Pitor Kerieu 5 - Angami Naga CL (Re-edited) Bible (BSI)

Ukepenuopfü Kuonuoko Kepfhe

¹ A rei phichümia puo chü mu Khrista kemezhiekecüko zhapumia puo chü, tsiu puo thiesie zayie chü vorketuou nu a ya kenyimia puo chü di a nie donu phichüko tarhoshüzhie;

² Ukepenuopfü kuo kro-u thekeketuo pie nie peleshüte, meholiecie, chü morokesuo puo la üdi hieü nie nei siei di chücie, Ukepenuopfü medo mhie di süu chücie, nie kepra leta hieü chü nyü siei di chüliecie.

³ Nie pelekeshüko mho niepu chüta hie, derei thakie keviko chüpie kuo kro-u kielie.

⁴ Siro Kuopfhe Kezhau mia mhingu chü kevor nhie nieko mhakipuorei ratalie kelho zayie tsüre ngulietuo.

⁵ Sütuoi khriekesako, nie rei phichüko khrükhro balie. Mu nie kehoupuorei rünuopie ketsükecü ha üse nie pedzielie, kekreilamonyü “Ukepenuopfü kokezhamia mese chüya, derei ngukemezhie pie thenou kemenemia tsüya.”

⁶ Süla nie chü kerünuopie Ukepenuopfü bou kekuou khrükhroshüliecie, silie ro puoe puotei tou ki nie chü kerükrieshütuo.

⁷ Nie nounyü pete lhoupie puo gei shüwalie, puoe nie rüli rükrayakezha la.

⁸ Pfheüla mu rhorhüipfü balie. Nie ngumvüdo-u Satan nie kehoupuorei tecülie keviu telietuo üdi ruorüi tuoyakezha losha tuoi nie pfhü whi tuoya zo.

⁹ Nie puo perhielie, kepele nu metei tha zolie, kijü pete nu nie zemiako rei nie kemezhieyakezha pete ze kese ba zokecü nie rei si bacü la.

¹⁰ Derei puotei huoyo nie kemezhiekewa sie, puo geinu ngukemezhie pete paryakezha, Khrista nunu nie kiepie kechachie zayie kechü nu shülieketau, Ukepenuopfü thuo nie perheilie, nie chü pevi tsei mu nie chü kemetei tsiu nie chü pekuoshütuo,

¹¹ Puo bu telhekechachie kekuou chücie. Amen.

Kelukeshü Thelau

¹² A u zemia kedietho puo üdi leyakezha Silvana bu nieko chü kethepfushütuoü mu hau Ukepenuopfü ngukemezhie ketho-u zo ükecü zhapu chüshüketuo la thushüte. Süu nu metei tha zolie.

¹³ Nieko mhie di kedalieketa Babilon nu kebapfü nieko kelushü, sütuoi a nuou Mark rei sa.

¹⁴ Kekhrie nu kemebokecü zho se nieko huoniehuo keluliecie. Nouneu bu nieko Khrista nu baketa pete ze tuokelieu chücie. Amen.