Pulakeshüzho 26 - Angami Naga CL (Re-edited) Bible (BSI)

Chiebie Si Kerieko mu Ker-zapuo

¹ Noe Jihova n Kepenuopfü se n phruokeshü kijüu nu vorlie sidi süu pevielie mu sünu lhoulie ro,

² noe Jihova n Kepenuopfü se n ketsü kijüu nunu chieshü kerieko pete huoyoyo pie merha puo nu shülie di se Jihova n Kepenuopfü puo za bu ba seiketuo la kedakeshü thechüu nu votuo.

³ Mu no süteiki zievo chükebau ki vo di puo ki, “Jihova se n tsütuo üdi u puonuoko ki rüsekeshü kijüu nu vorkelie la, a thie Jihova n Kepenuopfü thezieshüzhie,” situo.

⁴ Siro zievo-ue n dzie nunu merhau pielie di khapie Jihova n Kepenuopfü ruosuobau mhodzünu shütuo.

⁵ Mu noe Jihova n Kepenuopfü mhodzünu sie, “A puotsa we Arammia puo zo, mu puoe Ijipt nu tsu di sünu lhou, mia keduoyo zo, sidi puo seyie kezha, kekuo tsiu kekra puo chülie.

⁶ Ijiptmiakoe mhatho kere khapie hieko gei shü di hieko pese mu hie bu kemezhie phi.

⁷ Tsiu hie Jihova, hie puonuoko Kepenuopfü ki chashü ru, Jihova hie pfhe rünyü, di hie kemezhiekecü, hie mhatho kere mu hie pesekecüko mehoshü.

⁸ Sidi Jihovae puo dzie kekuo se mu puo bou yhapie siro kekuo kezha, zasi tsiu mha u ngoko se di Ijipt nunu hieko ze parlie;

⁹ sidi puoe hie ze thechü hau nu vorlie, di mithunudzü mu mepfhidzü krukezhü kijü hau pie hie tsüshü.

¹⁰ Tsiu harie, ae tsie, no Jihova pie a tsükeshü chieshü kerietho-u se vorshüe.” Sidi noe süu pie Jihova n Kepenuopfü mhodzünu khashütuo, di Jihova n Kepenuopfü mhodzünu rüsuotuo.

¹¹ Mu noe Jihova n Kepenuopfü mha kevi se n ketsü, mu n kinuko, no rei tsiu Leviu rei mu nie donu keba chazouu rei ketsü pete la n neituo.

¹² Siro cie se cie ker-zapuo khakeshü cie, noe n liecie pete gei ker-zapuo khashüwa di Leviu, chazouu, mu puo puo kejüu, mu samipfü tsüshü di uko bu n rüna nunu cü pevülie kevi chüshü ro,

¹³ noe Jihova n Kepenuopfü mhodzü nunu sie: “Ae a ki nunu kemesa nyako se parte, sizomonyü ae no a ki diekhakeshüko pete ze di, süko pie Leviu, chazouu, puo puo kejüu mu samipfü tsüwate, ae no diekhakeshüko puorei vajowa mo, mu rükra mota mo.

¹⁴ Ae kesia krü keba ki ker-zapuo khakeshüu cü mo, morei a mesa mo keba ki süu puorei bie mo, morei puorei pie kesiamia tsü mo. Ae Jihova a Kepenuopfü pfhe ze tuo zo, ae no a ki diekhakeshü tuoi n kepu pete chüliete.”

¹⁵ N kebachü kemesau, teigei nu mehoshü di, japie n themiako Israel mu noe hie puonuoko ki rüsekeshü ki ze hie tsükeshü kijüu, mithunudzü mu mepfhidzü krukezhü kijüu tsüshücie.

Tarhokecü Die Thela

¹⁶ Thie teiso ha Jihova n Kepenuopfüe n bu chünukecü tsiu pethokeshü hako zelienu di diekhashü, süla noe n melou pete se mu n ruopfü pete se menuo di süko zetuo.

¹⁷ No thie Jihovae n Kepenuopfü zo üdi mu puo chako nu tuolietuoü, puoe chünukecüko, puoe pethokeshüko, puo kepethadieko zelietuoü mu puo pfhe rünyütuo üdi phrashüte.

¹⁸ Siro Jihova n ki pukeshü tuoi, thie no üse puo themia pekrei zo üdi, mu no puo diekhakeshüko pete ze morosuo üdi pushüwate;

¹⁹ puoe thetshe, zayie mu therhu tsiu n chü kerükriepie puo thuo chükeshü seyie pete mho shütuoü, n ki pukeshü tuoi, Jihova n Kepenuopfü la themia kemesa kro puo chüketuo la.