Pesikeshü 6 - Angami Naga CL (Re-edited) Bible (BSI)

Zasi Thenieko

¹ Süsie a ngukecü Tekuonuoue zasi thenieko puo phreishü, sitse khunuo rhei ketuo diako puoe puo pfhe teikese tuoi, “Vorlie” icü kepu si.

² A meho sie, ru kier kekra puo ngu! Sügei ketuou theü puo pie; tsüre puo pie puo tsüwa, mu puo mia penyü mu kuolietuo üdi parta.

³ Siro puo zasi kenieu phreikeshü ki, khunuo rhei ketuo kenieu sie, “Vorlie,” idi kepu a si.

⁴ Siro sünu kier merieyharacü puo par, sügei ketuou bu kijü gei kezekeviu chü setanushü, sitse themiako huoniehuo dukhrituo; tsiu zhiecha kezha puo pie puo tsü.

⁵ Siro puo zasi seu phreikeshü ki, khunuo rhei ketuo seu sie, “Vorlie” idi kepu a si. Mu puo meho sie ru kier ketei puo par! Mu süu gei ketuou dzie nu roshükhouko pie tuo,

⁶ mu a khunuo rhei ketuo diako donunu mhapfhe kemhie puo sikecü, “Khunhie zhakra thoulha zharha puo, mu khunhie zhakra barli zharha setuo, derei oliv tier mu zu we pekawa hie,” si.

⁷ Siro puo zasi diau phreikeshü ki, khunuo rhei ketuo diau sie, “Vorlie!” idi kepu pfhe a si.

⁸ Sidi a meho sie ru kier menyiecü puo ngu! Ru süu gei ketuou za Kesia, siro Hades puo medzi tuo, sidi zhiecha, pekriekecü mu kechükenyü pie dukhrituoü, tsiu nha nu khunuoko se di kijüu dia-zapuo mho mha pekaketuo la kekuo pie unie tsüwa.

⁹ Siro puo zasi pengouu phreikeshü ki, Ukepenuopfü dieu mu zhapu dieko la mia bu u dukhriwaketa ruopfüko ruosuobau khro keba a ngu;

¹⁰ süko melie u rhiechü di, “Kekuotho Niepuu, mesa mu kethocüu, kichiepuo no kijü nu kelhouko gei u nyiekecü mu hieko zie khepu lie mo ba zotuo ga?”

¹¹ Süsie pfhe kekra pie uko tsü phreshü sidi uko kituo kechü, mu uko kezeko, uko mhie di dukhriketuoko tseilie kemochie rülei za balienu di uko ki puwa.

¹² Süsie puo zasi sorouu phreikeshü ki kiükishü kemerie chüta, mu niaki gakhropfhe tuoi teimekie tsiu khrüluou thezie tuoita,

¹³ tsiu khriedi bu vor teisei chiedesi me kemoko heriekewa tuoi teigei themvüko rürie kijü tsuta.

¹⁴ Siro leshütshü tshükeshü tuoi tei rei ngu mota, mu kijüthouko tsiu kijü rüchütsokemoko pete u tha nunu rüdi phreta.

¹⁵ Sitse kijü nu kediko tsiu mia kekhayakezhako, siro chüpahi mhokezhako mu kenyiko tsiu kekuoko, mu kehoupuorei, kediemia tsiu kemoko pete vo keciekiko mu kijüthouko gei tsiekhieko donu rüshüta,

¹⁶ sidi kijüthouko mu tsiekrieko kie di, “Metsur hie vupfüliecie sidi kediba gei kebau mhingu nunu mu Tekuonuou noupfhü nunu hie kevieshücie;

¹⁷ kekreilamonyü sünie noupfhü kere teisozhau vorte, mu supuonie süu hielie vi ta?” ita.