Pulakeshüzho 2 - Angami Naga CL (Re-edited) Bible (BSI)

Rayha nu Ketuo Teicieko

¹ Sitse Jihova a ki kepu tuoi, hieko rüreilie di tuose Kemerie Dzükezha kevatsa rayha nu vo; zha kekra niekoe Seir Kijüthou whi.

² Sitse Jihovae a ki,

³ “Niekoe kijükhru rüna hanu rühou tuo cha perete, rüreise pesotsa valie.

⁴ Di themiako ki diekhashülie: Niekoe nie seyiemia Esau-nuomia kijü pfüthe votuo, ukoe Seir nu lhou ba; mu ukoe nie preituo, süla nie kireiliecie;

⁵ uko nei kemo chü hie; ae uko kijü puorei pie nieko tsülie lho zo, mu phizho puorei pie nie tsülie lho, ae Seir Kijüthou khapie Esau bu puo vie chünu di puo tsüwaketa la.

⁶ Niekoe raka se uko kinu kecüca khrütuo; mu nie kekrie la raka se uko kinu dzü khrütuo.

⁷ Jihova n Kepenuopfüe n dzie mhatho pete nu japie n tsü; puoe no rayha kezha hau pfüthe kevo ki, cie hiediako nu Jihova n Kepenuopfüe n ze tuo; no mhapuorei tsopfhüta mo.”

⁸ Sidi hiekoe Araba chau, mu Elat tsiu Ezion-geber khawa di u yiemia Seir nu keba Esau nuonuoko pfüthe vo. Hiekoe Moab rayha chau ze vo tse,

⁹ Jihovae a ki: “Moab keyhu hie morei uko ze terhü chü hie, ae uko kijü puorei khapie nie bu nie vie chülie lho, ae Lot nuonuoko bu se uko vie chüketuo la Ar khapie uko tsüwaketa la,” sishü.

¹⁰ (Thiedzü miadimia Emimko kekra sünu lhou,

¹¹ ukoe Anakmia tuoi Refamia üya, derei Moabmia we uko üse Emimmia üya.

¹² Hormia rei thiedzü Seir nu lhou, derei Esau nuonuoko uko kijü lielie di uko pekawa mu uko chü nu lhou bata; Israelkoe Jihova se uko ketsü kijüu nu chükeshü tuoi).

¹³ Süla “Tsie sielie di Zered Rüu cie pralie.” Süla hiekoe Zered Rü cie pralie.

¹⁴ Siro hieko Kadesh-barnia nunu tuoshü di Zered Rüu ciekelie ketso, Jihovae rüse di pukeshü tuoi terhümiaviko phouu pete razhüchü nunu kaüjüketa ketso, cie serethethata.

¹⁵ Sidi razhüchüu nunu uko phewawa di uko pejüwa kemochie Jihova dzieu uko petsou tuo tso.

¹⁶ Sidi terhümiavimia ketuo pete sia mu kaüjüta tse,

¹⁷ Jihovae a ki,

¹⁸ “Nieko thie Ar nunu Moab kijü rie pfüthe votuo,

¹⁹ derei no Ammon nuonuoko penuo vo zorei uko keyhu morei uko ze terhü chü hie, ae Ammon nuomia kijü puorei pie n tsü di n bu n vie chülie lho, ae süu khapie Lot nuomia tsüwaketa la, uko bu uko vie chütuo üdi.

²⁰ (Süu üse Refamia kijü üsiya thiedzü Refamia sünu lhou, derei Ammonko süko üse Zamzummia üya,

²¹ themia sükoe kuo mu kra, tsiu Anakmia tuoi u da rükrie, derei Jihova uko pekawa di ukoe süko vie lielie, di uko chü nu lhouta.

²² Seir gei lhou keba Esau-nuomia la puoe Horko pekawa di uko vie lielie di tsie ketso rei uko bu uko chü nu lhou bata.

²³ Siro Gaza ketso natse nu lhouketuo Avimiako uko we Kaftor nunu kevor Kaftorko uko pekawa di uko chü nu lhou bata).

²⁴ Sielie di tuoshülie, di Arnon Rüu cie pralie, harie, ae Amormia Heshbon kediu Sihon mu puo kijü khapie n dzie nu shüwate, süu lie zolie. Siro terhü chü di puo ze kesulie.

²⁵ Ae thie teiso mia bu n prei mu n ngu merielieketuo khapie tei khro kebako gei shütuo, mia n dze sishü ro petatuo, di n la meyhumezhietuo.”

Israelko Sihon Penyükelie

²⁶ Siro ae Kedemot rayha nunu dieliemia bu vitho dieko se Heshbon kediu Sihon ki shü di sie:

²⁷ “A bu n kijü pfüthe vocümu; a chadiu zekecü zotuo, a rüreise thezatsa morei thevitsa pralie lho.

²⁸ A bu cüketuo la kecüca zepie a tsücie, mu a bu krieketuo la dzü zepie a tsücie, a bu a phi pie tuo praliecümu;

²⁹ Seir nu keba Esau-nuomia mu Ar nu keba Moabko rei cha khapie a ketsü tuoi, a bu Jordan cie se Jihova hie Kepenuopfüe se hie ketsü kijüu nu pralie kemochie.”

³⁰ Derei Heshbon kediu Sihon-e uko bu puo kijü pfüthe vo mvüta; Jihova n Kepenuopfüe thie ha tuoi, puo pie n dzie nu shüwakecü le di puo nou chü perewa mu puo melou chü pekhrükewa la.

³¹ Siro Jihovae a ki, “Harie, a Sihon mu puo kijü pie n tsüshüzhie, puo kijü pebalieketuo la pevie sedeliecie.”

³² Sitse Sihon uko ze Jahaz nu terhü chütuo üdi puo themia pete ze par.

³³ Ru Jihovae úko Kepenuopfüe puo pie u tsüshü; sidi u bu puo mu puo nuonuoko tsiu puo themia peteko penyüwa.

³⁴ Siro süu va hie puo nadiko pete penyülie, di nadi pete, thepfu rei thenu rei mu nhicunuomia rei pekawa, puorei lhieshü mota.

³⁵ We periko mu nadi penyükelieko mu mha vakelieko rübei pie u thuo u vie chü.

³⁶ Arnon Rüu khieki keba Aroer nu mu razha nu keba nadiu nunu Gilid ketso u la nadi kuothorkecü puorei tuo mo; Jihova úko Kepenuopfüe pete pie u tsüshü.

³⁷ Nie Ammon nuomia kijü rübei penuo vo mo, sünu Jabok rü khie pete, tsiu kijüthou nadiko pete, mu Jihova úko Kepenuopfü u bu vo hienukeshü tuoi di.