Pethakeshüu 11 - Angami Naga CL (Re-edited) Bible (BSI)

Kemenuo Zhakhra

¹ N niekhrüda pie dzü nu shücie, teisozha kekra sie no süu ngu lalietuocü la.

² N vie kezapie thenie morei thetha chüpie balie; kekreilamonyü ketsopfhü kicükipuo kijüu gei vortuo shikecü si mo.

³ Kimhouko tshupfü ketuo ki, teirü lapie kijü nu shüya, mu mhanuü seibo puoe te pekhrotsa morei pesotsa tsu rei, kirapuo tetsu shi sünu zhütatuo.

⁴ Teikhrie dze mehoyakezhamia tsia prulie lho; tsiu kimhou dze leyakezhamia lie relie lho.

⁵ No kikemhie di nuo meziepfü kebapfü va nu theruko gei keha vorlieya shikecü silieya kemo tuoi, sütuoi Ukepenuopfü mha pete chükeshüu mhathoko no silie lho.

⁶ Khise gei tsia prushülie, tsiu thevatie n dzie bu kechazie bata hie, kekreilamonyü no kiu vilie tuo shi, hau tuo mo luutuo shi, morei kenienie vi kemhielietuo shi si mo.

Khriesarüü Tei mu Ketsakechie

⁷ Kezieue vi, tsiu n mhi bu niaki mehokecü sü mha u kenei puo.

⁸ Mhanuü mia puoe teicie kekra lhoulie ro, puo bu süko nu puo neiliecie; derei puo bu teisozha kezeiko rükrashücie, süko kra se batuocü la. Mha voryakecü pete kemethuo zo.

⁹ Harie, khriesau, n khriesaki n neiliecie, tsiu n khriesa teiki n nou bu n chüpie puo neilie, n nou keleu tsiu n mhi kenguu se lhoulie. Derei Ukepenuopfüe mha hako pete geinu n dienyakecü ketuo no siliecie.

¹⁰ Süla n melou nunu thenou kesuo whuowalie, tsiu n mo geinu kechüu chüwalie; nhicu tsiu khriesarüü sü kemethuo zocü la.