Pethakeshüu 4 - Angami Naga CL (Re-edited) Bible (BSI)

¹ Siro a niaki khro huoniehuo pesekecü pete ngushü. Mu harie, mia bu u peseyakezhako mhidzü mehoshücie, miapuorei uko nou thupeluoketuo tuo mo! Mia uko peseyakezhako kitsa we kekuo nyi, derei uko mia nou thupeluoketuo puorei tuo mo.

² Mu a lecü tsie rhei kebako ki rei siaketako we u ruo vikuote;

³ derei vor moluokecüu, niaki khro mha kesuo nguwa moluokecüu sünie ki rei vikuo zo.

⁴ Süsie ae mhatho pete tsiu mhachü kesi pete u siezanuomia ngu urokecü geinu voryakezha ngushü. Hau rei kemethuo zo tsiu teikhrie whuo ketuo mhie zo.

⁵ Mhalekemomia puo dzienie kedziereipfü baya, tsiu puo thuo puo chü cüya.

⁶ Mha u dzie puo rübei ketshu se di kemekrie kebau we, u dzie kenienie ketshu se di meyhumezhie, mu teikhrie whuo ketuou ki vikuo.

⁷ Süsie ae niaki khro mha kemethuo zokecü ngushü,

⁸ mia puoe puo rübei zo, puo nuo rei jü morei puo siezedzürie rei jü; sizorei puo mhatho pete nu puo thela tuo mo; morei puo kinyiko se puo mhi kelhuo chülie mo; süla puoe sie, “A supuo la mhachümhalie di a nei a nyü kechü a thuo chülieya mo mu?” idi ketsoya mo. Hauha rei kemethuo zo tsiu u nei kemo merei puo.

U Khriethomia Bakecü Kemevi

⁹ Mia kenie-e mia puo ki vikuo, unie mhatho la zhakhra kevi ngulieyakezha la.

¹⁰ Mhanuü unie tetsuta zorei, mia puoe puo zeu teshü se sierlietuo; derei mia puo puo rübei di tetsuketauwe chülietie; miapuorei puo teshü se sierketuo ba mocü la.

¹¹ Süsie rei, mhanuü mia kenie keze zhü ro, unie lelieya; sirei mia puo puo rübei kidi lelie ta?

¹² Mia puoe kekreimia puo ki kuolie vi, mia kenie-e mia puo phir rei thalie vi, kero se kesalie ro te mhaitaya mo.

¹³ Mhajü derei mhakesi nuoyoe phichü mu mhalekemo kedi, puo tarho salie lhoketau ki vikuo;

¹⁴ Mia puoe kedieki nunu kediba gei volie, puo kedirüvie nu mhajü di penuolie zorei.

¹⁵ Ae niaki khro rhei ketuo pete, ukoe kediu tha nu thaketuou sa di tuokecü ngushü.

¹⁶ Themia peteko rei, uko mhodzü lhouwaketako rei uko thela jü, hasie vorketuoko rei puo geinu u neilie lho. Hau rei kemethuo zo tsiu teikhrie whuo ketuo mhie tou zo.