Pulakeshüzho 17 - Angami Naga CL (Re-edited) Bible (BSI)

¹ Thudo morei tekuo shierei kesuo puo gei keba kehoupuorei se ruosuo chüpie Jihova n Kepenuopfü ki shü lho; süue Jihova n Kepenuopfü la kerütse zocü la.

² Nieko donu Jihova n Kepenuopfü se n ketsü rüna kehoupuo nu rei n donu thepfumia morei thenumia shierei dietseidiekho-u varhuo di Jihova n Kepenuopfü mhinguki mha kesuo chü,

³ mu a chü hienukeshüu chü di terhuo kekrei lie chü morei niaki morei khrü morei teigei ketuo kro nu kehoupuorei rüsuota,

⁴ mu süu se n ki pushüta di no silie ro, noe menuo di süu dze ketsotuo, sidi Israel donunu mha kerütse sikecü chü bata ketho üro;

⁵ noe mha kesuo sikecü chüwaketa thepfuu rei thenupfü rei, ze n kharu nu pratuo, sidi noe ketsie pie thepfu süu morei thenu süpfü vakhriwatuo.

⁶ Mia keniekese zhapuu die nunu siaketuou bu siatuo; mia puo rübei zhapu die nunu mia puo bu rei sialie lho.

⁷ Zhapumia bu pesiawatuoü kebau gei u dzie kha rieshütuo: Sidi nie donunu kesuou bie pejüwatuo.

⁸ Kedukhrikecü nyie mu thenyie kekrei, kevi kechü nyie morei n rüna nu kebvükeboukecü dienya kehoupuorei n la rethorkecü huo sier ro, noe sielie di Jihova n Kepenuopfü kedashüketuo thechüu nu votuo.

⁹ Tsiu süki Levimia zievoko mu capiu ki vo di uko rüsatuo, sidi ukoe pepikelieu se n ki pushütuo.

¹⁰ Sitse noe Jihova kedashüketuo thechüu nunu uko capi pukeshüu medzi di chülietuo; mu no uko pukeshüu medziketuo la menuolie.

¹¹ Uko mha pu n kiekeshüu, uko capiu nu n pesikeshü tuoi noe mhachülie, uko n ki pukeshüu nunu noe rürei thezatsa morei thevitsa vata lho.

¹² Jihova n Kepenuopfü mhodzünu thayakezha zievo-u morei capiu rünyü mo di puo thuo puo medo chükecüu bu siatuo, sidi no Israel nunu mha kesuou pejüwatuo.

¹³ Mu themia peteko bu süu sishü di michielie di u thuo u medo chü motatuo.

Kedimia Puo Pesieketuo la Tarhokeshü

¹⁴ Noe Jihova n Kepenuopfü se n ketsü kijüu nu vorlie, di süu pevielie, mu sünu lhoulie tse sie, “A rei seyie kekrei a khieki kebako tuoi kedi puo pie a mho batuo” ilie ro,

¹⁵ noe n mho diketuo la Jihova n Kepenuopfü kedakeshüu bu batuo, n thuo n donunu mia puo khapie n mho kedi chütuo; n thuo n themia kemo chazoumia pie n mho balie lho.

¹⁶ Puo thuo puo la kier peri pekrata lho, morei kier peri pekraketuo la themiako bu Ijipt nu la vo lho, Jihovae nie ki, “Nie sütsa la vo suotuo,” isishü eru.

¹⁷ Morei puoe thenu kekra lie di puo nou ketsikewa chüta suo; morei puo thuo puo la rakachü mu suna kekra penyi lho.

¹⁸ Mu puoe puo kediba gei bakelie ki, Levimia zievoko mhodzü nunu puo la thupie ketuo thezho leshüda puo selietuo.

¹⁹ Sidi puo süu se tuotuo, di puo rhei chie süu phrütuo, puoe thezho hau dieko mu chünukecüzho hako pete chü tsiu ze di Jihova puo Kepenuopfü keprei do silieketuo la;

²⁰ puo nou pie puo siezedzürieko mho tuota molieketuo la, mu diekhakeshüu nunu rüreise thevitsa morei thezatsa vata molieketuo la, sidi puo rei mu puo nuosenuoyie rei Israel kedirüvieu nu di chalieketuo la.