Pitor Kerieu 3 - Angami Naga CL (Re-edited) Bible (BSI)

Thenuthepfunie Dze

¹ Sütuoi mianupfünuoko, nie nupfunuo khrükhro balie, sitse uko huomia dieu zeya kemo huo nyi üro, uko ki mha pu moto zorei u nupfünuo zhorüli lanu u nou rüdilie vi,

² ukoe nie kemesa mu khrüprei kelhou lhou keba ngushü di.

³ Nie tsütha chiekepfü, suna cümenyie morei pfhenei neiünei se kesekebakecü bu nie chazou rütso chüta hieü,

⁴ lukhro thenou miau, rata kemo ziviu; kokemo mu thenou kemene zho-u se nie rütso chüliecie, süusü Ukepenuopfü mhodzü therhutho-u zo.

⁵ Thiedzü nucünuthopfüko Ukepenuopfü pele di lhoukecüko rei u nupfunuo dieze kechü üse u ketsopfü vor zo.

⁶ Sümhiei Sara rei Abraham üse puo niepuu üdi kie mu puo die ze zo. Nie rei michie mo zo di mha puotouu chüya ro nie rei süpfü nuopfükota zo.

⁷ Sütuoi mianupfunuoko, nie rei mhale menuo di nie nupfünuo ze lhouliecie, sidi thenupfüe nie ki kekuo ketsamia üdi puo rhulie, uko rei ngukemezhie nunu kerhei kha u ketsüu nu karheko ze ru, silie ro nie kecha teikiko mhapuorei nie chakha chütalie lho.

Mha Kevi Kechü la Kemezhiekecü

⁸ Cüsie, nie kehoupuorei kenoumhielie, huoniehuo ngumezhie, huoniehuo khrie, noushünouzhie nyi, mu rünuo ketsülie.

⁹ Mha kesuo pie kesuo pu chü hie, mia nie zhase rei mia zhase la hie, sikecüumonyü japie sümia tsülie. Kekreilamonyü nie bu situo üdi nie kielie, silie ro nie theja kayie ngutuo.

¹⁰ Kekreilamonyü, “Rhei ba nyü mu teisozha kevi ngu nyüyakezhamia, sümia bu u meü se die kesuo pu hie, mu u tie pie mia kese die pu hie,

¹¹ U bu kesuou nunu rüreilie di mha kevi chülie; u bu nouneu pfhülie mu süu whuo zo volie.

¹² Niepuu mhi-e kemiathomia phi terü tuoya, mu puo nyie rei süko kecha rünyü terü baya. Derei Niepuu zie-e kesuo kechüko petsou baya.”

¹³ Nie mha kevi kechü la nie rhiechüya ro supuonie nie pesuowalie vi ta?

¹⁴ Derei nieko puotouu chükecü la kemezhielie ro nie theja ngukelie zo. Süko preiyakezhako prei hie, mu michie pie hie,

¹⁵ derei nie nou nu Niepuu üse Khrista üdi rhulie. Siro mia nie nou siedze puo tuoketau dze ketso ro pushülieketuo la dojü sei tuolie;

¹⁶ sirei ko mo mu menuo se di süu chülie. Nie noule bu mecümecie ba zolie, sitse nie Khrista nu nie zho mesa di lhou tuoyakecü la nie zhase tuoyakezhako u thuo u die la mengalietuo.

¹⁷ Kekreilamonyü kemezhiekecü Ukepenuopfü medo üro, mha kesuo chü di monyü mha kevi chü di kemezhiekecüu vikuo.

¹⁸ Khrista rei u ze Ukepenuopfü ki volieketuo la, kemiatho-u bu miathokemoko sou chü, vapuochü di kephoumako la sia. Chüüphou tsa we puo pesiawata zo, derei ruopfütsa we chü perhei laliete,

¹⁹ süu nunu vo kedieki nu keba ruopfüko petha,

²⁰ sütuoi thiedzü Noah rouu chü keba ki Ukepenuopfüe puo nou shükhreshühiepfü di pfhe ba zorei puo die ze mvüta zo, sidi rou sünu ketuomia huoyo, pete kesa mia thetha rübei dzü nunu kelalie.

²¹ Süusü tsie nie kelashüyakezha dzülukepfü zasi puo thashü, nie chü nie mo geinu kerhuko khrükewau mo, derei nie noule puotou chü di phrapie Ukepenuopfü ketsüu mu süusü Jisu Khrista rheilasieketau la zo.

²² Süu puo tsie vo teigei Ukepenuopfü zatsa nu teigeidielieko, kezhako mu kekuoko mho di bate.