Pitor Kenieu 1 - Angami Naga CL (Re-edited) Bible (BSI)

Kelukeshü

¹ Jisu Khrista kituou mu apostel-u Simon Pitor-e, Thupie Ukepenuopfü mu Kelakelieu Jisu Khrista kemiatho nu thalieketa, puoma kere hie kepele mhiekecü nyiketako ki shü ho.

² Ukepenuopfü mu u Niepuu Jisu sikecü nunu ngukemezhie mu noune bu nie gei krakelieu chüliecie.

Kiekelie mu Kedakelie

³ Kepenuopfü zayie mu ketseikevi chü zokecü ü u kiekelieu dze sikelie la we puo kekuo kezhau thuo u kelhou mu mesamezhükecü la se morokesuo pete khapie u tsüshüwate.

⁴ Sidi puo mha hako geinu mha kezha puoma keretho pupie kezhüko kha u tsüshü; sidi süko geinu nieko bu kijüu nu keba kesuokerhuko nunu talie di Kepenuopfü zho-u se lhoulieketuo la.

⁵ Siro mha hau la nie kitsa nie rhiechü bei di nie zho kevi pie kepele salie, mu mhakesi pie nie zho kevi salie,

⁶ siro nie kethekerekecü pie mhasi salie, tsiu shügeshühiekecü pie kethekerekecü salie, tsiu mesamezhükecü pie shügeshühiekecü salie,

⁷ siro siezedzürie huoniehuo khriekecü pie mesamezhükecü salie mu kekhrie üse siezedzürie huoniehuo ngumezhiekecü saliecie.

⁸ Nieko mha hako se nie vie chü mu kra miemiezhülie ro, süko la u Niepu Jisu Khrista dze kesi mhasitsa nie shüshü morei nie si vülie kelho chütalie lho.

⁹ Derei mha hako kejümia puo la we puo khieki kebako rübei ngu di puo mhi cie bate, tsiu puo kephouma chükewako nunu puo chü kemesawaketa rükra mote.

¹⁰ Süla a kezeko, nie kiekelie mu kedakelie si kemecie toulieketuo la hadzü ki rei nie rhiechükuolie, mha hau chülie liro, nie mhakipuorei tetsutalie lho.

¹¹ Silie liro u Niepuu mu kelakelieu Jisu Khrista kechachie kedi nu nie bu lelieketuo cha khrü kemeya phishütuo.

¹² Nie mha hako si mu nie gei baketa ketho-u gei metei bata zo ürei, a hako pie nie tarho lalashüketuo le tuo zo.

¹³ Themo pfheki hau nu keba ki nie nou chü perhei lakeshü puotou zo ücü a le,

¹⁴ u Niepuu Jisu Khrista thuo thapie a kieshücü pecha mo di a se teiu vortuoü bate.

¹⁵ Mu a tuoketa sie nie bu kehoukipuorei die hako rükralieketuo la a hie chü tuo zo.

Khrista Zayieu Kengu Zhapu

¹⁶ Hie u Niepu Jisu Khrista kekuo mu puo vorketuo dze pupie nie kiekeshü ki themia do se rhükelie kemeda dze pu mo, derei hie hie mhipie puo kekuo kezha nguwate.

¹⁷ Zapuzayie Kerükrietho geinu mhapfhe puo: “Hau a Nuo a khrieu; a puo ngu a neithor zo” isikecü kevor ki puo Ukepenuopfü u Puou kinu therhu mu zayie ngulie.

¹⁸ Hie puo ze kijüthou kemesau gei ketha ki hie thuo zorei mhapfhe süu teigei nu kerkecü si.

¹⁹ Sidi siedzedieu chü kemetei sapie hie tsüshü. Nie melou nu teiso pi par mu teiziepfü zie kepar mhielie kemochie mitue kezei nu va pezieshüyakezha tuoi nie die süu le terü balie ro vituo.

²⁰ Kerietho-u nieko hau silie, süusü kethodie nu siedzedie puorei themia medo nunu pu par mo;

²¹ Kekreilamonyü siedzedie puorei themia medo nunu sede mo, derei Kemesa Ruopfü thuo hükeshü geinu themia bu Ukepenuopfü kinu se pu kepar zo.