Pulakeshüzho 22 - Angami Naga CL (Re-edited) Bible (BSI)

¹ No n zanuomia, thudo morei puo kuo rühou takezhü ngu di kevavuolie lho; no süko ze la vor niepumia tsütuo.

² No kiri niepuu n kepenuoki ba mo, mu puo si moro no süu ze n kinu vortatuo, di pie n ki nu ba di puo niepuu süu pfhü vorkecü tsotuo, süsie no süu pie puo tsü lawatuo.

³ N zanuou gada rei üse sükemhietuo; puo pfhenei rei üse sükemhietuo; n zanuou vie kehoupuorei pejüwa di no ngukelieu üse sükemhietuo; no puo khruohi mota suo.

⁴ No n siezeu gada morei puo thudo cha nu tetsuketa ngu di kevavuota lho; no süko phou la sieshü di puo khruohishütuo.

⁵ Thenumia thepfumia pfhenei se lho, mu thepfumia rei thenumia pfhenei se lho, sükemhie chükecümia Jihova n Kepenuopfü mhodzünu kerütse zo.

⁶ No seibo gei morei kijü nu perakru puo nu puo nuonuo morei puodzü ba di ngulie, mu puo krüpfü puo nuonuo morei puodzü weba ro no puo krüpfü mu puo nuonuo sa pielie lho;

⁷ no puo krüpfü khashüwatuo, derei puo nuonuo we n thuo bielie vi; siliro n la rei vituo siro no rhei chalietuo;

⁸ No ki kesa puo chü ro, n ki mhogei puokhie houkecü puo chütuo, mia bu sügeinu tetsu di thezie thejo-u pie n kiu gei vor molieketuo la.

⁹ N khubelie nu tsia kenie khashü keduo lho, n lie nu vükelie pete, no tsia khakeshüu rei mu n khubelieu tieyie rei n vie chü motatuo.

¹⁰ No thudo puo mu gada puo bu vocie kerhe di ze liecie lho.

¹¹ No chümie mu linen kesa dokecü pfhe dzie lho.

¹² No n pfhedzieu gei puoke diako nu puophrie chütuo.

Phousemia la Thezhoko

¹³ Mia puoe thenu puo lielie di puo ki vo, mu puo mecüta,

¹⁴ mu theda pie hapfü data, tsiu puo za bie pesuo di sie, “A thenu hapfü lielie, di puo ki vo ru, puo phousepfüücü zasi ngulie mote.”

¹⁵ Sitse rüüpfü puo mu puo zuo unie-e puo phouse zasiko se nadiu nu kharuki vor di phichüko ki shütuo.

¹⁶ Sidi rüüpfünuo puoe phichüko ki, “A a nuopfü khapie themia hau ki penyishü ru puoe puo mecüte,

¹⁷ sidi harie puoe kethenga theda pie puo da di sie, ‘A n nuopfü phouse zasiko ngulie mo,’ siüderei a nuopfü phouse zasiko sü haha,” ituo. Sidi unie-e zhükhra pfheu kelhapie nadiu phichüko mhodzünu shütuo.

¹⁸ Sidi nadiu phichüko themiau telie di puo vütuo;

¹⁹ sidi ukoe Israelmia phousepfü puo za pu pesuokecü la puo gei raka shekel krie puo menatuo; sidi süko khapie rüüpfü-nuo puo tsütuo; mu süpfü bu puo kimia chü zotuo; puo rhei chie süpfü vawalie lho.

²⁰ Derei süpfü gei phouse zasi ngulie mota ketho ro,

²¹ ukoe puo ze puo puo kikha ki vortuo, sidi nadiu nu thepfumiakoe ketsie pie puo vakhriwatuo; puoe puo ki nunu thethepfü chü di kenya mhatho pie Israel nu shükecü la. Hamhie di nie donunu mha kesuou chü kemesawatuo.

²² Mia puoe kekreimia puo kimia zezhü di ngulie ro, unie kenienie bu siatuo, thenupfü zekezhüu mu thenupfü rei, hamhie di noe Israel nunu mha kesuou chü kemesawatuo.

²³ Mia puoe lietuo üdi vakhapie baketapfü, mia puoe nadiu nu puo selie di puo zezhüwa ro,

²⁴ nie-e unie, kenienie ze nadiu kharu nu partuo, sidi ketsie pie unie vakhriwatuo, thenupfü rei puo nadi nu ba zo rei mia bu puo khruohinu di pheshielie kemo la, mu thepfuu ro puo zanuou zepfü shükewa la. Hamhie di noe nie donunu mha kesuou kelhiwatuo.

²⁵ Derei mia puoe mia vakhapiekeba rüüpfü puo terha tuo di ngukelie ki puo tepie zezhüwa ro, puo zezhükewau rübei siatuo.

²⁶ Derei rüüpfü gei mhapuorei chülie lho; puoe sia kesü kejo puorei chü mo, süu mia puoe puo zanuou bie di dukhrikewa mhie zocü la.

²⁷ Kekreilamonyü puoe terha nu puo selie; mu vakhapie kebapfüe shieshü, derei puo khruohiketuo miapuorei tuo moketa la.

²⁸ Mia puoe mia puo vakhapie ba kemopfü puo ze keselie di puo telie, di puo zezhüwa, di mia bu unie ngulie ro,

²⁹ puo zezhükewau bu raka shekel hiepengou pie rüüpfü-nuo puo tsütuo, sidi süpfü bu puo kimia chütatuo, puoe puo shüwaketa la, puoe puo rhei chie puo vawalie lho.

³⁰ Mia puoe puo puo kimia chüketapfü lielie lho, süu puo puo mezhüko varhuokecü mhatho.