Pesikeshü 7 - Angami Naga CL (Re-edited) Bible (BSI)

Israelmia Lakh Puo di Nyie Hiediaediako

¹ Süsie a teigeidieliemia dia kijü ke diako nu teikhrie bu kijü morei dzükezha morei seibo puorei hewa molieketuo la teikhrie diako khapfü ketha ngu.

² Sitse a teigeidieliemia kekrei puo rhei tuoyakezhau Ukepenuopfü zasi pie di niathutsa nu tuo parkezhü ngu, tsiu puo melie puo rhiechü di teigeidielie diako kijü mu dzükezha pekawalie kevi kekuo pie tsüwaketako kieshü,

³ sidi sie, “Hieko bu Ukepenuopfü kituoko teikhie gei zasi vülie kemochie, nieko kijüu morei dzükezhau morei seiboko pekawa hieluocie.”

⁴ Siro zasiu pie u teikhie gei vülieketako mia lakh puo di nyie hiediaedia üdi kepu a si, sidi Israelmia seyie pete nu zasiu vülie:

⁵ Juda yiemia zasi vükelie nyie kerekenie, Reuben yiemia nyie kerekenie, Gad yiemia nyie kerekenie.

⁶ Asher yiemia nyie kerekenie, Naftali yiemia nyie kerekenie, Manasseh yiemia nyie kerekenie,

⁷ Simeon yiemia nyie kerekenie, Levi yiemia nyie kerekenie, Isakar yiemia nyie kerekenie,

⁸ Zebulun yiemia nyie kerekenie, Josef yiemia nyie kerekenie, Benjamin yiemia zasi vükelieko nyie kerekenie.

Seyie Pete nu Kevor Krodiu

⁹ Hau sie a meho lashü ru miapuorei phrü hulie kelho krodi puo tuo, süko seyie pedekejüko nu, u seyie pete nu siro themiako tsiu die neiünei pete nu, siro u pfhenei kekra se phre tsiu u dzie nu kukuo co pie di kedibau mu Tekuonuou mhodzünu tha.

¹⁰ Siro uko melie u rhiechü di sie, “Kelakelie sü kediba gei keba Ukepenuopfü mu Tekuonuou vie zowe,” itha.

¹¹ Siro teigeidieliemia pete kedibau mu phichüko tsiu khunuo rhei ketuo diako houpfü tha, sidi ukoe kedibau mhodzünu zerepfü di Ukepenuopfü rüsuo,

¹² Sidi tsali chücü, “Amen! Theja mu zayie tsiu mhasi mu thetshe siro therhu, mu kekuo, niepu kechü kechachie Ukepenuopfü vie, Amen.”

¹³ Süsie phichüko mia puoe sie a ki, “Pfhenei kekra seketuo hako suomia ga? Mu uko kirapuo nu vor ga?”

¹⁴ Sitse a puo ki, “Kepethau, hau sikecü sü no zo.” Sitse puo a ki, “Hako mia bu u pechüpenyü phikewa nunu vorwe; uko u pfheneiko Tekuonuou zie nu menyi pekraliete.

¹⁵ “Mha hau la ukoe Ukepenuopfü kediba mhodzü thaya, sidi teizeiteiso puo rüsuoki nunu puo rüsuoya, mu kediba gei kebaue uko yalietuo.

¹⁶ Ukoe merü salie lho, mu terhü rei sa lho; niaki uko thelie lho, morei kele puorei uko the pechülie lho;

¹⁷ kekreilamonyü kedibau metsuo nu keba Tekuonuou bu uko kepfheu chütatuo, mu puo uko cha tha ze kerhei dzüluoko nu votuo, Ukepenuopfü thuo uko mhi nunu uko mhidzü sü phrewatuo.”