Pulakeshüzho 27 - Angami Naga CL (Re-edited) Bible (BSI)

Ebal Kijüthou gei Thezho-u Thushüketuo

¹ Sitse Mosa mu Israelmia phichükoe themiako ki diekhashü di sie: A thie nie ki diekhakeshüko pete chüüzelie.

² Siro nie-e Jordan cie se Jihova n Kepenuopfüe se n ketsü kijüu nu prakelie nhie, no ketsie kezhazhakecü pfhelie, di puo kenyhü pie nyhülietuo;

³ mu no Jihova n puonuoko Kepenuopfüe n ki phrakeshü tuoi mithunudzü mu mepfhidzü krukezhü kijü puo, Jihova n Kepenuopfü se n ketsü kijüu nu letuo üdi ciepfülie ro, no süko gei thezho hau dieko pete pie thutuo.

⁴ Süla nie Jordan ciepfülie ro, a thie Ebal geinu nie ki diekhakeshü tuoi no ketsieko pfhelie, di puo kenyhü pie nyhülie.

⁵ No sünu Jihova n Kepenuopfü la ruosuoba, thegi pie chü kemo ketsie ruosuoba puo chütuo.

⁶ No ketsie phro kemo pie Jihova n Kepenuopfü la ruosuoba puo chütuo: Sidi sügeinu kethe ruosuo chüpie Jihova n Kepenuopfü tsütuo,

⁷ siro no vitho ruosuo khashütuo, sünunu süko cütuo, di Jihova n Kepenuopfü mhodzünu n neituo.

⁸ Tsiu noe ketsieko gei thezho hau dieko pete thu kemesa seshütuo.

⁹ Siro Mosa mu Levimia zievoko Israel pete ki: Harie Israel, kemekrie di rünyülie, no thie Jihova n Kepenuopfü themia chüte,

¹⁰ süla noe Jihova n Kepenuopfü pfhe zetuo, di a thie n ki pukeshü, puo diekhakeshüko mu puoe chünukecüko chülietuo.

Rüse kerekenieko

¹¹ Siro sünhie Mosae themiako ki pu di sie,

¹² Nie Jordan cie pralie ro, themia hako bu Gerizim kijüthou gei thalie di japie themiako tsütuo; Simeon, Levi, Juda, Isakar, Josef mu Benjamin,

¹³ mu themia hako bu rüse la Ebal Kijüthou gei thatuo: Reuben, Gad, Asher, Zebulun, Dan mu Naftali.

¹⁴ Mu Levikoe Israelmia pete ki melie peto di sie:

¹⁵ “Jihova mhodzüki terhuorhi chükecüu, mha kepie chü rei, lhopie chü rei, thedzie pie rhikecü kehoupuorei pekhre sekebau bu rüsepfücie,” ishütuo. Mu themia petekoe sie, “Amen!” situo.

¹⁶ “Puo puo mu puo zuo rhukemo-u bu rüsepfücie.” Mu themia petekoe “Amen!” situo.

¹⁷ “Puo zanuou kijü rie bie kedikewau bu rüsepfücie.” Mu themia petekoe “Amen!” situo.

¹⁸ “Mhiciemia puo cha tha kekrükeshüu bu rüsepfücie.” Mu themia petekoe “Amen!” situo.

¹⁹ “Solhimia, puo puo kejüu mu samipfü gei kethoca chüshü moketau bu rüsepfücie.” Mu themia petekoe “Amen!” situo.

²⁰ “Puo puo kimia zezhükecüu bu rüsepfücie puoe puo puo kimia pfhenei hiekecü la.” Mu themia petekoe “Amen!” situo.

²¹ “Khunuo kehoupuorei zezhükecüu bu rüsepfücie.” Mu themia petekoe, “Amen!” situo.

²² “Puo üpfü, puo puo nuopfü shierei morei puo zuo nuopfü rei, zezhükecü bu rüsepfücie.” Mu themia petekoe, “Amen!” situo.

²³ “Puo kimianuo zuo zezhükecüu bu rüsepfücie.” Mu themia petekoe, “Amen!” situo.

²⁴ “Pekhre di puo zanuou biekecüu bu rüsepfücie.” Mu themia petekoe “Amen!” situo.

²⁵ “Jokemomia puo dukhriketuo la theso piekelieu bu rüsepfücie.” Mu themia petekoe, “Amen!” situo.

²⁶ “Thezho hau dieko chü mu zekemo-u bu rüsepfücie.” Mu themia petekoe, “Amen!” situo.