Pulakeshüzho 15 - Angami Naga CL (Re-edited) Bible (BSI)

Vakeshü Teicieu

¹ Cie thenie metsei noe thepu vapieketsükecü chütuo.

² Mu vapieketsükecü hamhietuo: Mia thepukeshüue pie puo zanuou thepukeshüu vawatuo; puo zanuou ki süu chalie lho. Jihovae vapietsüketuou pushüwaketa la.

³ Chazoumia zowe no süu chalie vi; derei n kromia ki we n pupfü kezhü kehoupuorei vawatuo.

⁴ Simonyü nie donu kejümia puorei tuolie lho, Jihova n Kepenuopfüe n bu welietuo üdi khashü n ketsü kijü nu Ukepenuopfü bu japie n tsüketuo la.

⁵ No Jihova n Kepenuopfü pfhe rünyü mu a thie n ki diekhakeshüko pete menuo di zelie ro,

⁶ Jihova n Kepenuopfüe n ki phrakeshü tuoi, japie n tsütuo, mu noe n vie pie seyie kekra thepulietuo, derei no mia kinu thepulie lho, tsiu no seyie kekra mho dituo, mu uko n mho dilie lho.

⁷ Jihova n Kepenuopfü se n ketsü kijüu nu keba n rüna nu n donu n kromia mhakejü puo ba ro, no mhakejüu gei n nou re morei meteitota lho,

⁸ derei no puo gei mephruoshütuo, di tsa rei kra rei puo se morokesuo de pie puo theputuo.

⁹ Zhosuo nou se di, “Cie thenieu, vapie ketsükecü teicieu penuote,” idi ngunyükemo mhipie n siezeu meho, di no mhapuorei pie puo tsü mota, di puo bu n petsou di Jihova ki kenyashü ro, süu n la kephouma puo taketuo la menuoliecie.

¹⁰ Mephruomevuo mu panya mo zo di hau chülie, silie liro, Jihova n Kepenuopfü n mhatho pete nu mu no chü kesie pete nu japie n tsü zotuokecü la.

¹¹ Kijü nu sü kejümia jü kekralie lho zokecü la, süla a n ki diekhashüzhie, no n kijü nu, ketsopfhüu la mu mhakejüu la n dzie ketheta lho.

¹² N kro-u nu Ibrimia thepfu rei thenu rei zepie n ki shü ro, puoe cie sorou n theketuo, di cie thenie cie no puo khashüwa di puo bu n ki nunu tuotatuo.

¹³ Siro no n kinu kedieu khakeshü ki, no puo bu dziethuo di tuolie lho.

¹⁴ No n kuokro nunu, n sieu nunu, mu n khubedzü kethe chüu nunu puo phruo kemephruoshütuo; Jihova n Kepenuopfü japie n ketsü tuoi, no mha pie puo tsütuo.

¹⁵ No Ijipt kijü nu kediemia zo, di Jihova n Kepenuopfü n rhalieükecü rükralie, süla ae thie n ki, die hau khashüzhie.

¹⁶ Derei puoe no mu n kinuko khrie tsiu n gei puotou, di sie n ki “A n kinu tuotalie lho,” ita ro,

¹⁷ noe mha kemethe puo selie di pie puo nyie gepie le kikha zetuo, sidi puoe kechachie n die chütatuo. Mu n die thenupfü gei rei sükemhie chütuo.

¹⁸ No puo bu n ki nunu rüü di tuo pratakecü n la mha kere puo ükecü leta suo; puoe zhakramia zha de kenie cie sorou n thekewaketa la; mu silie ro Jihova n Kepenuopfü no mhakechü pete nu japie n tsütuo.

Nuorieu Chü Kemesapie Jihova Ketsü

¹⁹ N thukro nunu mu n kuokro nunu puochü penuo kerietho-u noe kha kemesapie Jihova n Kepenuopfü tsütuo; noe n thukro nu penuolie kerieu ze mhachülie lho, no n kuokro nu penuolie kerieu mie belie lho.

²⁰ Noe teiciekepra Jihova n Kepenuopfü mhodzünu n kiünuomia ze di Jihova kedashüketuo thechüu nunu süu cütuo.

²¹ Derei süue mesa kemo puo phi rüyho, puo mhicie, morei kesuo kehoupuorei puo ku ro, no süu pie Jihova n Kepenuopfü ki ruosuo chülie lho.

²² No n rüna nunu süu cülietatuo; thelou morei chüzhie kecü tuoi mesa kemo-u rei kemesau rei kemhie di, süu cülie vi.

²³ No puo zieu cülie lho, no dzü tuoi süu rupie kijü shüwatuo.