Pethakeshüu 10 - Angami Naga CL (Re-edited) Bible (BSI)

Mhasi Kekrei Huo

¹ Teizie kesiae tier kethengu chüpie puo bu menataya, sütuoi mhalekemo mhatho huoyoe mhasi tsiu therhu chü pejüwaya.

² Mhakesimia meloue puo dzie puo zatsa balieya; derei mhalekemomia meloue puo vitsa baya.

³ Mhalekemo-u cha nu tuo kevo ki rei, puo kesikele tsa, sidi puoe mhalekemomia ücü mia pete bu silieya.

⁴ Mhanuü kezhamia puoe n gei puo nei mota rei, n thau perieshü hie, jü bakelie geinu kekrükecü kekra bie kemenelieyacü la.

⁵ Niakiu khro a mha kesuo puo ngu, süu sümia kekhayakezhau geinu kekrükecü kevor tuoi.

⁶ Mhalekemomia pie thechü kerükrie kekra nu shü, tsiu mhakenyimia thechü kerünuo nu keba.

⁷ Ae miadiemia bu kier gei keba, tsiu kedinuoko bu miadiemia tuoi chatuo ketuo ngu.

⁸ Themia thekhe thiekecümia te sünu tsutuo, tsiu kehoupuorei sozha biephapfü kepramia tinyhü puo medutuo.

⁹ Kehoupuorei ketsie phrokecümia sü geinu rüzapfülieya, tsiu sei phrokecümia sügeinu kemichie ngulieya.

¹⁰ Mhanuü thegiu puoü suota, mu puoü kerülie moliro, puoe puo hie chükuo sashü morosuo, derei mhasi-e mia puo khruohipie puo bu vikehielieya.

¹¹ Tinhyüe meshülie kemonu mia meduya ro, tinyhü meshükezhamia kemevi jü.

¹² Mhakesimia tie nu diekoe ngukemezhie puya, derei mhalekemomia puotie thuo puo mezulietuo.

¹³ Puotie nu die mhale kemo die nu sedeya; tsiu puo die thelakoe mhachü kepesuo kenya die zo.

¹⁴ Derei mhalekemomia die bu puo tshupfü tuoya. Kedipuo chü vortuo shi miapuorei si mo zorei, tsiu thiesie kedipuo chütuo shikecü supuonie puo ki pulie ta?

¹⁵ Mhalekemomiako mhathoe uko pelhowaya, ukoe nadi nu kevo chau rei siya mocü la.

¹⁶ Ce, kijüu, n kediu bu mia kituo chü, mu n kedinuoko khise thehethehie chüya liro,

¹⁷ Harie kijüu, n kediue pehümia puo chü, tsiu n kedinuoko puotei touki thehethehie chü süusü meteilieketuo la, tsiu meze la moliro, noe ruokuo zo.

¹⁸ Kemecü la kiu rükrete, tsiu menuo kemo la kiu pota.

¹⁹ Thehethehie kechüe kenyü la zo; tsiu zu u chüpie kedzülelieya, rakae tsopfhü pete mezashüya.

²⁰ N kele nu zorei kediu rüse hie, morei n zhübou nu zorei kenyimia rüse hie, kekreilamonyü teirae n pfhe toupfü voshülie vi; morei puoshü kenyi khunuo huo süu dze pushü rei si momu.