Pulakeshüzho 19 - Angami Naga CL (Re-edited) Bible (BSI)

Themou Kechü la Rünako

¹ Jihova n Kepenuopfüe khapie n tsüshü zhükecü kijüko se keba seyieko biewa, mu noe uko vieko bie pejüwa, tsiu uko rünako pebalieta tse,

² noe Jihova n Kepenuopfü n bu n vie chüketuo la se n ketsü kijüu metsuo nu n thuo n la rüna se kha kreipie batuo.

³ Mia dukhrikewamia bu ta volieketuo la, Jihova n Kepenuopfüe n vie chüketuo la n tsüketuo kijüu mejü di kezapie za se chülie.

⁴ Siro mia dukhrikewamia themou chü ta sünu vo di rheilieketuo la hamhietuo. Süue puo kenyü chü mo mu puo zanuou gei kelhietuo üdi pedzü le kemomia, puo ngumvü chütuo kemo puo dukhrikewau,

⁵ mhanuü mia puoe puo zanuou ze sei wituoü tsu, di seidurü pie seibo-u wituoü kesie ki, seidurüu puoto geinu rüzu par puo zanuou vawa di puo siata ro, puoe nadi seko puo nu ta vo di puo kelalie vi.

⁶ Si moliro thezie khepu kepfhüu puo nouyiepfü le keba ki mia biekhrikewau whuo vo mu petse nu puo tsolie di puo dukhriwalie vi; mia biekhrikewau thiedzü puo ngumvü tuo mo, süla puoe sia zhü mo.

⁷ Süla a n ki diekhashüzhie, no nadi se kha kreipie balie.

⁸ Mu Jihova n Kepenuopfü n puonuoko ki rüse di pukeshü tuoi n rüvie chü pezha sashü di pie n tsüshütuo üro,

⁹ noe thie n ki diekhakeshüko pete chüüzelie di Jihova n Kepenuopfü khrielie mu puo chako nu tuo seilie, tsiu puo n puonuoko tsütuo üdi pukeshüko pete pie n tsüshü ro no nadi kekrei se chü sapie hako salietuo,

¹⁰ Jihova n Kepenuopfü n kayie chünu di se n ketsü kijüu nu jokemo-u zie pekrushü molieketuo la, mu thezie phoumau bu n gei pfü molieketuo la.

¹¹ Derei mia puo puo zanuou ngumecü, di puo laba di puo biewa, mu süu pfü siata ro, tsiu mia dukhrikewau ta nadi hako puo nu vota üro;

¹² rüna sünu phichüko thuo mia ketseshü di puo ze uko ki vorlietuo, sidi puo bu siataketuo la puo khapie thezie khepu kepfhüu dzie nu shüwatuo.

¹³ No puo ngumezhieshü lho, jokemomia zie pekrukewa kephoumau nunu no Israel chü kemesalie ro n dze vikuotuo.

¹⁴ Jihova n Kepenuopfüe n bu n vie chünu di khapie n ketsü kijüu nu n zanuou kijü therie tsie, keriekimia tsieseko bie kediwa lho.

Zhapumia la Thezho

¹⁵ Mia puo kejo chüwa morei kephouma tho chükewa ki zhapu puo rübei we tso mo, zhapu keniekese tie nunu kejo thotuo.

¹⁶ Mia puoe mia puo ngukemvü la puo üse kejo mhatho chü üdi ketijü zhapu chü ro,

¹⁷ kenya keba kenienie Jihova mhodzü, mu süteiki zievomia mu capimia chü kebako mhodzünu thalietuo.

¹⁸ Capikoe menuo di ketsotuo, mu zhapuue tijü, tsiu tijü di puo siezeu kedo ro,

¹⁹ puoe puo siezeu gei chükeshü le kesieu pie nie-e puo gei chüshütuo; sidi noe nie donunu mha kesuou chüwatuo.

²⁰ Tsiu kekreiko bu si di michielietuo, sidi hasie nie donu mha kesuo sü kemhie chü motatuo.

²¹ Ngukemezhie balie lho, phou puo sou phou puo, mhi puo sou mhi puo, hu puo sou hu puo, thedzie sou thedzie, thephi sou thephi ituo.