Pulakeshüzho 25 - Angami Naga CL (Re-edited) Bible (BSI)

¹ Mhanuü mia kenie donu dienyata, di dienyaki nu vor, mu capikoe unie donu dienyakecü di mia puo pejo mu kekreiu pu kemezhüshütuo.

² Kejo-u vüshü morosuota ro, capiue puo bu zhülie di puo kejo de ki le di puo mhodzüki nu süde pie puo vütuo.

³ Va hiedia ketso puo vülie vi, derei süzie lho, puo vü pekrathorta ro, n mhinguki nu n zanuou zha sete.

⁴ Thudo bu telha nyü keba ki no puotie pera lho.

Puo Nuo Kejüu Yie bu Balie Morokesuo

⁵ Siezedzürie keze ba di mia puoe puo nuo thepfumia jü di siata ro, siaketau kimiapfü bu ki süu cie pra kekreimia ki nyilie lho. Puo nupfu siezeu thuo puo ki votuo, sidi puo liepie puo kimia chülietuo, mu puo nupfu siezeu bu chüyakezha mhatho chüpie puo gei shütuo.

⁶ Sidi Israel nu puo za bu jüta moketuo la puoe thepfumia penuoshü kerieu bu puo dzürie siaketau za setuo.

⁷ Mu themiaue puo dzürieu kimiapfü lie nyü moro, puo dzürieu kimiapfüe kharu nu pra di phichüko ki, “A nupfu siezeu puo dzürieu za bu Israel nu tuo seiketuo puo medo mo, puoe mia nupfu siezeu mhatho chüpie a gei shü nyü mote.”

⁸ Sitse nadiu nu phichüko puo kielie di puo rüchütuo, mu puoe thethochü zo di sie, “A puo lie nyü mo,” ibeita ro,

⁹ puo dzürieu kimiapfüe phichüko mhodzünu tuo puo ki phituo, di puo phi geinu puo phikou rhuowatuo, sidi mhitsiepie puo zie vatuo, mu puo die kela di sie, “Themia puo dzürieu kicükinu piesieshü nyü kemo-u gei hakemhie chütuo.”

¹⁰ Sidi Israel nu puo phikou rhuokewau kikru za pie “puo phikou rhuokewau kikru,” situo.

Thezho Kekrei Kro Puo

¹¹ Mia puoe mia ze kegeita, mu puo kimiae puo vükezhü kekreiu dzie nunu puo nupfu kelalietuoü phi di puo dzie pie vo luu kele kenyie pielieta ro,

¹² no süpfü dzie dathewatuo; puo ngumezhie morei vi.

¹³ No n likhuo nu mha mesi kemejü tsie kenie, puo zha mu puo cükecü se tuo lho.

¹⁴ No n kinu mha medokecü kekreikecü kenie, puo zha mu puo cükecü pie ba lho.

¹⁵ Jihova n Kepenuopfü se n ketsü kijüu nu no rhei chalieketuo la, no mha kemesi kemejü puotoukecü mu mha kemedo puotoukecü setuo.

¹⁶ Sikecü chüyakecüko pete mu dietho kemo chüyakecü pete Jihova n Kepenuopfü mhodzüki kerütse zocü la.

Amalek Rükra Sa Motanukecü

¹⁷ No Ijipt nunu parkezhü ki Amalek n gei kedipuo chüshü shikecü,

¹⁸ puoe Kepenuopfü rei prei mo di chala nu no lho mu mezieketuo ki n bie, di kenuotsa ketuoko pete biekewa rükrashücie.

¹⁹ Süla Jihova n Kepenuopfü n bu n vie chünu di n ketsü kijüu we n houpfü keba n ngumvümiako kinu kerülei khapie n tsüshü ro, no tei khro Amalek kerükra pete vapejüwalie; no süu chü rükra mota lho.