Pesikeshü 3 - Angami Naga CL (Re-edited) Bible (BSI)

Thupie Sardis Kehou ki Keshü

¹ “Thupie Sardis nu kehou teigeidielieu ki keshü: Hako Ukepenuopfü ruopfü thenieko mu themvü thenie kebau kinu kevor dieko: “A n mhathoko si; noe rhei keba zau se ba, derei no siate.

² Colie, sidi no n gei keba, siata nyünuo kebau chü kemeteiliecie, n mhathoko Kepenuopfü mhodzü vi tseikecü a ngulie kemo la.

³ Süla no silieketau mu ngulieketau rükraliecie; di süu chüüzelie, tsiu thenou kedilie. No colie moliro, a kerügumia mhie n ki vortuo, siro no a n ki vorketuo teiu silie lho.

⁴ Sirei nie tsie rei Sardis nu themia huoyo u pfheneiko perhuwa kemo baluo; sükoe pfhenei kekra se di a ze tuotuo, ukoe silie kesümiacü la.

⁵ Nie kuolie üro, nie rei süko tuoi di pfhenei kekra setuo, mu kerhei leshüdau nu nie za vawa lho; sidi a a Puou mu puo dielieko mhodzünu nie za phratuo.

⁶ Kehoupuorei u nyie kenyimia bu Ruopfüe kehouko ki kepuu rünyüliecie.

Thupie Filadelfia Kehou ki Keshü

⁷ “Thupie Filadelfia nu kehou teigeidielieu ki keshü: Hako kemesau, ketho-u, David cabi sekezhau, puo khrüshü ro miapuorei khalie kelho-u, khawa ro miapuorei khrülie kelho-u kinu kevor dieko.

⁸ “A n mhathoko si. Harie, a miapuorei khawalie kelho kikha khrüpie ketha puo khapie n mhodzünu shüshü ho. A n kekuo keduo yopuo keba si, mu si shierei no a dieu se ba tsiu a za phra mvüta molie.

⁹ A Satan sinagog nu u thuo u ü Judamia üya, derei mo, tijüyakezha zo, a uko bu vor n phi ki khoutou tsutuo, sitse ukoe a n khrieyakecü silietuo.

¹⁰ No kegepfü baliekezha a dieu se bakelie la, kijü nu kelhouko dojüketuo la kemezhiekecü kijü pete nu kevor teiu nu a n se balietuo.

¹¹ A mhai vorzhie; no mha baketau thezetsa zolie, sitse miapuorei n keditsüreu sesetalie lho.

¹² No kuolie liro, a n bu a Kepenuopfü rüsuokiu nu co puo chütuo, sidi n bu mhakipuorei süu tsetalie lho. Sidi a n geinu a Kepenuopfü zau mu a Kepenuopfü nadiu za Jerusalem kesau teigei nu a Kepenuopfü kinu tsurketuou za thushütuo, tsiu a za kesau rei thushütuo.

¹³ Kehoupuorei u nyie kenyimia bu Ruopfüe kehouko ki kepuu rünyüliecie.

Thupie Laodikia Kehou ki Keshü

¹⁴ “Thupie Laodikia nu kehou teigeidielieu ki keshü: Amen-u, dietho mu ketho zhapuu, Ukepenuopfü mhachükeshü bo-u kinu kevor dieko:

¹⁵ “A n mhathoko si; no meku rei mo, le rei mo. No meku morei lecü we a neituomu ru.

¹⁶ Süla no meku morei le rei mo, di lewicü la, a a me nunu n melouwatuo übate.

¹⁷ Kekreilamonyü no sie, ‘A mhanyi, a kruoliete, mu a mhapuorei se sa morei vi’ siya. Sidi no tseütsa, ngukemezhie chü, jütsopfhü, u mhicie mu methuo zeciü siya mo.

¹⁸ Mhanyilieketuo la a n bu a kinu mi pie the kemesakewa suna, siro n kemethuo kemenga whelieketuo pfhe kekra; mu mha ngulieketuo la n mhi keva daru khrülienu tarhoshüya.

¹⁹ A kehoupuorei khrieyakezha khe kerhie mu pechü di pethaya. Süla thethochü di thenou kediliecie.

²⁰ Harie! A kikha ki tha di kikha ketou thaya; kehoupuorei a pfhe si di kikha khrüshü ro a puo ki le di puo ze hietuo mu puo rei a ze hietuo.

²¹ Kuolieyakezhamia, a kuolie di a Puou kediba gei puo ze baketa tuoi a sümia bu a ze a kediba gei balietuo.

²² Kehoupuorei u nyie kenyimia bu Ruopfüe kehouko ki kepuu rünyüliecie.”