Pulakeshüzho 11 - Angami Naga CL (Re-edited) Bible (BSI)

Jihova Kezha

¹ Süla noe Jihova n Kepenuopfü khrietuo, puo n pelekeshüko setuo, puo ahzako zetuo, puoe chünukecüko, mu puo diekhakeshüko ze seituo.

² Tsiu thie leshücie, ae nie nuonuo u thuo si mu ngu zokemoko ki pu tha mo, Jihova nie Kepenuopfü nie pethakeshüko leshücie, puo kezha, puo kekuo, puo bou yhakeshü,

³ puo zasiko mu puo mhathoko, puoe Ijipt nu kediu Faro gei mu puo kijü pete ki chükeshüko,

⁴ tsiu puo Ijipt rüpfhünuo gei, uko kierko gei mu uko kierbageiko gei chükeshüko; ukoe nieko whuokevor ki puoe Kemerie Dzükezha bu uko vupfülie, mu kikidi Jihova thie ketso rei uko peka vorshü shi;

⁵ mu nie thechü hanu vorlie kemochie puoe rayha nu nieko gei kedipuo chüshü shikecü;

⁶ tsiu Reuben nuou Eliab nuonie Dathan mu Abiram unie gei puoe kedipuo chüshü shikecü, kijüue puo me mekuoshü di Israel pete donunu uko tsiu uko kinuko, uko pfhekiko, mu uko medziketuo pete mezukelie;

⁷ nie mhipie Jihova mhatho kezha chükeshüko pete nguwatakecü la.

Pupie Ketuo Kijüu Thejako

⁸ Süla nie-e kuolie di vo pevielietuo ükezhü kijüu nu lelieketuo la a thie nie ki diekhakeshüko zeliecie,

⁹ Jihovae nie puonuoko tsiu uko yiemiako tsütuo üdi rüsepie kezhü kijüu mithunudzü mu mepfhidzü krukezhü kijüu nu nie rheichalieketuo la.

¹⁰ Noe vo pevielietuoükezhü kijüu we, nie parketa Ijiptmia kijüue no n tsia khashü di n phi se dzü mezapie teziekechü tuoi mo,

¹¹ derei nie-e vo pevielietuoükezhü kijüue kijüthou mu razha kenyi kijü puo, tsiu teigei nu ketsur teirü dzü krieyakecü kijü puo;

¹² Jihova n Kepenuopfüe mehoyakecü kijü puo, Jihova n Kepenuopfü mhi thuo teicie therie nunu teicie thela ketso puo gei ba sei baya.

¹³ Tsiu niekoe a die ze di a thie nieko bu nie melou pete mu nie ruopfü pete se Jihova nie Kepenuopfü khrie mu puo lie chülienu di nie ki diekhakeshüko zelie ro,

¹⁴ puoe kijü la puotei touki teirü khashütuo, teirü kerieu rei teirü kenuou rei, sidi n bu n lha, n khubedzü kesa, mu n tier rei pfhü kengulietuo.

¹⁵ Puoe n kiri la rei n kijü nu nha pelhoushütuo, mu noe cü di pevütuo.

¹⁶ Nie nou seketsiwa di, nie bu rürei terhuo kekrei lie chü mu rüsuota molieketuo la menuoliecie;

¹⁷ sita ro Jihova nouyieu nie gei tu sietatuo di puoe teiko khawa di tei bu rü motatuo, sidi kijü puo si vüshü motatuo, sidi kijü kevi, Jihovae se nie ketsüu nunu nie kaüjü mhatatuo.

¹⁸ Süla nieko a die hako pie nie melou nu mu nie nou shülie; mu nie zasi puo kechü la süu pie nie dzie gei khetuo, mu süko pie nie teikhie dalie.

¹⁹ Siro nie-e süko pie nie nuonuo pethatuo, no ki nu keba ki rei, no cha nu tuo rei, no zhütsu rei, siro no sie rei süko dze putuo.

²⁰ Mu nie-e süko pie nie kikha coko tsiu careko gei thutuo,

²¹ teie kijü mho keba tuoi, Jihovae rüse di nie puonuoko tsütuo ükeshü kijüu nu nie kelhouzha mu nie nuonuoko kelhouzha bu kralieketuo la.

²² Kekreilamonyü nie-e a nie ki diekhakeshü pete menuo di chüüze di Jihova nie Kepenuopfü khrie, mu puo chako pete nu tuo, tsiu puo kupfütuolie ro,

²³ siro Jihova nie mhodzünu seyie hako pete whuowatuo, mu nie-e seyie nie ki zhakuo mu kuokuokecüko vie lielietuo.

²⁴ Nie phizhü pie zhokecü kijü pete nie vietatuo; nie rüvie-e rayha nunu Lebanon ketsotuo mu Kerüu, Eufrat rüu nunu Niakratsa Dzükezha tsotuo.

²⁵ Miapuorei nie mhodzü thalie kenjü Jihova nie Kepenuopfü nie keprei mu nie ngu meriekecüu pie nie kijü prakecü pete gei shütuo, puo nieko ki phrakeshü tuoi.

²⁶ Harie, a thie theja mu rüse pie nie mhodzünu shüzhie.

²⁷ Jihova nie Kepenuopfü diekhakeshüko ae thie se nie ki pukeshüko nie chüüzelie ro theja ngulietuo.

²⁸ Derei nie Jihova nie Kepenuopfü diekhakeshüko ze mo di ae thie nie ki diekhakeshü chau nunu rüreita di nie-e siya kemo terhuo kekrei medzita ro, rüse pfütuo.

²⁹ Tsiu Jihova n Kepenuopfüe n ze, no le pevielietuoükezhü kijüu nu vorshü ro, noe thejau pie Gerizim Kijüthou gei shütuo mu rüseu pie Ebal Kijüthou gei shütuo.

³⁰ Sünie Jordan cie kepra chau niakratsa, Araba bayakecü Kananko kijü nu Gilgal rütsietsa, Moreh phriebo-u khieki ba.

³¹ Jihova nie Kepenuopfüe se nie ketsü kijüu pevielieketuo la nie-e Jordan cie pra di letuo; mu nie-e süu pevielie di sünu lhoulie ro,

³² nie-e a thie chünukecü mu pethokeshüko khapie nie mhodzünu keshüko pecü di chüüze phretuo.