Pethakeshüu 5 - Angami Naga CL (Re-edited) Bible (BSI)

U Nou Rünuokecü mu U Neikecü

¹ No Kepenuopfü ki vokecü ki n phi cha menuolie, penuo vo di rünyükelie-e mhalekemoko ruosuo khakeshü ki vikuo; kekreilamonyü ukoe mha kesuo chü molie siya mo.

² Die pu rükri hie, mu Kepenuopfü mhodzü mha putuoü rükrita hie; Kepenuopfüe teigei bacü la, mu no we kijü ba, süla n die bu tsaliecie.

³ Kekreilamonyü merei kekra geinu u mho pemaya; tsiu mhalekemomia pfhe-e die kekra geinu silieya.

⁴ No Kepenuopfü ki mhapuo phrakeshü ki, süu chü menuota hiecie; puoe mhalekemomia ngu puo neiya mocü la. No phrakeshüu chüwacie.

⁵ No phrashü di chü moketau ki no phrashü mokecüu vikuo zocü la.

⁶ N tie bu n chüpie phoumawa hie; tsiu no dielieu mhodzü, süu kekrüte; isi hiecie; kiüdi Kepenuopfü bu n pfhe n die la puo nei mo di n dzie mhatho pekawatuo ga?

⁷ Kekreilamonyü u mho kekra kebara kemethuo baya, mu die rei krataya; derei no we Ukepenuopfü preilie.

⁸ Mhanuü no rüna puo nu kejümia pese tsiu kethoca mu kemezhüu bie pejükewa ngu zo ürei, süu la n ngo hiecie, rükriekuokecüue kezha kerükrieu meho bayacü la, tsiu süu ki rükriekuokecü puo uko mho ba.

⁹ Derei mha pete leshü ro hau kijüu la mha kevi puo zo, lie puo mho, kedimia puo bu bakecü.

¹⁰ Raka puo neiyakezhamia raka se puo kelhuo chülie lho; morei kinyi ngu krakelie u neiyakezhamia kinyi se u kelhuo chülie lho; hauha rei kemethuo zo.

¹¹ Mha ngu krakelie ki, süko cüükriekecü rei krataya; niepumia puo mhipie süko mehokecü sietsa puo kemevi kedipuo ba ga?

¹² Mhachüyakezhamia huoyo morei kekra cüükrie shierei zetshüilieya; derei kenyimia mha kekra kebau puo chüpie puo bu zelie lhotaya.

¹³ Niaki khro a mha kesuo se puo ngu; süusü kenyimiae kinyi khapie kebau thuo u pechüya.

¹⁴ Derei kinyi süko mhatho chü khrieliekemo geinu jütaya, mu puoe thepfumia puo penuolie zorei, mhapuorei puo dzie nu ba motaya.

¹⁵ Puoe puo zuo va nunu kevor tuoi, puo latatuo. Puoe methuo di vor, mu puo dzie nu puo mhachükelie puorei se puo medzilie lho.

¹⁶ Hau rei mha kesuo se puo zo, puo kimhie di vor shi, sütuoi puoe latatuo; puo mhachümhalie pie teikhrie tsükewa kemevi kedipuo ba ga?

¹⁷ Tsiu teisozha pete puoe kezei nu mhacümhakrieya, tsiu nousuo, kechükenyü mu nouyie puo gei ba phi.

¹⁸ Harie, a ngukecü, Ukepenuopfüe khapie puo ketsü, niakiu khro nu teisozha pete mhacümhakrie tsiu puo mhatho pete nu puo neikelie, haha vi mu puo mese tou zo; kekreilamonyü hau puo yau zo.

¹⁹ Themia kehoupuorei Kepenuopfüe khapie puo ketsü kinyi, mhanyaürako tsiu se puo neilie kevi kekuo, tsiu puo bu puo ya ngukelie mu puo mhatho nu puo neikelie ha Ukepenuopfü mhaphruo zo.

²⁰ Puoe puo kelhou nu teisozhako rükra philie lhocü la, kekreilamonyü Ukepenuopfüe kenei pie puo tshuwate.