Pulakeshüzho 16 - Angami Naga CL (Re-edited) Bible (BSI)

Morokesuo Thenyi Seko

¹ Jihova n Kepenuopfü ketsü la Abib-u khrü ciekevonyiu nyilie, Abib-u khrü Jihova n Kepenuopfüe pezei ze Ijipt nunu n ze parkelie la.

² Siro Jihovae puo za bu baketuo la, thechü kedashüketuou nunu noe n kuokro morei thukro nunu ciekevonyi ruosuou khashü Jihova n Kepenuopfü tsütuo.

³ Noe süu pie khreiükeshü vie puorei sa cülie lho, zha thenie noe khreiüshükemo niekhrüda, kemezhiekecü niekhrüda cütuo; kekreilamonyü noe kenouse se di Ijipt nunu parlie, süla n kerhei chie noe Ijipt kijü nunu parkelieu rükratuo.

⁴ N rüvie pete nu no zha thenie khrei selie lho, mu zha thenie nhie thevatie ruotho la biekecü themuo puorei bu ba khise tsolie lho.

⁵ Jihova n Kepenuopfü se n ketsü rünako puo nunu rei ciekevonyi ruosuou chülie lho;

⁶ derei Jihova n Kepenuopfü puo za bu batuo üdi kedakelie thechüu nu, no sünu thevatie niaki kele meseki, no Ijipt nunu parkelie meseki ciekevo ruosuo khashütuo.

⁷ Mu no süu chalie di Jihovae kedakeshü thechüu nunu cülietuo, sidi süsieduü n pfheki nu la votatuo.

⁸ No zha sorou khreiüshükemo niekhrüda cütuo, mu zha thenie nhie Jihova n Kepenuopfü la mechükehou kezha puo batuo; sünhie no mhapuorei chülie lho.

Zhadoudoko Nyi

⁹ No zhadoudo thenie phrülie; zhiepfhinuo pie lie re sedekecü nhie nu phrü sedelie.

¹⁰ Süsie Jihova n Kepenuopfüe japie n ketsü tuoi, n nei di khakeshü pie zhadoudonyiu nyipie Jihova n Kepenuopfü rüsuotuo;

¹¹ Jihova n Kepenuopfü puo za khapie batuo üdi thechü kedakelieu nu n nuonuoko mu n nuopfüko, n kituoko tsiu kituopfüko, n rünako nu keba Leviu mu n ze keba rüsoko, merünuoko mu samipfüko ze di Jihova n Kepenuopfü mhodzünu n nei batuo.

¹² No Ijipt nu miadie zo ücü rükratuo mu pethokeshüzho hako menuo di zetuo.

Pru Nyi

¹³ No sieu nu telha pfhü kengulie mu no khubedzü kethe chü nu khubedzü pfhü kengulieketa sie, no zha thenie pruunyi nyituo.

¹⁴ No n nyiu nu n nuonuoko mu n nuopfüko, n kituoko tsiu n kituopfüko, Levimiako, sikemomia, merünuoko mu samipfüko n rüna nu kebako ze di n nei batuo.

¹⁵ Jihova n Kepenuopfü kedashüketuo thechüu nu no zha thenie thenyiu nyituo; Jihova n Kepenuopfü n dziecie pete nu, n mhatho pete nu jashü n tsütuo, sidi no n nei lhe mo batuo.

¹⁶ N donu thepfuko cie puo nu va se Jihova n Kepenuopfü kedashüketuo thechüu nu puo mhodzünu vortuo: Khreiüshükemo niekhrüdanyi ki; zhadoudonyi ki, mu pruunyi ki: ukoe dziethuo di Jihova mhodzünu vorlie lho.

¹⁷ Jihova n Kepenuopfü theja pie n tsükeshü tuoi themia kehoupuorei puo thuo khashülie kevi de khashütuo.

Kedietho Capi Kechü

¹⁸ Jihova n Kepenuopfüe se n ketsü rüna pete nu seyieko nu thecathepi kechümia mu krütamia kedalie, di süko bu kemezhü nunu themiako capi chütuo.

¹⁹ No kemezhüu bie kewhiwalie lho, mu no tietsa puorei noulieta lho, mu no theso lie lho, thesoe mhakesiu mhi rei bie peciewaya, mu kemezhü die bie pesuowayacü la.

²⁰ Jihova n Kepenuopfü pie n ketsü kijüu nu lhoulie mu welieketuo la kethocau rübei medzilie.

²¹ Noe Jihova n Kepenuopfü ruosuoba khieki nanyü sei üdi seibo puorei leilie lho.

²² Morei Jihova n Kepenuopfü rütseyakecü tsiepou puorei se lho.