Pesikeshü 5 - Angami Naga CL (Re-edited) Bible (BSI)

Leshütshüu mu Tekuonuou

¹ Süsie a kediba gei kebau dzie puo zatsanu zasi thenie pie vükecü, mu lutsahatsa nu thukecü, leshütshü puo pie keba ngu.

² Sitse a ngukecü teigeidieliemia kuo secü puo shie puo rhiechü di sie, “Supuonie leshütshüu lha le di zasiko biewalie kesü ba ga?” isi.

³ Tsiu teigei rei morei kijüu gei morei kijüu khro ketuo miapuorei leshütshüu hielie morei meholie kesü jüta.

⁴ Süki a kra phita, leshütshü süu hieshüketuo morei meholie kesü miapuorei ngulie moketa la.

⁵ Sitse phichüko mia puoe a ki, “Kra hiecie. Harie, Juda yiemia Loshau mu David Mieu, kuoliete, süla puo leshütshüu mu süu zasi thenieko hielie vite,” sita.

⁶ Süsie a kedibau siro khunuo kerhei diako donu mu phichüko donu Tekuonuo dukhrikewa tuoikecü puo ketha ngu, puo kia thenie mu puo mhi thenie, sükosü ketsepie kijü pete nu keshü Ukepenuopfü ruopfü thenieko.

⁷ Puo tuo phi kediba gei kebau dzie thezatsa nu leshütshüu pielie.

⁸ Puoe leshütshüu piekelie ki, khunuo kerhei diako mu phichümia mepfüediako Tekuonuou mhodzü zerepfü zhüta, uko dzie nu harp mu suna khou kethengu thepie tshucü se phre, sükoe kemesako kecha chükeshüko.

⁹ Sidi uko tsali kesa puo chü: “No leshütshüu pielie sü, mu süu zasiko lhalie sücü zo, n dukhriwa mu n zie pie Ukepenuopfü la thinuo nunu mu die tsiu themia mu seyie pete nunu mia rhaliete;

¹⁰ No uko chüpie kedirüvie puo mu Kepenuopfü lie kechü zievomia chüshüte, sidi uko bu kijüu gei di tuo.”

¹¹ Süsie a meho lashü ru kedibau mu khunuo kerheiko tsiu phichüko houpfü ketha, teigeidieliemia kekra pfhe sishü, süko nyie kercü nyie ker mu nyiecü nyie ba.

¹² Tsiu tsali chü u rhiechü di, “Dukhrikewa tekuonuou kekuo, mu kinyi siro mhasi mu kekuokeyho, tsiu therhu mu zayie, tsiu thetshe ngulie kesüuwe.”

¹³ Süsie a sikecü khunuo neiüko teigei rei, kijü rei, kijü khro rei siro dzü nu ketuoko rei, mu süko nu ketuo pete rei keli di, “Kediba gei kebau mu Tekuonuou bu, telhekechachie thetshe tsiu therhu, zayie mu kekuou chüliecie!”

¹⁴ Sitse khunuo kerhei diako sie, “Amen,” isi. Mu pehüko zerepfü zhülie di rüsuota.