Pitor Kerieu 4 - Angami Naga CL (Re-edited) Bible (BSI)

Rüdiketa Kelhou

¹ Siro Khristae puo chü puo phou nu kemezhiekecü la nie rei noule sikecü se nie nou shüpfülie. (Themia kehoupuorei puo chü puo phoutsa kemezhielieta ro kephouma chü sa motaya).

² Silie ro nie kijü nu lhou sa phiketuo teiko nu themia menguko se monyü Ukepenuopfü medo-u nu lhoulietuo.

³ Nieko voketa teiko nu Judakemomia chüyakezhako chü nie khra mo di rügerüzhü, chüüphou menguko chü, mezemelu, nie nei nie nyü chü, kepekro nyanyüpfü, mu kerütsekecü terhuorhiko kerüsuo chü vor.

⁴ Sirei tsie we nie uko mhatho kerütsekecüko nu uko ze kekrotho moketa ha ngupie uko ngo mu nie tha reiya.

⁵ Derei uko khunhie u rüliko hiepie kerheiko mu kesiako ketsotuoü kebau mhodzünu shütuo.

⁶ Haha la thiedzü dieliekeviu pupie siaketako rei kie, süusü chüümotsa uko pejowata rei ruopfü kitsa Ukepenuopfü mhie di rheilieketuo la.

⁷ Mha pete puo thelataketuo penuote; süla nie melou tseiphrei mu nie mhale menuo di cha balie.

⁸ Mha pete mho rei nieko huoniehuo khrie bei zolie, kekreilamonyü kekhrie-e kejokemou kekra whewaya ze ru.

⁹ Panyapara mo di huoniehuo pesolie.

¹⁰ Kehoupuorei u mhaphruo ngukelieu se di mhaphruo neiüko khashüyakezha Ukepenuopfü lietho kevimia chü di huoniehuo lie chülie.

¹¹ Die puyakezhau bu Ukepenuopfü die touu puyakezha nu pulie, mia khruohikezhamia bu rei Ukepenuopfü thuo khashüyakezha kekuou se lietho chülie, sidi mhakehoupuo nu rei Jisu Khrista geinu Ukepenuopfü zayie chüliecie. Zayie mu kekuo telhekechachie puo vie zo. Amen.

Khristamia Chü di Kemezhiecü

¹² A khrieko, mi pie thekecü kemhie nie gei phir nie dojü kebako haü kethekhrükecü puo mhie di nie ngota hie.

¹³ Sirei Khrista kemezhiekelieko nu nie ya ngulie ba ükecü le di nie neiliecie, sitse puo zayieu pesipengukeshü nhie nie nei phi di pheshietuo.

¹⁴ Nieko Khrista zau la thetha pfüya liro nie thejakepfümia, zayie kechü ruopfü mu Ukepenuopfü Ruopfüu nie gei baketa la.

¹⁵ Derei nieko miapuorei mia kedukhri, kerügu, themia kesuo, dopfidorü chü di kemezhie hiecie.

¹⁶ Derei nie Khristamia kechü la kemezhieya ro mengaketa chü hieü theza süu pfülieketa la Ukepenuopfü tsheliecie.

¹⁷ Ukepenuopfü kikruu nu sede di mia nyie kecüketuo teiu tso batacü la; mu süu u kinu sede sie üro Ukepenuopfü dieliekeviu die zekemoko rüli we kimhie ta?

¹⁸ Siro, “Kemiathomia zorei kelalieketuo re se liro, pelekemoko mu kephoumako dze we kedipuo mhie ta?”

¹⁹ Süla, Ukepenuopfü medo-u ze di kemezhielieyakezhako bu u phou khapie mha pete pelhoukeshü kedietho-u tsü di mhatho kevi chü baliecie.