Pulakeshüzho 20 - Angami Naga CL (Re-edited) Bible (BSI)

Chüterhü Kechü la Thezhoko

¹ No n ngumvümia ze terhü chütuoü pra di, kierko mu kierbageiko mu rüpfhünuo n rüpfhünuo ki krakuokecü puo ngu ro, uko preita hiecie, Jihova n Kepenuopfüe Ijipt kijü nunu n ze parkeshüu n ze tuo zokecü la.

² Mu nie terhü nu pratuo ro, süki zievo-ue themiako penuo vo rüpfhünuoko rüchütuo,

³ sidi sie uko ki “Rünyüliecie, harie Israel, nieko thie nie ngumvümia ze terhü chütuo üdi partazhie, nie melou thachüta hie; mia prei hie, mu michie hie, morei uko le kemideta hie,

⁴ Jihova nie Kepenuopfüe nie ze vo nie la nie ngumvüko ze kegei di nie bu kuoliekezhau chütuocü la.”

⁵ Siro kezhakoe chüpahiko ki, “Ki kesa puo chülieta di süu kenyülie kemo themia huo baya me? Puo bu puo ki nu la volie, puo terhü nu siata di kekreimia puo bu süu kenyüta rei si mo eru.

⁶ Siro khubelie puo cieshü di puosi cü moluokecü themia huo ba me? Puo bu rei puo ki nu la volie, puo terhü nu siata di kekreimia puo bu puo sou nu cüta rei si mo eru.

⁷ Siro thenu rüsapie ba di lie moluokecü themia ba me? Puo bu puo ki nu la volie, puo terhü nu siata di kekreimia puo bu süpfü lielie rei si mokecü la,” si.

⁸ Siro kezhakoe chüpahiko ki die hako pu sa di, “Supuonie mia prei mu puo melou thachü ba ga? Puo bu puo ki nu la votalie, puo zeko melou bie kethachüwalie vikecü la.”

⁹ Kezhakoe chüpahiko ki die pu tseiwa tse ukoe uko mho krüta kedalietuo.

¹⁰ No nadi puo perhietuo üdi süu penuo volie ro, kezekevi die pie sünu kebako ki pucie.

¹¹ Siro ukoe kezekevi dieu lielietuoüta di kharu khrüshü n tsü ro, sünu keba themiako pete kemvü chüpie n lie chütuo, sidi uko n theketuo.

¹² Derei süko n ze vitho chü mvü di n ze kegeituo üro, no süu retuo;

¹³ sidi Jihova n Kepenuopfü süu khapie n dzie nu shüwa ro, no zhiecha pie thepfumia sünu keba pete dukhriwatuo.

¹⁴ Derei thenuko, kecünuoko, kiriko tsiu nadiu nu keba mha pete, mu terhü mhava pete no liepie n vie chülietuo, sidi n ngumvümia vie vakelieko, Jihova n Kepenuopfü se n ketsüko n thuo n la setuo.

¹⁵ Seyie nadi hako zo kemo, nie ze kepecie keba nadi peteko gei hakemhie chütuo.

¹⁶ Derei Jihova n Kepenuopfü n bu n kayie chütuo üdi se n ketsü seyie süko nadiko nu we no u keha kenyi puorei perheishülie lho:

¹⁷ No süko peka tseiwatuo, Hitko, Amorko, Kananko, Perizko, Hivko, Jebusko, Jihova n Kepenuopfü n ki diekhakeshü tuoi:

¹⁸ Simo üro uko bu uko rhuoko la nanyü chüyakecü kerütse thoko pete pie nie pethawa di, nie bu Jihova nie Kepenuopfü gei kephouma tho chütalie vi.

¹⁹ Noe nadi puo lielietuo üdi süu re pecha phi rei, no seidurü pie seibo kebako pekawalie lho, no süko si cülie vikecü la. No süko wiwa lho. Seibo süko themia üdi no puo re ba me?

²⁰ No sikeba nhasibo kemo seiboko rübei no wipie cahou chü di no puo rekeba nadiu bielie kemochie houlieketuo la.