Pethakeshüu 12 - Angami Naga CL (Re-edited) Bible (BSI)

¹ N khriesa zhako nu n pelhoukeshüu rükralie, teisozha kesuoko vorkecü mhodzü, tsiu teicieko penuo vorkecü mhodzü, noe sie, “A süko nu mha a kenei ba mo” iketa mhodzü;

² niaki mu kezie, tsiu khrü, mu themvüko zeibouitakecü mhodzü, tsiu kimhouko teirü sie la vor kemonu,

³ teisozha sünhie kipfhemia perüsatatuo, tsiu kekuomia nuketsutatuo, tsiu mha geyakezhapfüko themia tsaketa la rüleitatuo, tsiu khirki nu mha mehokezhamia mha ngu merütatuo,

⁴ Tsiu chaü nu kikhako khawatuo, mhakege pfhe tsaketa ki, tsiu mia puoe pera pfhe ze di sietatuo, tsiu tsali kechüpfüko chü kerünuoketa ki;

⁵ mha kerükrie rei preiketa ki, tsiu kemichie-e cha nu tuota, mu almond pou parta, mu ku u pelhata, tsiu u kemenguu chülie mota; kekreilamonyü themiae kechachie kiu nu la votatuo, tsiu thekrü chüyakezhako chaüko nu rühou tuoketa ki,

⁶ rakachü rhü phreikeshü, morei suna khou bietshakewa, morei dzükhou nu lipfhüu biephrokewa, morei puothuou puo bou nunu biephakewa mhodzü, n pelhoukeshüu rükraliecie.

⁷ Thiedzü tuoi nyopheu kijüu ki la votatuo, tsiu thesüu Ukepenuopfü ki la votatuo.

⁸ Kemethuo sie rei kemethuo zo; Pethakeshüue puya; mha peteko kemethuo zo.

Thela Die

⁹ Pethakeshüu mhasikecü rübei monyü, puoe tsie rei mha kesikele pie themia pethaya, uwe, puoe mha leshü sidi pfhüse parlie, di mhasidie kekra pfhü kesiesoshüte.

¹⁰ Pethakeshüue die u keneiko pfhüshü tsiu thupie kezhüko mezhü zo, süko ketho dieko zo.

¹¹ Mhakesimia die-e kethe kemethe mhie, tsiu kehou nu kepethamiae gojal pie zhie kesakeshü, tekuokepfhemia puo kinu khakeshü kengukelie dieko kemhie:

¹² A nuo, mha hako mho rei menuoliecie, leshü kekra chükeshü puo thela tuo mo; tsiu leshü phrüthor rei uchü umo mezietaya.

¹³ Mha thelau pete rünyüliete; Ukepenuopfü preilie, tsiu puo diekhakeshüko chüüzelie, hau themia chü morokesuo mhatho peteu zo.

¹⁴ Kekreilamonyü Ukepenuopfüe mhatho pete, kepekhre nu vie pete, mha kevi rei kesuo shierei se dienya kecükecü ki vortuo.