Pulakeshüzho 12 - Angami Naga CL (Re-edited) Bible (BSI)

Kerüsuo Chü Puo Rübei Zokecü

¹ Jihova n puonuoko Kepenuopfüe n bu kijü nu n rhei chie n vie chütuo üdi khapie nie ketsü kijüu nu nie bu menuo di ze morokesuo chünukecü mu pethokeshüko haha.

² Nie vo u kijü lielieketuo seyieko rüsuoyakecü rhuoko kebachü pete pekawatuo, kijüthou kerükrie gei rei kerünuo nu rei, mu seibo kepejo pete khro rei;

³ nie-e uko ruosuobako bierhuowatuo, di uko coko bietshewatuo, mu uko Asherako mi pie thewatuo, niekoe uko rhuorhiko bietshewatuo di thechü sünunu uko zako bie pejüwatuo.

⁴ Jihova nie Kepenuopfü ki we sükemhie chülie lho.

⁵ Derei Jihova nie Kepenuopfü nie seyie donu puo za khapie baketuo la mu puo kebachü chüketuo la kedakelieu, nie-e süu pfhütuo di no sünu vortuo;

⁶ nie mha khakeshüu se sünu vortuo, mu nie sünu nie kethe ruosuoko, nie ruothoko, nie ker-zapuo khakeshüko tsiu nie dzie nunu mha khakeshü, mu nie phrakeshüko, mu nie noupra nu mha khakeshü, mu nie thukro nunu tsiu nie kuokro nunu nuorieko se vortuo.

⁷ Sidi sünu niekoe Jihova nie Kepenuopfü mhodzü nunu mhacütuo, sidi nie-e nie dzie pie khakeshü peteko gei Jihova jashü n ketsüko nu n neituo, nie rei mu nie kikruko rei.

⁸ Nie tsie we thie chüyakezha tuoi mia puoe puo thuo puo mhiki mezhükecüu chütatalie lho.

⁹ Nie vor Jihova nie Kepenuopfü kayie pie nie ketsüu tsolie moluo eru.

¹⁰ Derei nie Jordan cie pralie di Jihova nie Kepenuopfüe nie bu wekelie kijüu nu balie, sidi puoe nie khie nie mhou keba ngumvümiako kinu kerülei pie nie tsüshü di nie bu kru di balie ro,

¹¹ siro Jihova nie Kepenuopfüe puo za bu sünu baketuo la thechü puo kedalietuo, sidi a nie ki pukeshü pete pie sünu vortuo nie kethe ruosuoko, nie ruothoko, nie ker-zapuoko mu nie keneisephra khakeshüko, mu nie Jihova ki phrakeshü la khakeshüko.

¹² Tsiu Jihova nie Kepenuopfü mhodzünu nie neituo, nie rei mu nie nuonuo thepfu rei thenu rei, mu nie theke thepfu rei thenu rei mu Leviko nie nadi nu kebako, ukoe nie ze di uko ya morei uko kayie jükecü la.

¹³ No thechü kengu khe nunu no kethe ruosuo khashü moketuo la menuoliecie;

¹⁴ no seyie puo nunu Jihova kedashüketuo thechüu nunu kethe ruosuo khashütuo, mu a n ki diekhakeshü pete chütuo.

¹⁵ Derei Jihova n Kepenuopfü japie n ketsü ki ze, no nadi kehoupuo nu rei merüta ro themuo bie di cülie vi; mesa kemoko rei kemesako rei thelou mu chüzhie tuoikecü rei cülie vi.

¹⁶ Nie puo zie we cülie lho; nie dzü tuoi süu ru pie kijü shüwatuo.

¹⁷ Ker-zapuo khakeshü n lha morei n khubedzü kesa, morei n tier; morei n thukro, morei n kuokro nu nuorieko, morei no phrashüwaketa kehoupuorei, morei n noupra nu mha khakeshü morei n dzie nunu khakeshü puorei n ra nu cülie lho.

¹⁸ Derei Jihova n Kepenuopfüe thechü kedashüketuou nu, no rei n nuo thepfu rei thenu rei, n kituo thepfu rei thenu rei, mu n ra keba Levimia rei Jihova n Kepenuopfü mhodzü nunu, süko cütuo, sidi no mhakehoupuo kechü nu rei Jihova n Kepenuopfü mhodzünu n neituo.

¹⁹ No n kijü nu lhou keba chie Leviko khawa moketuo le terlie.

²⁰ Jihova n Kepenuopfü n ki pukeshü tuoi n rüvie chü pezhashü mu noe merüta di, a themuo cütuo, iro no kehoukipuorei themuo cü kenyü ki cülie vi.

²¹ Jihova n Kepenuopfüe puo za khapie keba la kedakelie thechüu n kinu peciethorta ro, a n ki diekhakeshü tuoi Jihovae se n ketsü n thukro morei n kuokro nunu dukhrilie di n ra nu cü kenyü de cülie.

²² Thelou mu chüzhie chü kecü tuoi, süu cülie vi, mesa kemo-u rei mu kemesau rei kemhie di cülie vi.

²³ Puo zieu cü moketuo la menuolie, thezie-e kerheiro zokecü la, mu noe kerheiro-u pie puochü sa cü lho.

²⁴ No süu cülie lho, no süu dzü keru tuoi rupie kijü shüwatuo.

²⁵ No süu cülie lho; no Jihova mhinguki mha kemezhüu chü di no rei mu n sie n nuonuo bu rei vi volieketuo la.

²⁶ Derei no mha kemesa khashüketuoko, mu noe khashütuo üdi phrakeshüko we se Jihova thechü kedashüketuou nu volie.

²⁷ Sidi Jihova n Kepenuopfü ruosuoba gei n kethe ruosuou, puo chü mu puo zie khashülie; n ruosuo zieu Jihova n Kepenuopfü ruosuoba gei shüwalie, derei puo chüu we cülie rei vi.

²⁸ A n ki diekhakeshü hako pete ze menuolie, no Jihova n Kepenuopfü mhinguki kemezhüu chü di, keviu bu kechachie n vie mu n sie n nuonuoko vielieketuo la.

Miarhi Kerüsuo la U Kireilie Morokesuo

²⁹ Jihova n Kepenuopfüe no vo uko vie lielieketuo seyieko n mhodzü nunu dathewa, tsiu noe uko vie lielie di uko kijü nu balie ro,

³⁰ n mhodzünu uko pekawaketa sie n malie di uko medzita molieketuo la menuoliecie, mu uko rhuoko rüli ketso di sie, “Seyie hako kikidi uko rhuoko rüsuo shi! A rei uko mhielietuo,” ita suotuo zo.

³¹ Jihova n Kepenuopfü gei sükemhie chü lho; uko we uko nuonuo thepfu rei thenu rei mi nu thepie uko rhuoko tsüya.

³² Chünu di a n ki diekhakeshü pete no menuo di chülietuo; no süu pe rei lho, süu nunu se reita lho.