Pulakeshüzho 10 - Angami Naga CL (Re-edited) Bible (BSI)

Thezho Kethu la Tsiekra Kenie Bie Lakelie

¹ Süki Jihovae a ki, “Tsiekra kerienie mhiekecü kenie bielie, di se kijüthou gei a ki khorlie, mu sei pie mhabou puo chülie.

² Siro ae no biephrokewa tsiekra kerienie gei keba dieko thushütuo, sitse no pie mhabouu nu shülietuo,” sishü.

³ Süla ae akasia pie mhabou puo chülie di tsiekra kerienie mhiekecü kenie bielie; di tsiekranie pielie di kijüthou gei kho.

⁴ Ru puoe diekhakeshü kerko, Jihova kijüthou gei mechükehou nhie mi donunu nie ki pukeshüko pie kerieu va kemhie tsiekranie gei thushü, sidi Jihovae pie a tsüshü.

⁵ Süsie ae rüreilie di kijüthou geinu kerta, di tsiekranie pie a chükelie mhabou nu shülie, mu Jihova a ki diekhakeshü mhiei sünie pie sünu shülie.

⁶ (Siro Israelkoe Birot Benejakan nunu Mosera nu vo. Sünu Aron siata, di sünunu puo khruwa, mu puo nuou Eliazar puo sou nu zievo chülie.

⁷ Sünunu ukoe Gudgoda nu volie, mu Gudgoda nunu Jotbatha, rücü kenyi kijü puo nu volie.

⁸ Sükinu thie ketso rei Jihovae Levi seyiemiako bu Jihova ze dietseidiekhobouu pietuoü mu uko bu Jihova mhodzünu tha di lietho chütuoü, mu puo za nunu jashütuo üdi uko kha pekreipie bawa.

⁹ Süla Levi-e puo siezedzürieko ze puo ya morei puo phruo jü, Jihova sü puo phruo zo, Jihova n Kepenuopfüe puo ki pukeshü tuoi).

¹⁰ Va therieu kemhie a kijüthou gei teisozha hiedia mu teizeizha hiedia ba mu süu va rei Jihova a pfhe rünyüshü, Jihova n pekawa nyü mota.

¹¹ Mu Jihovae a ki “Sielie, themiako mhodzü rie di n rüve nu tuoshülie, uko bu le di ae uko tsütuo üdi uko puonuoko ki rüsepiekezhü kijüu pevielieketuo la.”

Jihova Kedipuo Menguya Shikecü

¹² Siro harie, Israel, Jihova n Kepenuopfü n kinu kedipuo menguya ga? Jihova n Kepenuopfü preikecüu zo, puo cha pete nu tuokecü, puo khriekecü, tsiu n melou pete mu n ruopfü pete se Jihova n Kepenuopfü lie chükecüu,

¹³ mu a thie n dzevi la n ki diekhakeshüu zenukecü, süusü, Jihova diekhakeshüko mu puo ahzako zenukecüu zo.

¹⁴ Harie, teiko mu teiko teiu rei, kijüu mu kijüu nu keba peteko Jihova n Kepenuopfü vie zo,

¹⁵ derei Jihova n Kepenuopfüe n puonuoko rübei khriekecü puo medota, mu puo uko nuosenuoyieko, mia kekreimia mho kedalie, thie ha tuoi.

¹⁶ Süla nie melou zhürewaliecie, sidi pietsümvüta hiecie.

¹⁷ Kekreilamonyü Jihova nie Kepenuopfüe terhuoko Rhuou, mu niepuko Niepuu, kezha, kekuo tsiu kemeriekecü Kepenuopfü puo, miapuorei khrie pekreiya mo, mu theso lieya mo.

¹⁸ Puoe u puonuo kejümia mu samipfümia la kethoca chüshüya, tsiu rüsomia khrieya, süko vachüshü mu pfhemenei pie tsüshüya.

¹⁹ Süla nie sikemomia khriecie, nie rei Ijipt kijü nu rüso chükecü la.

²⁰ Noe Jihova n Kepenuopfü preituo, puo rübei rüsuotuo. Puo rübei kutsapfü tuotuo, mu puo za rübei se rüsetuo.

²¹ Noe puo rübei tshetuo; puoe n Kepenuopfü, n mhodzünu mha kezha kemeriekecü chükeshü la.

²² N puonuoko mia hiethenie Ijipt nu tsu; mu tsie Jihova n Kepenuopfü n chüpie teimeluo gei themvü tuoi phrü hulie kenjükecü chüshüte.