Pitor Kenieu 3 - Angami Naga CL (Re-edited) Bible (BSI)

Niepuu La Vorketuo Phrapie Kezhü

¹ A khrieko, a hau thupie nieko ketsü leshü kenieute; mu kenienie nu nie bu noule puotouu se nie siele lalienu hüshü ho,

² süusü nie bu thiedzü kemesa siedzekesiko pupie kezhü dieko, siro Niepuu mu Kelakelieu die nie apostelko geinu khakeshüko rükralienukecüu zo.

³ Nieko si morokesuo kerietho-u sü thelatsa mha krenyü zokecü kro puo, mia krenyü vortuo, siro uko rüyo u nei u nyü chü,

⁴ di sie, “Puo vortuo ükecü kirapuo pupiezhü ga? Kekreilamonyü u puonuoko siaketa yawinu vor thie ketso sietsenu mhachükeshüko mhie vorzhü ze!” isituo.

⁵ Ukoe thiedzü Ukepenuopfü dieü teiko chü se parkelie, tsiu dzü nunu mu dzü üse kijüu chü parkelie le mvüte,

⁶ süu la dzüdi sier süteiki kijüu rei pekawa.

⁷ Derei die süu thuo tsie keba teiko mu kijüu rei pie mi pfhe bate, sidi pie mia nyie pepiketuo mu miathokemoko pekawaketuo teisozhau pfhe keba zote.

⁸ Derei a khrieko, mha hau rükra mota hie, süusü Niepuu la we khunhie teiso rei teicie nyie puo mhie mu teicie nyie puo rei khunhie zha mhie zo.

⁹ Huomia noule ki we rüli ükecü mhie, derei Niepuu zowe vortuo üdi phrapie kezhü dieu tseiütsoshü menuotalie lho, sirei puoe mia puo bu rei kata mo di peteko bu thenou kedi phrelie kenyü la nie gei puo nou cha phi keba zo.

¹⁰ Derei Niepuu zhau we kerügumia mhiei vortuo, süki teiko puo pfhe kemerie chü di jütatuo, siro mhako the pezhawatuo, tsiu kijüu mu sügei mhathoko pete rei the pejüwatuo.

¹¹ Mha peteko sükemhie di jütaketuo la, nieko kedipuo kemhie kelhou lhou di mesa mu miatho di,

¹² Ukepenuopfü teisozhau pfhekebau bu vor pezilietuo shi? Sünhie teiko the pezewatuo mu mhako mi pie the pezhawatuo.

¹³ Derei we ro, puo die phrapie kezhü tuoi tei kesa mu kijü kesa kemiathomia thuo lhouyakezha kiu pfhe bate.

Tarhokeshü mu Thela Kecha

¹⁴ Süla a khrieko, nieko mha süko pfhe keba ki, nieko rhu mo, jo mo mu kezevi ba di puo bu nie ngulieketuo la nie teitsochü ba zolie;

¹⁵ mu u Niepuu puo nou cha kebae kelakelie zo ücü leliecie. Siro u kezeu Paul rei mhasi khapie puo ketsü mhie thupie nie tsü,

¹⁶ puo leshü pete nu thuyakezha mhiei hau dze pu. Süko nu die silie kere huo ba zo, sidi mhasi kemo mu u nou jülie kemo themia doupuo u thuo rei chükezha tuoi kethodieko kewhipie u thuo u pekakelie chüya.

¹⁷ Süla a zenuoko, nieko mha hako si batakecü la thezho sanyü kemo kekrükecüko bu nieko khrukhre baketa thau nunu nie teshü seta molieketuo la pecü balie.

¹⁸ Derei u Niepuu mu kelakelieu Jisu Khrista mhasi tsiu ngukemezhie nu memie sielie. Puo bu tsie rei mu kechachie zapuzayie chücie. Amen.