Pesikeshü 8 - Angami Naga CL (Re-edited) Bible (BSI)

Zasi Thenieu mu Suna Kethengukhou

¹ Siro Tekuonuou zasi thenieu phreikeshü ki, teigei bavüdo puotie mese kemekrie bata.

² Mu a teigeidieliemia thenie Ukepenuopfü mhodzünu ketha ngu, tsiu ketsü thenie pie uko tsüshü.

³ Sitse teigeidieliemia kekrei puo tuo par, mu puo suna pie kechü kethekhou puo pie di phir ruosuobau khieki thata, siro puo bu kemesako pete kecha sa kesalie di pie kedibau mhodzüki keba suna ruosuobau gei khashüketuo la mia kethengu khapie puo tsü phishü.

⁴ Siro teigeidielieu dzie nunu kethengu thekeshüu, kemesako kechako sa di khu Ukepenuopfü mhodzünu khota.

⁵ Süsie teigeidielieu kethekhouu pielie di ruosuobau geinu mi pie süu tshulie di kelhoupie kijü shüwa. Sitse teise, puo pfhe chü, teimela phriephriei mu kiükishü vorta.

Ketsü Thenieko

⁶ Süsie teigeidielie theniekoe ketsü thenieko khoushütuoü dojülie.

⁷ Teigeidielie kerieu puo tsüu khoushü, ru prü mu mi thezie sa kerei di rü kijü tsurta, sitse kijüu se-zapuo, mu seiboko se-zapuo thewa, siro nha kepejo pete thewa.

⁸ Teigeidielie kenieu puo tsüu khoushü, mu kijüthou kezha tu kemerie chü keba tuoikecü puo kelhoupie dzükezha nu shü.

⁹ Sitse dzükezha se-zapuo thezie chüta, tsiu dzükezha nu rhei ketuo khunuoko se-zapuo siata, mu rouko rei se-zapuo pekawa.

¹⁰ Teigeidielie seu puo tsüu khoushü, mu teigei nu themvü kezha puo mitu tuoi di rürie kerüko se-zapuo mu dzüluo dzüko nu tsuta.

¹¹ Themvü süu za “Tsiena.” Sitse dzüko se-zapuo tsiena chüta, mu themia kekra dzüu la siata, süu pfhüketa la.

¹² Teigeidielie diau puo tsüu khoushü ru niakiu se-zapuo mu khrüu se-zapuo, mu themvüko se-zapuo pekawa, sidi süko kezie se-zapuo zeita; sidi teisozha se-zapuo zie mota mu theva rei sükemhie chüta.

¹³ Süsie a meho sie ru tsüüra puo teimeluo nu pruo zo mha pu puo rhiechü di, “Teigeidielie kekrei seko u tsü khoushütuoüzhie mu kijü gei lhou ketuoko we, ce, ce, ce, chülietie!” isi.