Pulakeshüzho 24 - Angami Naga CL (Re-edited) Bible (BSI)

Kekhokevakecü Zho

¹ Mia puoe thenu puo lielie rei hapfü zho kesuo huo ngulie di puo ngu puo nei mota, di puo vakewa leshü puo thupie puo dzie nu shü di puo ki nunu puo ketsewa; mu hapfü puo ki nunu tuota,

² di vo thepfu kekrei puo ki nyita.

³ Siro puo nupfu kerieu puo ngu puo nei mota di puo vakewa leshü puo dzie nu shü di puo kinu puo ketsewa; (morei puo nupfu kenieu rei puo liepie puo kimia kechüu siata ümharo),

⁴ puo nupfu puo ketsekewa kerieu, puo lie lapie puo kimia chülie lho, puoe rhuketa la; kekreilamonyü süusü uko Jihova mhodzünu mha kerütse zokecü la; mu no kejo se Jihova n Kepenuopfü pie n phruokeshü kijüu nu vorlie lho.

Thezho Kekreikecüko

⁵ Mia puoe thenu liekelie yasa chü ba ro, puo bu terhü nu pralie lho morei thepie puorei pie puo pelelie lho; puo bu cie puo rüü di puo kitiekinu batuo, sidi puo kimia puoe liekeliepfü ze puo nei batuo.

⁶ Miapuorei telha kegetsie morei kegetsie peso-u khepie setalie lho, siliro puoe mia puo kerheiro khe seketa mhie zo.

⁷ Mia puoe puo seyie Israelmia puo telie di puo pie puo diemia tuoi di puo zewa ro, miateu bu siatuo, sidi noe nie donunu mha kesuo kelhiwatuo.

⁸ Mpa kechü la n kireilie, Levimia phichüko nie ki kepuko ze menuolie, ae uko ki diekhakeshü tuoi, nie menuo di chülie.

⁹ Ijipt nunu nieko parkezhü ki chala nu Jihova n Kepenuopfü Miriam gei kedipuo chüshü shikecü rükraliecie.

¹⁰ Noe mhakehoupuorei pie n zanuou thepushü ro, khepie kezhüu lieketuo la no tuo puo kinu le lho.

¹¹ No kitie tha di, no mha pie puo thepukeshüu bu khepie kezhüu se par n tsütuo.

¹² Siro puoe kejümia puo ro, no puo khepie kezhü pfheu lielie di se vo zhüta lho.

¹³ Niaki keletie ki no khepie kezhü pfheu kha lashü puo tsüwa di puo bu puo pfhe se puo whezhü di japie n tsülie; sidi Jihova n Kepenuopfü mhodzünu n la kemiatho zhoütuo.

¹⁴ No zhakramia, mhakejü ketsopfhümia, n siezedzürie shierei morei chazoumia n kijü n rüna nu kebamia shierei u zhakra chüshü mota lho.

¹⁵ Noe puo zhakra chüpie puo krakelie nhie niaki kele mhodzü puo tsütuo; puoe mhajü di süu merü di lhou keba la; si kemosie puoe Jihova ki n gei kenya di rükhruoshütuo, sidi no phoumalietuo.

¹⁶ Unuonuo la upuonuo bu sialie lho, morei upuonuo la unuonuo bu sialie lho, themia kehoupuorei puo thuo puo kephouma la sia zotuo.

¹⁷ No chazoumia morei u krünuo kejümia mezhü pejü lho, morei thepu la samimiapfü puo pfhe lielie lho.

¹⁸ Derei noe Ijipt nu miadie chütuo di Jihova n Kepenuopfü sünunu n rhaliekecü rükratuo; süla ae n bu hau chünu diekhashüzhie.

¹⁹ Noe n lie nu telha retuo di telhakre puo vawa ro, no süu re latuo üdi la volie lho; süu pie rüsorünau, puo krü kejüu, mu samipfü ya chütuo; Jihova n Kepenuopfü bu n dzie mhatho pete nu ja n tsülieketuo la.

²⁰ No n olivbo puosi vürie ro, puo coko vüwaketa sie vü la hie, vü kepeshako rüsorünau, puo krü kejüu mu samipfü ya chütuo.

²¹ No n khubelie nu khube rie ro, no puo siepfhü lalie lho; chazouu, puo krü kejüu mu samipfü ya chütuo.

²² No Ijipt kijü nu miadie chü zo ükecü rükratuo; süla ae n bu hau chünu diekhashüzhie.