Pulakeshüzho 28 - Angami Naga CL (Re-edited) Bible (BSI)

Dieze Kechü Thejako

¹ No Jihova n Kepenuopfü pfhe rünyü di a thie n ki pukeshü, puo diekhakeshüko ze menuolie ro, Jihova n Kepenuopfü n chüpie kijü nu seyie kekreiko pete mhoshütuo.

² Mu no Jihova n Kepenuopfü pfhe zelie ro, theja hako pete n gei vor tsiu n tsolietuo:

³ No phe nu thejapfütuo mu terha rei thejapfütuo.

⁴ N phou sikevü mu n kijü sikevü, tsiu n khunuo sikevü, n kiri mu n kuonuoko kruokecü nu thejapfütuo.

⁵ N rhau rei mu n thou kenekhouu rei thejapfütuo.

⁶ No tuo ler rei thejapfütuo mu tuopra rei thejapfütuo.

⁷ Jihova thuo n mhodzüki nu ngumvümia n petsou kesieko penyüwatuo; ukoe cha puo ze di n petsou lertuo, mu cha thenie ze di n mhodzünu tatuo.

⁸ Jihova n lhakiko nu mu no mhakechü peteko gei theja bu vorketuo diekhashütuo; tsiu Jihova n Kepenuopfü se n ketsü kijüu nu, puoe jashü n tsütuo.

⁹ Jihovae n ki rüseshüketa tuoi, noe Jihova n Kepenuopfü diekhakeshüko pie balie mu puo chako nu tuolie ro, puoe puo thuo puo la n chüpie kemesa themia kro puo chüshütuo.

¹⁰ Mu kijü nu themia petekoe, Jihova zau se n kieya ükecü ngulietuo, di ukoe n preituo.

¹¹ Mu Jihovae khapie n tsütuo üdi n puonuoko ki rüsekeshü kijüu nu, n chü pekruoshütuo, n phou sikevü nu, n kiriko sikevü nu, n kijü sikevü nu,

¹² Jihovae puotei touki n kijü la teirü khashüketuo la, tsiu n mhatho peteko gei jashüketuo la, puo kinyibou keviu teiko khrüshütuo; mu noe n viepie seyie kekra theputuo; derei mia vie thepulie lho.

¹³ Siro Jihovae n pie puotsüu chüshütuo, puomeiu chülie lho, kerietho chütuo, thelatho nu tuo lho; noe Jihova n Kepenuopfü diekhakeshüko, a thie se n ki pukeshüko zelie mu süko chülieketuo la menuolie ro.

¹⁴ Mu a thie n ki diekhakeshüko dieca puo nunu rei rüreise thezatsa morei thevitsa va se terhuo kekreiko lie chütuoü uko sie vota molie ro.

Dieze Chü Kemo la Rüse Vorketuo

¹⁵ Derei noe Jihova n Kepenuopfü pfheu rünyü mo, mu menuo di a thie n ki pukeshü puo diekhakeshüko tsiu puo ahzako pete chüüzelie moro, rüse hako pete n gei vor mu n tso phretuo.

¹⁶ No phe nu rei terha rei rüsepfütuo.

¹⁷ N rhau rei mu n thou kenekhouu rei rüsepfütuo.

¹⁸ N phou sikevü mu n kijü sikevü tsiu n khunuo sikevü, n kiri mu n kuonuo kruokecü nu rüsepfütuo.

¹⁹ No tuo ler rei rüse pfütuo, tsiu tuo pra rei rüse pfütuo.

²⁰ No a khawaketa tsiu n mhatho kesuo la, Jihovae n gei mu n tho n chü peteko gei rüse, kemichie mu khriekemo ketseshü di n bu ka mu jü mhatatuo.

²¹ No pevielietuo üdi vokezhü kijüu nunu n pekawa kemochie Jihova thesau bu n ze tuotatuo.

²² Jihovae u cü pejükecü, ruki, rümiekecü, lepie uthe zokecü, mu teikuo, cieürie tsiu nouketa pie n pechütuo, sidi no jüta kemochie sükoe n whuotuo zotuo.

²³ N tsü mhogei mese pie tei chütuo, mu n khro kijüu thegi pie chütuo.

²⁴ Jihova n kijü nu teirüpie rünyo kememhie mu nyophe chüwatuo, sidi teigei nu nyophe bu n gei tsur di n pekawa zotuo.

²⁵ Jihova n chüpie n bu n ngumvümia lhotatuo; no cha puo ze uko whuo pratuo, mu cha thenie ze uko mhodzü tatuo, n bu kijü nu kediko mhodzünu u phou kemehou puo chütatuo.

²⁶ Siro n kesiamo pie teirako pete tsiu kijü nu ketuo nhachü pete va chütuo, mu süko whuoketuo miapuorei tuo motatuo.

²⁷ Jihovae menelie kelho Ijipt nu tichüpfü tsiu mezune, mepfhekecü mu kemeso pie n gei shütuo.

²⁸ Jihovae kenya, mhicie mu u melou kerüvo pie n gei shütuo.

²⁹ Tsiu noe khinhie gei rei mhiciemia kezei nu kesekevuo tuoyakecü tuoi kesekevuo tuotatuo, derei noe n cha ngulie lho; mu mia bu n pese mu n vie selielietuo zotuo, tsiu n ya pielieketuo miapuorei tuolie lho.

³⁰ No thenu puo lietuoü vakhashütuo, mu kekreimia puoe puo ze zhüwatuo, no ki puo chüshütuo, derei sünu le lhoulie lho; no khubelie puo cieshütuo, derei khubesiko riepie n vie chülie lho.

³¹ N mhi kinu n thudo dukhrishütuo, derei no süu cülie lho; n mhodzüki nu n gada te setatuo, mu kha lapie n tsülie lho, n kuonuoko pie n ngumvümia tsüwatuo, mu n khruohiketuo miapuorei tuolie lho.

³² N nuonuo thepfuko rei thenuko rei khapie themia kekrei tsüwatuo; mu no uko mengu di zhate uko meho di n mhi mezietatuo, tsiu süu khalieketuo kekuo puorei n dzie nu balie lho.

³³ No siya kemo seyie puo thuo n kinyi sikevüko mu n mhatho siko pete cülietuo; sidi mia bu n pese tsiu n kedepfü tuotatuo.

³⁴ Sidi n mhipie kenguko thuo n chü penyawatatuo.

³⁵ Jihovae menelie kelho tichü pie n khoudza gei tsiu n phi gei shütuo, n phizhü nunu kho n tsüle ketso.

³⁶ Jihovae no mu n kediu, n thuo khapie n mhogei kebau ze di no rei mu n puonuoko rei siya kemo seyie puo ki votatuo, siro sünu noe sei mu ketsie pie kechü terhuo kekrei lie chütuo.

³⁷ Tsiu Jihova n ze voshüketuo themiako donu, noe mha kethekhrü puo, mia dzeüse chü, mu mia krenyü chütatuo.

³⁸ Noe tsia kekra se lie nu tsutuo, mu keduo yopuo retuo; kekreilamonyü kuprie thuo süu cü pejüwaketuo la.

³⁹ No khubelie cieshü di mesatuo, derei khubedzü krielie lho morei puosi rei rie kengulie lho, zochü thuo cü phrewaketuo la.

⁴⁰ No n kijü pete olivbo batuo, derei no puo tier pie n kenhelie lho; n olivbokoe puosi rürie phretaketuo la.

⁴¹ No nuo thepfu mu thenu penuotuo derei süko pie n vie chü n neilie lho, mia bu uko tepie kedie chütaketuo la.

⁴² Cievü thuo n seibo mu n lie nu nhasiko pete pevielietuo.

⁴³ N donu chazoumiako n mho rükrie miemietatuo, mu no rünuo miemietatuo.

⁴⁴ Puo mha pie n theputuo, mu no puo thepulie lho; puoe puo tsüu chütuo, mu no puomeiu chütuo.

⁴⁵ Rüse hako pete n gei vortuo, mu n medzituo zotuo tsiu n tsolietuo, sidi no kaüjütatuo, noe Jihova n Kepenuopfü pfhe, puo n bu chüüzenu di diekhakeshüko mu puo ahzako rünyü mokecü la.

⁴⁶ Sükoe n gei tsiu n se n yie gei kechachie la zasi puo mu u ngo puo chü tuotuo.

⁴⁷ Noe n ketshukelhuo pete ngulie rei n nou n nei di Jihova n Kepenuopfü lie chü kemo la.

⁴⁸ Süla noe terhümerü di, methuo mu mha pete nu tsopfhü di n ngumvümia, Jihova ketsepie n petsoukecüko lie chütuo; mu n pekawa kemochie puoe thegi vocie pie n vo gei shütuo.

⁴⁹ Jihovae kepetse nu, kijü kela nunu, no puo die si kemo seyie puo, tsüü kethu chü, ze vor n petsoutuo,

⁵⁰ puo dzükezie jü zokecü seyie, phichümia rei rünyü kemo, mu nhicumia rei ngumezhieya mo.

⁵¹ Siro ukoe n kiri lhoukelieko tsiu n lie nu vükelie nhasiko rei cülietuo, n pekapejüwa kemochie; mu ukoe n bu jüta kemochie, telha, khubedzü kesa, tier morei n kiri kruokelie tsiu n kuonuoko puorei khapie balie lho.

⁵² Ukoe n kijü pete nu n kuda kerükrie, no pele kebako tetsuta kemochie, n rüna pete nu n retuo; mu ukoe Jihova n Kepenuopfü se n ketsü kijü pete nu n rünako nunu n retuo.

⁵³ Mu n ngumvümia n re pie n bu meyhumezhie zo vo noe n thuo n chü n phou si Jihova se n ketsü n nuo thepfu tsiu thenu chü rei cütuo.

⁵⁴ Nie donu themia mhakesitho mu puozho puorüli kevitho-u zorei puo siezedzürie, puo khrieyaükezha puo kimia, mu puo nuonuo lhiekelieko mhodzüki nu kecüca kevietatuo,

⁵⁵ mhapuorei ba sa mo keta la puoe puo thuo puo nuonuo chü cü kebako puorei pie uko tsülie lho. N ngumvümia n repie n bu kemezhie meyhumezhieketa la.

⁵⁶ Nie donu thenu mhakesitho mu puozho puorüli kevithopfü, menethor zokecü la puo phi pie kijü rei kedeya kemopfüe puoe khrieya ükecü puo nupfu, puo thuo puo nuou, mu puo thuo puo nuopfü kinu kecüca kevietatuo,

⁵⁷ nuo zekelie sie puo donie donunu puo lha krükeker-u rei kevie, puo thuo penuokeshü puo nuonuo rei kevie, kekreilamonyü mhapuorei ba sa moketa la puoe pekhre di süko cü baketa la, nie ngumvümia nie rüna re di nie bu kemezhiepie si zo tsuketa la.

⁵⁸ Mhanuü noe Jihova n Kepenuopfü zapuzayie kechüu mu puo za u ngokecüu prei di leshüda hau nu thupie keba thezho hau dieko pete chüüzelieketuo le terülie moro;

⁵⁹ Jihovae n gei mu n se n yie gei mia mhiekemo kepechü tsiu mha kere, thesa, mu kechü kere ba cha phikecü se vor tshushütuo.

⁶⁰ Sizomonyü noe prei tuoyakezha puoe Ijipt kechüko pete se n gei vortuo, sidi süko bu n kutopfü tuotatuo.

⁶¹ Siro Jihova thezho leshüda hanu thupie tuo kemo kechü neiü mu thesa neiü se n gei vorshü di n pekawatuo.

⁶² Sidi nie teigei themvü tuoi krodi chüketuo, keduo yopuo zotatuo, noe Jihova n Kepenuopfü pfhe ze kemo la.

⁶³ Mu Jihova n chü pevishü tsiu n chü pekruoshüketuo puo neiketuo tuoi, sütuoi Jihova kepeka se n gei kevor mu n bie pesuowaketuo puo neitatuo, sidi noe vo pevielietuo ükezhü kijüu nunu n phe kelhouwatuo.

⁶⁴ Siro Jihovae n kezapie kijü kela puo nunu kekreitsa ketso themia neiü donu shüwatuo; mu sünu noe sei tsiu ketsie pie kechü, no rei mu n puonuoko rei siya kemo terhuo kekrei lie chütuo.

⁶⁵ Mu seyie süko donu no kerüü puorei ngulie lho, tsiu n phizhü bu rüleiliekecü rei jütatuo; sirei Jihovae sünu pekecü melou, merükecü mhi, mu thedzükekou nou se n tsütuo.

⁶⁶ N kerheiro n mhodzüki kemichie nu ba zotuo; khinhie rei theva rei no n noumeca ba zotuo, mu n kerheiro la khrukhrekecü jütatuo.

⁶⁷ Noe khise sie, “Thevatieluoü tse,” mu thevatie sie, “Khiseluoü rei” itatuo, n melou ki michie kecüko la, mu n mhipie mha nguketuoko la.

⁶⁸ Jihovae rou nunu n ze Ijipt nu la votatuo. A n ki phrashü kemo cha puo nunu, tsiu sünunu noe n thuo n themia thepfu mu thenu rei zepie n ngumvüko die chütuo ütuo, derei kekhrümia jütatuo.