Pesikeshü 9 - Angami Naga CL (Re-edited) Bible (BSI)

¹ Siro teigeidielie pengouu puo tsüu khoushü, mu teigei nu themvü puo te kijü tsurketa ae ngu, mu thekhe kesoutho nu cabiu pie puo tsüwa;

² sidi puoe thekhe kesoutho-u hieshü tse, sünu miphu kezha puo nunu mikhu kepar tuoi khu par, sidi thekheu nunu kepar mikhu la niaki mu teikhrie zeibouita.

³ Sitse mikhu nunu kuprie kijüu gei vorta, mu kijü gei seba kekuo tuoicü kekuo khapie uko tsü.

⁴ Süko bu kijü gei nha morei nha kepejo kehoupuorei morei seibo kehoupuorei pekawa hienushü, derei kehoupuorei uko teikhieko gei Ukepenuopfü zasiu ba kemoko rübei pechülie kevi zo üshü.

⁵ Siro uko bu khrü pengou süko pechünu, derei süko dukhriwa hienushü, mu uko pechükecü seba mia keükecü tuoituo.

⁶ Süteiki themiakoe kesia pfhütuo, derei süu ngulie lho; uko kesia mengutuo, derei kesia ta uko therhietatuo.

⁷ Siro kuprieko ngupie kier terhü kegeituo üdi dojüpfü ketha tuoi. Uko tsü ngupie suna keditsüre pfüketuo tuoi; mu uko zie ngupie themia zie tuoi,

⁸ uko tsüthae thenumia tha tuoi, mu uko hukoe losha hu tuoi;

⁹ uko kouko thegi pie kechü u merükeya tuoi, mu uko shüphrakeshü kierbagei kekra ta terhü nu vokezhü pfhe tuoi.

¹⁰ Ukoe seba tuoi u mei mu u tha nyi, tsiu thekhrü pengou themia pechüketuo kekuo uko mei gei ba.

¹¹ Siro thekhe kesoutho nu dielieu bu uko mho kedi chüya; Ibri die nu puo za Abadon, mu Grik nu Apolyon üya.

¹² Ce, icü therieu tseite. Tsie rei ce, icü kenie sa vortuo.

¹³ Süsie teigeidielie sorouu puo tsüu khoushü, ru a Ukepenuopfü mhodzüki keba suna ruosuobau kia diako nunu mhapfhe puo parkecü si,

¹⁴ süko ketsü pie ketha teigeidielie sorouu ki, “Eufrat rüu nu phapie ketha dieliemia diako phreishücie,” si.

¹⁵ Süla teigeidielie diako phreishüwata, teigeidielie süko bu themiako se-zapuo dukhriketuo teicieu, thekhrüu, mu teisozhau, mu bavüdo-u la dojüse tha.

¹⁶ Siro kier gei ketuo chüpahi mia lakh nyie kenie; a uko tsüphrü kide shicü sikeshü.

¹⁷ Mu a ziemho geinu kierko ngukecü hamhie: Süko gei ketuoko u merü gei terhühu meriepie mi tuoi, safirtuoi, mu mehe, kierko tsükoe losha tsü tuoi, siro mi mu mikhu tsiu mitsie uko me nunu par.

¹⁸ Hako geinu kepar thepe seko mi mu mikhu tsiu mitsie bu themia se-zapuo biekhriwa.

¹⁹ Kier kekuou uko me tsiu uko meiko gei baketa la; uko meikoe tinyhü tuoi mu puo tsü nyi, tsiu süko se themiako pechü.

²⁰ Siro themia keshako, thepe hako bu biekhriwa kemoko, u thuo chükelie mhathoko nunu u noukedilie mo morei terhuokesuoko mu suna tsiu rakachü mu mese siro ketsie tsiu sei pie kechü mirhi mha ngulie morei mhapfhe silie morei chatuolie kelhoko rüsuokecü nu u kekhalie mo.

²¹ Mu uko mia kedukhri morei kemeduo mhathoko morei pierüü kechü morei rügukecü nunu u noukedilie mo.