Pulakeshüzho 18 - Angami Naga CL (Re-edited) Bible (BSI)

Zievoko mu Leviko Ya Chüketuoko

¹ Levimia zievoko mu Levi seyie pete Israel donu uko kayie uko ya jütuo. Ukoe Jihova ki ruosuo khakeshü puo yau cütuo.

² Uko mechü donu kayie uko ya jütuo, Jihova sü uko kayie zo, puoe uko ki pukeshü tuoi.

³ Siro ruosuo khakeshü themiako kitsa nu zievo-u ya thokeshü hautuo, thudo rei tekuo rei puo boumecieu mu puo meconie mu puo vadi pie zievo-u tsütuo.

⁴ N chieshü kerieu, n khubedzü kerieu, mu n tier chülie kerieu, n kuo mie belie kerieu khapie zievo-u tsütuo.

⁵ Jihova za nu tha di lietho chüketuo la, Jihova n Kepenuopfüe n seyie peteko donunu kechachie puo mu puo nuo thepfuko kedalieketa la.

⁶ Tsiu Levimia Israel nu n rüna kehoupuo nu tuota di Jihova kedashüketuo thechüu nu vor, (mu puoe vor nyü ro, vorlie vi),

⁷ puoe puo kromia Leviko Jihova mhodzünu tha di lietho chüyakezhako tuoi Jihova puo Kepenuopfü za nunu lietho chülie vi.

⁸ Puo kikru mhaze nu puo ya ngulie zo ürei puorei mia ze zatou cütuo.

Pele Kemomia Mhathoko nu U Kireikelie

⁹ Noe Jihova n Kepenuopfü se n ketsü kijüu nu vorliecü ki, noe seyie süko kerütse mhatho chüyakecüko chüta lho.

¹⁰ Nie donu u nuonuo thepfumia rei thenumia rei thepie ruosuo chükecümia, thuophiyakecümia morei themouyakecümia, morei thuo leyakezhamia, kemeduomia,

¹¹ morei theguokesemia, morei themoupfhi nu die kepumia, morei kemeduo kekuo se mha puyakezhamia, morei kesiamia rüchüyakezhamia puorei bu tuo lho.

¹² Kekreilamonyü hako chüyakecü pete Jihova mhodzünu kerütse zo, mu kerütse mhatho hako la Jihova n Kepenuopfü n mhodzüki nu uko whuoshüzhie.

¹³ No Jihova n Kepenuopfü mhodzünu vilotsolie morosuo.

¹⁴ Seyie hako no uko kijü lielieketuoko we themou dieko mu thuophimiako die rünyüya, derei no we Jihova n Kepenuopfü n bu sikecü kha.

Siedzekesi Mosa Tuoicü Puo Ketseshüketuo

¹⁵ Jihova n Kepenuopfüe n donunu a tuoikecü siedzekesimia pesieshütuo, niekoe siedzekesiu die rünyütuo.

¹⁶ Horeb nu mechükehou nhie noe sie, “A bu Jihova a Kepenuopfü pfhe si la hiecie, morei mi kezha hau ngu la hietacie, a siata rei si mo mu!” idi Jihova n Kepenuopfü ki cha.

¹⁷ Ru Jihovae a ki, “Ukoe pukeshüko pu kezhü phre zo.

¹⁸ Ae uko donunu, siedzekesimia n tuoicü pesieshü uko tsütuo, di a dieko pie puotie nu shütuo; sidi puoe a diekhakeshüko pete pie uko ki putuo.

¹⁹ Mu kehoupuorei puo a zanu diekepuko rünyü moro, a thuo süu ketsotuo.

²⁰ Derei a punukeshüu kemo a za nunu die pukecü siedzekesiu, morei terhuo kekrei za nunu die pukecü siedzekesiu bu we sia zotuo.”

²¹ Mu n thuo n rüchü di, “Jihova pushü kemo die we kikidi silie ta?” iba ro.

²² Siedzekesi puoe Jihova za nunu die pushü di pukeshüu chü vor mo, morei ketho mota ro, süu Jihova pushü kemo dieute; siedzekesiue puo medo nu die pu tuote, no puo prei morei vi.