre bata rei si mo.

¹⁹ Themia kehoupuorei rüse die hau sishü zorei, u nou kinu, u thuo u dzüzie chü di, “U nou meteitsapfü di, we kru ba zo” iba di keka se vor phiedzü khou mu keso lie chükezhamia,

²⁰ Jihovae sümia kejo vashü nyü lho, derei Jihova nouyieu khu sie sümia petsoutuo. Leshüda hau nu thukeba rüse pete puo gei vortatuo mu Jihova sümia za tei khro nu vawatuo.

²¹ Jihovae thezho leshüda hau nu thupie kezhü thezho leshüda nu rüse pete tuoi, puo peka pejüwatuo üdi, Israel seyie pete donunu puo chü kreilietuo.

²² Thephou kesau, nie sie sierketuo nie nuonuoko, mu kepecie nunu kevor chazoumiako, kijü hau gei thesa kesuo vorketa mu Jihova kechü pie puo pechüketako ngutuo.

²³ Jihovae puo nouyieu nunu Sodom mu Gomora siro Adma mu Zeboim sa pekakeshü tuoi, sulfur tsiu metsie bu thekewa kijü tuoi di tsia pie lie nu shü mota, mhapuorei puosi vü mota, nha rei lhou mokecü chükeshü tuoi.

²⁴ Uko mu seyieko pete rei sie, “Jihovae kiüdi haikecü chüpie kijü hau gei shü shi? Kedipuo geinu thenou kemeyie zhapie haikecü pekieshü shi?”

²⁵ Sidi ukoe sie, “Ukoe uko puonuoko Kepenuopfü, Jihova uko ze Ijipt nunu kepar ki uko ze dietseidiekho chükeshüu khawata di,

²⁶ vo terhuo kekrei, ukoe siya kemo rhuo, puoe khapie uko tsüshü kemoko lie chü mu rüsuotuotakecü la,

²⁷ süla Jihova nouyieu kijü hau mhogei tu sieta di leshüda hanu thupie keba rüseko puo gei se vorshü.

²⁸ Jihovae puo noupfhünouyie mu puo nei mo phi di uko mie phewa, di uko kelhoupie kijü kekrei puo nu shüwate sidi thie haite,” ituo.

²⁹ Kepekhre vieko sü Jihova úko Kepenuopfü vie zo; derei pekiewaketako we kechachie u vie mu u nuonuo vie zo, u bu thezho hau dieko pete chülieketuo la.