Pulakeshüzho 13 - Angami Naga CL (Re-edited) Bible (BSI)

¹ Mhanuü nieko donu siedzekesimia morei puo mho kesimia sier di zasi morei ungomhatho dze pushü,

² mu zasi morei ungomhatho puoe n ki pukeshüu chü vorta, di puoe sie no siya kemo pu di, “Úko terhuo kekrei sie vota khe, di úko süko lie chüta khe” ilie ro,

³ no siedzekesi süu morei puo mho kesi süu die rünyüta lho, Jihova n Kepenuopfü n dojü keba zo, noe n melou pete se mu n ruopfü pete se Jihova n Kepenuopfü khrie ba zo mo mo shikecü sishüketuo la zo.

⁴ No Jihova n Kepenuopfü siemedzituo mu puo preituo, siro puo diekhakeshüko zetuo, mu puo pfhe rünyütuo, tsiu no puo lie chütuo mu puo kupfütuotuo.

⁵ Derei siedzekesi süu morei puo mho kesi süu we dukhriwatuo, puoe Ijipt kijü nunu nie ze parkelieu mu kedie kechü kiu nunu n rhakelieu Jihova n Kepenuopfü, n bu zetuolienu di diekhakeshü chau khawanu di Jihova n Kepenuopfü perhiepetsoukecü letakecü la. Sidi noe n donunu mha kesuou bie pejüwatuo.

⁶ N siezedzürie, n zuo nuou, morei n nuou, morei n nuopfü, morei n ze kelhoupfü n kimia, morei n khriethokhriechümia pekhre n ketsi di, “Úko terhuo kekrei rüsuota khe,” ilie, süko no rei mu n puonuoko rei siya kemo rhuo,

⁷ süko n khie n mhou keba themiako rhuo, kijü kela puo tsanu kekreitsa ketso shierei,

⁸ noe puo die nu leta lho morei puo pfhe rünyüta lho, morei n mhi nu, puo ngumezhie lho, morei puo khashü lho, morei puo kevie lho;

⁹ derei no puo dukhriwatuo, puo dukhrikecü nu n dzie bu kerie chütuo, süsienu themia peteko dzietuo.

¹⁰ No ketsie pie puo vakhrituo, puoe Jihova n Kepenuopfü Ijipt kijü nunu, kedie kechü kiu nunu n ze parkelieu kinu n khu kediwakecü lecü la.

¹¹ Tsiu Israel pete bu süu situo, di michielietuo, mu sidi nieko donu kerüzhü hakemhie chü lalie lho.

¹² Jihova n Kepenuopfüe n bu lhouketuo la rüna pie n ketsüko puo nu,

¹³ themia kesuo kro puo nie donu par di rüna nu themiako meshü di sie “Úko vo di terhuo kekrei nie siya kemo lie chüta khe,” siliro,

¹⁴ noe süu ketso mu pfhü menuotuo tsiu harie, mha kerütse sikecü nie donu chü tuota ketho ro,

¹⁵ noe zhiecha pie rüna sünu themiako bie di, sünu keba pete mu kiriko rei zhiecha pie peka tseiwatuo.

¹⁶ Noe sünu mhavako pete kengu se vor nadiu phetsuo nu shüwa di nadiu tsiu puo mhavako pete mi pie thewatuo, thepie Jihova n Kepenuopfü ki keshü mhie di thewatuo, süu kechachie nyopfhükhru puo tuoitatuo, süu pesie lalie lho.

¹⁷ Rüsekepfü vie puo bu rei n dzie kulie lho; Jihova puo nouyie kereu nunu rürei lalie di noushünouzhie pie n pengu lashü, tsiu n ngumezhieshütuo, mu puoe n puonuoko ki rüsekeshü tuoi n chü pekruoshütuo.

¹⁸ No Jihova n Kepenuopfü pfhe zelie, a thie n ki pukeshü, puo diekhakeshüko chüüzelie mu Jihova n Kepenuopfü mhinguki mezhükecüu chülie ro.