Pulakeshüzho 14 - Angami Naga CL (Re-edited) Bible (BSI)

Thekrü Kechü Zho Khakeshü

¹ Nieko sü Jihova nie Kepenuopfü nuonuoko zo; kesiamia la nie thuo nie chü geilie lho morei nie teikhie thielie lho.

² Jihova n Kepenuopfü la kemesa themia kro puo zocü la, mu Jihova puo thuo puo vie chüketuo la, kijü nu keba pete donunu n kedaliete.

Kemesa mu Mesa Kemo Khunuoko

³ No mha kerütsecü puorei cü lho.

⁴ Nie khunuo hako cülie vi, thudo, tekuo,

⁵ chüzhie, thelou kecüpfü, tekhra, terha-mvü, nhali, thelou mu terha-kuo.

⁶ Khunuo kehoupuorei puomou pro kenie chü tsiu puoca shuokecüko nie cülie vi.

⁷ Derei puoca shuo morei puomou prokecüko donu nie hako cü lho, ut, zudi mu konuo, sükoe uko ca shuoya derei uko mou pro mokecü la, nie la mesa mo.

⁸ Siro thevo, puo mou pro derei puoca shuokemo la nie la mesa mo. Nie süko chü cü lho, mu uko kesiamo bie lho.

⁹ Dzü nu keba pete donu nie hako cülie vi: puoshü kenyi mu puo lhe kenyi khe cülie vi.

¹⁰ Tsiu puoshü jü mu puo lhe jükecü khe nie cü lho, süu nie la mesa mo.

¹¹ Nie pera kemesa khe cülie vi.

¹² Derei nie hako cü lho: tsüü, keya, khuo tekecü rümoupfü,

¹³ moupfü, rümou kekreikreicü pete,

¹⁴ shüzha kekreikreicü pete,

¹⁵ ostrik, teizei rümou, dzükezha ra, mouvi kekreikreicü pete,

¹⁶ puchüü kecüpfü, mu puchüü kezhapfü, dzüra,

¹⁷ kijükesia puchüü, chürhaü mu kormorant,

¹⁸ zemvüü, mu hunie kekreikreicü, buoürhü mu haho.

¹⁹ Mu pruoyakecü khunuo kecü pete nie la mesa mo; süko cü lho.

²⁰ Derei puoshü kenyi khunuo kemesa pete nie cülie vi.

²¹ Nie kesia chü puorei cü lho, no süu pie solhimia n ra kebamia we tsü di u bu cülie vi, morei no süu zepie chazoumia tsülie vi; derei noe Jihova n Kepenuopfü kitsa kemesa themia kro puo zo. No temvünuo pie puo krü nudzü nunu cha lho.

Ker-zapuo Zho

²² Teiciekepra n lie nunu ngukelie ker-zapuo khashü seituo.

²³ Jihova n Kepenuopfü mhodzünu, puoe puo za khapie batuo üdi thechü kedakelieu nu no ker-zapuo khakeshü n lha, n khubedzü mu n tier, tsiu n thukro mu n kuokro donu nuorieko cütuo, kechachie Jihova n Kepenuopfü prei tuolieketuo la.

²⁴ Jihovae japie n tsüshü, di Jihova n Kepenuopfüe puo za khapie baketuo la thechü kedakelieu n la cha chathorta di ker-zapuo khakeshüu se volie reta ro,

²⁵ siro no süu pie raka chülietuo di rakau dzepie n dzie nu shülietuo, sidi Jihova n Kepenuopfü kedakelie chüu nu se votuo.

²⁶ Sidi rakau pie n mengu kehoupuorei, thudo shierei, tekuo shierei, khubedzü shierei morei zu kekuo morei kehoupuorei n kenei chütuo. Sidi noe Jihova n Kepenuopfü mhodzünu cüükrietuo, sidi n kinuko ze n neituo.

²⁷ Tsiu noe Levimia n ra kebamia rükra motalie lho, puoe n ze di puoya morei puo phruo jükecü la.

²⁸ Cie se tseilie ro, noe n mhatho ker-zapuou se vor di n rüna nu shülietuo;

²⁹ sidi Levimia n ze di puoya morei puo phruo jükecü la, mu solhimia, merünuomia, siro samimiapfü n ra kebako bu vor cü di pevülietuo, Jihova n Kepenuopfü bu n dzie mhatho pete nu japie n tsülieketuo la.