Pethakeshüu 7 - Angami Naga CL (Re-edited) Bible (BSI)

Kelhou Dze la U Chameziekecü

¹ Theza kevi-e tier puoma kere ki vikuo; mu kesia nhie kepenuo nhie ki vikuo.

² Thehethehie ki nu kevo ki thekrü chü keba ki nu kevo vikuo, kekreilamonyü süusü themia peteko la thelau zo, tsiu kerheimia süu pie u melou ki shüse tuotatuo.

³ Thenou kesuoe kenyü ki vikuo, kekreilamonyü u zie bu puo nousuokeshü geinu u meloue puo neilieya.

⁴ Mhakesimia noue thekrü kechü ki nu baya, derei mhalekemomia noue keyukenyü chü kebamia ki nu baya.

⁵ Mhalekemomia tsali rünyükecüu ki, mhakesimia u kerhiekeshü pfhe kerünyü we vikuo.

⁶ Kekreilamonyü gali khro zohu pro priepriekeshü tuoi, mhalekemomia kenyü rei sümhie zo; hau rei kemethuo zo.

⁷ Mha pesekecüe mhakesimia chü penyawaya ketho zo, tsiu thesoe u nou bie perhuwaya.

⁸ Mha therieu ki puo thelau vikuo, tsiu unou shügeshühiekecüe unou kemiakokecü ki vikuo.

⁹ N nou meyie mhaita hie, kekreilamonyü nouyie-e mhalekemomia merü nu baya.

¹⁰ “Kiüdi teisozha kerieko haki vikuo ga?” sikecü pu hie, kekreilamonyü no hau mhasi geinu ketso mokecü la.

¹¹ Mhasi-e vipie kayie mhie zo, tsiu niaki nguyakezhako la puo kemevi ba.

¹² Kekreilamonyü mhasi rüguokelie-e raka rüguokelie mhie zo, tsiu kesikele kevi sü mhasi-e kerhei khapie puo gei kebamia tsüyacüu zo.

¹³ Ukepenuopfü mhathoko dze leshücie; supuonie puoe bie kerüwikewau bie kemezhülie vi ga?

¹⁴ Mhanyikelie nhie u neilie, tsiu kemezhiekelie nhie mha leliecie, Kepenuopfüe sünie chü phreshü zo, themia bu puo sie mhapuorei ngulie lho ükecü la.

Kelhou nu Lelie Kemoko

¹⁵ A kelhou kemethuoyo nu mha hako pete nguwate; kemiathomia puo kemiatho nunu kaketa, tsiu kerüzhümia puo kerüzhü nunu lhou chakelie.

¹⁶ No n thuo n üse miatho phi üta hie, morei n thuo n üse mhasi phi üta hie, kiüdi n thuo n pekawatuo mu?

¹⁷ No n zho suothorta hie, morei mhalekemomia chüta hie; kiüdi n teiu mhodzü siatatieya ga?

¹⁸ No hau thezelie tse vituo, tsiu kekreiu nunu n dzie teshü seta hie, kekreilamonyü Kepenuopfü preiyakezhamia sünie kenienie nu vi kehielietuo.

¹⁹ Nadi nu kezhamia ker ki rei mhasi-e kekuo khapie mhakesimia tsükuoya.

²⁰ Ketho zo, kijü nu miapuorei miatho zo vo phouma moto di mha kevi chükecü ba mo zo.

²¹ Siro mia diepu pete pele hiecie; n kituomia n rüsekecü rünyülie rei silie lhomu.

²² No va kekra mia rüsetayakecü n noue si ba zo.

²³ A mhasi se mha hako pete dojüwate; a sie, “A mhasilietuo,” derei süu a kinu pecieta.

²⁴ Mha kepecie nu ketuou, tsiu sou mu sou sekecüu, supuonie pfhüse parlie vi ga?

²⁵ A a nou kereipie silietuoü mu pfhüse partuoü tsiu mhasi pfhütuoü, mu puocapuola silietuoü sie zo, tsiu kerüzhüe mhalekemo zocü, siro mhalekemoe kenya zocü.

²⁶ Tsiu a thenumia kebie mhie zocüpfü, puo melou kebie mu jal, puo dzie sü kero kesia ki rei suokuokecü ngulie; Ukepenuopfü nei chüyakecümiae hapfü dzie nunu talietuo; derei kephoumamiae hapfü bu u teshülietuo.

²⁷ Harie, a hau nguliete, Pethakeshüue puya, mhacamhala silietuoü mhapuo pie kekreiu sashüshü vo.

²⁸ A noue süu pfhü mu pfhü la zo, derei a süu ngulie mo. Mia nyie puo donu thepfumia puo a ngulie, derei süko donu thenumia puorei ngulie mo.

²⁹ Harie, mha hau rübei a silie, süusü Ukepenuopfüe themia chü kemezhüshü zo, derei ukoe mharhü kekra pfhüse parte.