Pesikeshü 4 - Angami Naga CL (Re-edited) Bible (BSI)

Teigei Kerüsuo

¹ Hau sie a ngu lakecü teigei kikha puo khrüpie tha! Mu mhapfhe kerieu, ketsü pfhe tuoi di a rüchücü si, sidi sie, “Haki khorliecie, sitse a hau sie kedipuo chütuo shicü pie n pekietuo.”

² Sitse vapuonu a Ruopfüu ze thata, mu teigei kediba puo ba, tsiu kediba gei mia puo ba!

³ Siro sügei kebau ngupie jasper mu karnelia tsie kemhie, mu emerald tsiepfü mhiecü pfhesei japie kedibau houpfü ba.

⁴ Siro kediba süu kediba mepfüedia bu houpfü ba, siro kediba süko geinu phichümia mepfüedia, u pfhenei kekra se mu uko tsü gei suna keditsüre pfü di ba.

⁵ Kediba süu geinu teikemela pfhe mu teikese pfheko par. Siro kediba süu mhodzünu mitu thenie tu ba, süko Ukepenuopfü ruopfü thenieko;

⁶ mu kedibau mhodzünu kristalpfü kemhie khrüva dzükezha tuoicü puo zhü. Siro kedibau metsuo nu mu puo tseiko nu puo mhodzütsa mu puo sietsa u mhi thuo tshukecü khunuo kerhei dia ba.

⁷ Kerieu ngupie losha tuoi, kenieu ngupie thudo tuoi, seu ngupie themia zie tuoi mu diau ngupie tsüüra pruo ketuo tuoi zo.

⁸ Siro khunuo kerhei diako gei puoe u shü sorourou nyi, tsiu süko u mhi thuo puo noutsa mu puo mhotsa tshupfü. Teizeiteiso süko te mo keli di, “Kemesa, kemesa, kemesa, Niepuu Ukepenuopfü Kuokejokejüu, thiedzü rei tsiedo rei mu thiesie vorketuou,” ibaya.

⁹ Siro khunuo kerheiko zapuzayie, therhu mu kethezie khapie kedibau gei keba telhekechachie rheituoyakezhau tsükeshü ki,

¹⁰ phichümia mepfüediako tsu kedibau gei keba telhekechachie rheituoyakezhau rüsuo. Sidi uko tsüreko lhoupie kedibau mhodzünu shü mu chieli di sie,

¹¹ “Hie Niepuu mu hie Kepenuopfü, no sü zayie mu therhu tsiu kekuo lielie kesüu zo, no mha peteko chüshücü la, tsiu n medo la süko tuo mu chükelie zokecü la.”