Pulakeshüzho 23 - Angami Naga CL (Re-edited) Bible (BSI)

Jihova Kehou nu Salie Kelhoko

¹ Themia udzü pecükewamia, morei u pezuro dakewamia bu Jihova mechükehouu nu lelie lho.

² Tekhruonuomia bu Jihova mechükehouu nu lelie lho. Puo yiemia phou ker ketso rei Jihova mechükehouu nu lelie lho.

³ Ammonmia morei Moabmia puorei bu Jihova mechükehouu nu lelie lho, u yiemia phou ker ketso rei Jihova mechükehouu nu lelie lho, ukoe kechachie Jihova mechükehou nu lelie lho,

⁴ Ijipt nunu kepar ki ukoe nouva mu dzü se di nie ze kese kemo la, mu ukoe rüseketuo la Mesopotami-a kijü nu Pethor nu kelhou Beor nuou Balam zhakhrükecü la.

⁵ (Derei Jihova n Kepenuopfü Balam die rünyü mota, di Jihova n Kepenuopfü n khriekecü la rüseu kedipie n la theja puo chüwa).

⁶ No kechachie uko rüü mu uko dzevi pfhü morei vi.

⁷ No Edommia we mecüta lho, puo n siezedzürie zocü la. No Ijiptmia mecüta lho, no va puo puo kijü nu chazoumia chü di lhoukecü la.

⁸ Uko nuonuoko phou seu nunu Jihova mechükehouu nu lelie vitatuo.

Terhü nu Razhüchüu Kemesa

⁹ No n ngumvümia whuo pra di razhüchü nu bakecü ki, mha kesuo neiü nunu n kethetuo.

¹⁰ Nie donu mia puoe theva gei puo phou mesa mota ro, puoe razhüchü casie pratatuo, puo bu razhüchü nu ler lho,

¹¹ derei thevatieta ro, puoe dzürüluwatuo, sidi niaki leta ro puo razhüchü nu lerlie vi.

¹² No razhüchüu casie thechü puo khapie ba di, no sünu prapratuo.

¹³ Sidi n nyako donu reize puo satuo, sidi chazou ba tsutuo ro, no süu pie kijü holietuo, di n buo whewatuo.

¹⁴ Jihova n Kepenuopfü n shüphralieketuo la mu n ngumvümia pie n dzie nu shüketuo la, n razhüchüu nu whituoya zo; süla n razhüchüu bu mesatuo, puo bu n donu mha kethevie ngu di n kinu rüreita molieketuo la.

¹⁵ Kituomia puoe puo niepumia kinu ta n ki vorketau, no kha lapie puo niepuu tsü lho.

¹⁶ Puo bu n donu n rüna puo medora, puo neitho-u nu n ze balie, no puo pese lho.

¹⁷ Israelmiapfü la we rüsuoki nu medziyakezha thethekelie bu tuo lho, mu Israelmia thepfuko donu rei sümhie thetheliekecü bu tuo lho.

¹⁸ No phrakeshüu sushüketuo la thethenumia zhakra morei thepfumia thethe zha rei se Jihova n Kepenuopfü kinu ler lho, hanie kenienie rei Jihova n Kepenuopfü mhodzünu mha kerütse zokecü la.

¹⁹ No puopra lie di mha pie Israelmia pecalie lho, raka pra shierei, kecü vie pra shierei, mhakehoupuo pra shierei.

²⁰ Rünamia ki we puopra lie di pecashülie vi, derei n siezeu ki we puopra lie di pecalie lho; no le di pevielietuo ükezhü kijüu nu no mhakehoupuo chü zorei, Jihova n Kepenuopfü bu japie n tsülieketuo la.

²¹ No Jihova n Kepenuopfü ki n die phrashü ro, khakeshü nu menyhota lho; Jihova n Kepenuopfü n rüdie zotuo, mu no phoumata molieketuo la.

²² Derei n die phrashü moro n kephouma jü.

²³ N tie nunu pu phrakeshüu chüshü beituoükecü la menuotuo, kekreilamonyü noe n tie nunu phrakeshüu sü Jihova n Kepenuopfü ki phrashüta zo.

²⁴ No n zanuou khubelie nu tsu ro, no khubesi cü kenyü de cülie vi, derei no puorei pie n viebou nu shülie lho.

²⁵ No n zanuou lie lhame nu vo ro, n dzie pie puokre thelie vi, derei zhiepfhinuo pie n zanuou lha re lho.