Pulakeshüzho 1 - Angami Naga CL (Re-edited) Bible (BSI)

Jihova Diekhakeshüko Phrü Lakeshü

¹ Die hako Mosae Jordan cie kepra rayha nu, Paran mu Tofel, Laban, Hazerot mu Di-zahab donu Suf rütsietsa Araba nunu Israel pete ki pukeshüko.

² (Seir Kijüthou chau ze di Horeb nunu Kadesh-barnia nu kevo zha kerepuokrü chatuo).

³ Cie hiedia cie khrü kerepuokrüu zha puo nhie Mosae Israelmia ki Jihova puo bu punukeshü pete pie pushü.

⁴ Puoe Heshbon nu keba Amorko kediu Sihon siro Ashtarot mu Edrei nu keba Bashan kediu Og penyükewa sie.

⁵ Jordan cie kepra, Moab kijü nunu Mosae thezho hau vatsha di sie,

⁶ Jihova Ukepenuopfü Horeb nunu u ki pukecü, “Nieko kijüthou hau gei ba cha phite.

⁷ Sielie di tuo Amorko kijüthou rüna nu mu Araba nu uko zanuo pete, kijüthou rüna shierei, kijü razha nu shierei, mu Negeb nu tsiu dzükezha khie keba Kananko kijü nu mu Lebanon, kerü kezhau Eufrat rü ketso volie.

⁸ Harie, kijüu khapie nie mhodzünu zhü ze, le di Jihova se nie puonuoko, Abraham, Isak mu Jakob siro uko nuosenuoyie tsütuo üdi rüsepie kezhü kijüu pevielie.”

Capiko Kedakelie

⁹ Süki a nieko ki, “A rübei zo we nieko selie kenjüte;

¹⁰ Jihova nie Kepenuopfü nie chü pekruoshüte, mu harie, nieko sü tsie we krapie teigei themvüko mhiete.

¹¹ Jihova, nie puonuoko Kepenuopfü bu nie chüpie tsie ki rei va nyie kekra pekrashüyi, di puoe nieko ki phrakeshü mhie japie nieko tsücie.

¹² Kikidi a rübei we nieko mu nieko dienya mesiu tsiu thepieu pfülietuo mu!

¹³ Nie seyie le di, mhakesi, mhacamhala kesi, mu mhachümezhieketamia kedalie, siro a süko bu nie mhokezhako chütuo.”

¹⁴ Siro niekoe, “No pukeshüu hieko la vi” idi a die kelashü.

¹⁵ Süla ae nieko seyie krütako, mhakesimia, mhachümezhieketamia zelie, di uko pie nie seyie pete donu nie mhokezha chüshü, nyiemhokezha, kriemhokezha, hiepengoumhokezha mu kermhokezhako chüshü.

¹⁶ Tsiu sükisü ae nie capiko ki, “Nie siezedzürie donu dieshüdienya rünyülie, mia puopuo mu puo siezedzürieu morei puo ze keba rüso-u donu dietho di capi chüshülie.

¹⁷ Nie capi nu nie nei sikrei lho; nie kecüu die rei kezhau die rei rünyü toukecü mese; nie themia zie preita lho, capi sü Ukepenuopfü vie zocü la; mu thenyieu nie la rethorta ro se a ki vortuo, mu a süu rünyüshütuo.”

¹⁸ Siro a süki nie bu chü morokesuou nie ki pushüte.

Israelko Kanan nu Le Mvüketa

¹⁹ Siro Jihova hie Kepenuopfü hie ki diekhakeshü tuoi, hiekoe Horeb nunu tuoshü di Amorko kijükhru rüna chau nu kevo rayha kezha mu kemeriekecü nie ngukeshüu pete pfüthe vo; sidi hie Kadesh-barnia nu vorlie.

²⁰ Sidi ae nieko ki, “Niekoe Jihova Ukepenuopfüe pie u ketsü Amorko kijükhru rüna nu vorliete.

²¹ Harie, Jihova n Kepenuopfüe kijüu pie n mhodzünu khapie zhüte; kho di pevielie, Jihova n puonuoko Kepenuopfü n ki pushüte; michieta hie morei n nou thachüta hie.”

²² Sitse nie pete a penuo vor di sie “Hie bu themia ketsepie hie mhodzü shü di uko bu vo kijüu rie di hie bu cha kiu ze kho morosuo shikecü mu nadi kikecü kro puo nu votie shikecü die se la vor hieko tsücümu,” si.

²³ Mha süu a dzüki puotoulie, mu ae nieko donu mia kerekenie zelie, seyie puo nu mia puopuo idi.

²⁴ Siro uko tuose kijükhru rüna nu kholie, sidi Eshkol Razhau nu volie, di süu rieshü,

²⁵ mu uko kijü süu nu nhasi huo rie pielie di die se hie ki tsur di sie, “Jihova Ukepenuopfüe se u ketsü kijüu kijü kevi puo zo,” si.

²⁶ Sizorei niekoe kho mvüta, di Jihova nie Kepenuopfü diekhakeshüu perhiepetsou;

²⁷ mu niekoe nie pfhekiko nunu panya di sie, “Jihova u ngumecücü la Ijipt kijü nunu u ze parte, u khapie Amorko dzie nu shü di u pekawatuo üdi.

²⁸ We kirapuo khotuoüzhü ga? U siezedzürieko bu u kede di sie, ‘Themiako u ki zha mu chakuo, nadiko zha mu dahou housie tei thu; mu sizomonyü hie sünu Anakim nuonuo ngu di hie melou bie kethachüwa.’ ”

²⁹ Sitse ae sie, “Uko le merie morei preita hie.

³⁰ Jihova nie Kepenuopfü nie mhodzü vokezhüu nie la terhü chüshütuo, puoe Ijipt nu nie mhinguki nu nie la chükeshü tuoi,

³¹ tsiu rayha nu rei Jihova nie Kepenuopfüe nie bu thechü hau nu vorlie kemochie cha puochapuochie mia u nuonuo toupieyakecü tuoi nie toupie vor tso.

³² Derei die hau pushü rei nie-e Jihova nie Kepenuopfü pele mo.

³³ Puoe nie bu nie pfheki pethoulieketuo la nie mhodzü rie di thechü pfhü, nie bu cha kiu zetuo shikecü thashüketuo la, theva gei ro mi mu khinhie gei ro kimhou ize.”

Kepechü Khapie Israel Ketsü

³⁴ Siro Jihovae nie dieko sishü di puo nei mota, di puoe rüse di sie,

³⁵ “Thephou kerüzhü hau nu mia puo bu rei a rüse di khapie nie puonuoko tsütuo ükeshü kijü keviu ngulie lho.

³⁶ Jefune nuou Kaleb zo kemosie; puo zo we ngutuo, mu ae puo vo pralieketa kijüu pie puo mu puo nuonuoko tsütuo, puo Jihova medzi lotsokelie la,” sishü.

³⁷ Nie la Jihova bu a gei rei puo nei mota di sie, “N bu rei sünu lelie lho;

³⁸ Nun nuou Joshua n mhodzü thayakezhau bu letuo; puo nou chü kethepfushülie, puoe Israelko bu süu welieketuo la.

³⁹ Sizomonyü nie nuonuo kecüko mia bu uko telietuo ikebako, tsiu nie nuonuo tsie kevikesuo si moluokecüko sünu letuo, mu ukoe süu pie uko vie chütuo.

⁴⁰ Derei nieko la we, pesie se Kemerie Dzükezha kevatsa rayha nu votalie.”

⁴¹ Sitse niekoe a ki, “Hiekoe Jihova gei phoumawate! Hie pra di terhü chütuo, Jihova hie Kepenuopfüe diekhakeshü tuoi di.” Sidi nie pete rünyie pie u gei goupfülie, di kijükhru rüna gei khokecü rüü thenyüsie sie.

⁴² Sitse Jihovae a ki, “Uko ki pushücie, ‘Kho di terhü chü hie, a nieko donu ba motacü la, moro nie ngumvümia lhotatuo,’ sita.”

⁴³ Siro a nieko rüchü zorei niekoe a die rünyü mvü, di niekoe Jihova diekhakeshüu petsou, mu kemharhü di kijükhru rüna nu kho.

⁴⁴ Sitse kijükhru rüna nu keba Amorko nie petsou par di mepfhi tuoi nie whuo, di Seir nu Horma ketso nie penyü vowa.

⁴⁵ Mu niekoe Jihova mhodzü vor di kra; derei Jihova nie pfhe rünyü mo mu nie meho mota.

⁴⁶ Sidi niekoe Kadesh nu zha kekra bata.