Pethakeshüu 8 - Angami Naga CL (Re-edited) Bible (BSI)

Kediu Die Zelie mu U Nei di Lhoulie

¹ Supuonie mhakesiu mhie ga? Supuonie mhaca vatshakeshü silieya ga? Mhasi-e mia puo zie bu ziekruoi tuoya, tsiu puo dzükezei zieu chü pekreiwatuo.

² Kediu diekhakeshü zelie, no phrakeshü mhie di,

³ Michieta hie, puo mhodzünu tuolie, mha huo puotou moketa ki, n ketheta hie, kekreilamonyü puoe puo thuo puo nei puo medo chüya.

⁴ Kediu die kebara sünu kekuo baya; mu supuonie puo ki, “No kedipuo chüya ga?” isilie vi mu.

⁵ Themia kehoupuorei diekhakeshüko chüüzeyakezhamia mha kesuo ngulie lho; tsiu mhakesimia noue puo tei tsiu puocapuola silieya.

⁶ Themia mezhie-e puo gei kra zo ürei, mhakehoupuo la rei puo thuo puo tei puo mu puo zho puo nyi phre.

⁷ Kekreilamonyü puoe hasie kiütuo shi siya mo, supuonie puo ki süu kedikechükipuo tuo shi pushülie vi ga?

⁸ Miapuorei puo keha se balieketuo puo kekuo ba mo; morei kesia teisozha mho puo kekuo ba mo; terhükegeikecü nu talie kenjü morei mha kesuoe kesuomia kelashülie lho.

⁹ Mha hako pete ae ngushü, sidi niaki khro mhatho peteko nu a nou khashü; mia puoe kekreimia puo mho kekhakecü ki süu bu kemezhiekelie tei nyi.

Ukepenuopfü Zhokoe Sou

¹⁰ Süsie ae kerüzhümia khrukewa ngu, ukoe kemesachü nu pra mu le tuoya, tsiu ukoe mha sü kemhiekecü chükeshü nadiu nu thetshepfüya; hau rei kemethuo zo.

¹¹ Mhatho kesuo la die pepikeshüu chü mhailie kemo la, süla themia nuonuo noue mha kesuo chütuoü dojüse bataya.

¹² Kephoumamia mha kesuo va thekrie-e chü zorei puoe rhei pechalieya, sirei Ukepenuopfü preiyakezhamia vilieketuo ae si, kekreilamonyü ukoe puo khrüpreilie;

¹³ derei kerüzhümiae vilie lho, morei puo teisozhako mha khrü puo tuoi ba chalie lho, kekreilamonyü ukoe Ukepenuopfü khrüprei di lhou mo.

¹⁴ Kijüu nu mha kemethuo zokecü puo chüya, kemiathomia pie kerüzhümia rhi kemhie di u gei keshü, tsiu kerüzhümia pie kemiathomia rhi kemhie di u gei keshü; hau rei kemethuo zokecü a puya.

¹⁵ Süla ae u menguko chükelie üse vi üya, niaki khro cü mu krie di u nei keba ha mha kekrei pete ki vikuo, kekreilamonyü Ukepenuopfü pie uko ketsü niakiu khro u mezhie teiko zorei hau u ze tuolietuo.

¹⁶ Ae a nou se mhasi silietuoü, tsiu kijüu gei mereiko mehotuoü sie, umhi-e khinhie morei theva keze nguya mo zo.

¹⁷ Süsie ae Ukepenuopfü mhatho peteko ngushü, süusü miapuorei niaki khro mhatho chükeshüko pfhü hulie kenjü, sizomonyü mia puoe süu silietuoü pfhü sie zorei, puoe pfhülie kenjü, mhakesimia puo süu silietuoü le zo rei, puoe süu pfhülie kenjü.