Pulakeshüzho 21 - Angami Naga CL (Re-edited) Bible (BSI)

Silie Moketa Kedukhri Nyie la Thezho

¹ Jihova n Kepenuopfü n bu pevielietuo üdi se n ketsü kijüu nu, mia puoe mia bu puo dukhripie zhü di ngulie, mu puo dukhrikewau si mota ro,

² n phichüko mu capimiako par di dukhrikewau houpfü keba nadiko kidepuo kepecie nu ba shikecü mejütuo.

³ Sidi dukhripie kezhüu penuothokecü nadiu nu phichüko bu thuünuo puo ze mhachü mo zoluokecü, liecie vocieu pie puo gei shü mo zoluokecü puo selietuo;

⁴ sidi nadi sünu phichükoe thuünuoyo ze dzü krukezhü razha, kijüu cie mo mu tsia khashü mokecü puo nu tsurlietuo, sidi razha sünunu thuünuoyo vo zawatuo.

⁵ Tsiu Levi nuonuo zievokoe penuo vortuo, Jihova n Kepenuopfüe puo chalie chüketuo la mu Jihova za nunu jashüketuo la uko kedaliete, siro uko ketho nunu dienya kehoupuorei mu keboukecü pete caketuo la uko kedaliete.

⁶ Mu dukhriwaketau penuothokecü nadiu nu phichüko pete razhau nu thuünuo puo vo zakewayo mho geinu uko dzie meteituo;

⁷ sidi ukoe putuo: “Hieko dzie pie thezie hau pekrushü mo, mu hie mhi rei pie süsü kechü ngu mo.

⁸ Harie Jihova, n themia Israelko no uko rhalieketako ruotho lielieyi, mu kejo chü kemo zie pekrukeshüu la kejo-u pie n themia Israelko gei shü hiecie.” Sidi thezie kepekru la jokecüu vashü uko tsütuo.

⁹ Sidi no Jihova mhinguki mezhükecüu chükelie la, jokemo-u zie pekrukeshüu nu thejo-u nie donunu chü kemesawatuo.

Terhü nu Tekeliepfü

¹⁰ N ngumvümia ze terhü chü pra di Jihova n Kepenuopfü uko khapie n dzie nu shüwa, di no uko tepie n die chülie.

¹¹ Sidi tekelieko donu thenu kezivipfü puo ngu mu puo ngu n neita ro puo pie n kimia chülie vi.

¹² No puo ze kinu vortatuo, sidi puo tsü thiewatuo, tsiu puo dzietse lewatuo,

¹³ mu puo kedie pfhenei kediwa di n kinu batatuo, sidi khrü puo pete puo puo tsiu puo zuo krütuo, süsie no puo ki volie vi mu puo nupfu chülie vi, sidi puo n kimia chütatuo.

¹⁴ Süsie no puo ngu n nei mota ro, no puo bu puo medora votalie; no puo zecülie lho, no puo pie n die kemhie chülie lho, no puo zhasewaketa la.

Nuorieu la Thezho

¹⁵ Mia puoe thenu kenie lie, mu puo ngu puo nei tsiu kekreiu ngu puo nei mo, mu sünie-e thepfumia penuopie puo tsü phre, mu thepfu nuorieu puo nei kemopfü nuo ro,

¹⁶ puo kayie kezapie puo nuonuoko yathocü nhie puoe puo keneipfü nuorieu pie puo nei kemopfü nuorieu, phichükuokecüu mhodzü shülie lho.

¹⁷ Derei puoe puo nei kemopfü nuou pie nuorieu chü zotuo, sidi puo vie pete za kenie pie puo tsütuo, puoe puo phou kekuo ki zasi nuorieu zokecü la; nuorieu ya sü puo vie zo.

Dieze Chü Kemo Nuou Pesiaketuo

¹⁸ Mia puoe puo nuo ketsülu mu mia die rünyü kemo puo ba di puo puo die rei ze mo, puo zuo die rei ze mo mu unie puo petha zorei unie rünyü mota ro,

¹⁹ puo puo mu puo zuo unie-e puo telie di ze nadiu nu phichüko kebachüu nu kharuki vortuo;

²⁰ mu unie sie phichüko ki, “Harie hienie nuo hau ketsülu, mu hienie die zeya mo; puo cahuocaya, tsiu kemezemia puo zo,” isi.

²¹ Sitse nadi nu themiako pete ketsie pie puo vakhriwatuo; sidi noe nie donunu kesuou chü kemesawatuo; mu Israel pete süu si di michielietuo.

Thezho Kekreikreikecüko

²² Siro mia puoe sia kezhü tho puo chü di puo pesiawa, mu no seibo puo gei puo goushü ro,

²³ puo mo-u bu teizeizha pete seibo gei zhalie lho derei no sünhie puo khruwatuo, goukewamia sü Jihova rüsepfü zokecü la; hai di no Jihova n Kepenuopfü n bu n kayie kijü chünu di se n ketsüu perhuwa molietuo.