Pesikeshü 22 - Angami Naga CL (Re-edited) Bible (BSI)

Kerhei Rüu

¹ Süsie teigeidielieu kerhei rüu tha a kie, mevapie kristal mhie, Ukepenuopfü mu Tekuonuou kedibau nunu kru par,

² sidi kruse nadiu chaü metsuo nu tsu. Siro kerüu khie lutsahatsa kerheiprü bo ba, mu süu thekhrümetsei puo si vü di teicie puo nu va kerekenie vüya; tsiu süu nyüko se seyie neiüko chü keshürhoya.

³ Sünu rüse puorei ba salie lho. Derei Ukepenuopfü mu Tekuonuou kediba sünu batuo, mu puo kituoko puo rüsuotuo:

⁴ Uko puo zie ngutuo, mu uko teikhie gei puo za tuotuo,

⁵ tsiu sünu teizei ba salie lho; uko mitubou morei niaki se morei vi, Niepuu Ukepenuopfü thuo uko kezie chütuo, tsiu uko telhekechachie dituo.

⁶ Sitse puo a ki, “Die hako ketho mu pelelie sü, kekreilamonyü siedzekesiko ruopfüko Niepuu Ukepenuopfüe mhachü mhataketuoko se puo kituoko pengushütuoü puo dielieu ketseshü.”

⁷ “Harie, a mhai vorzhie! Kehoupuorei leshüda hau nu siedzedie thupie ketuoko chüüzeyakezhamia thejakepfütho.”

Thela Die mu Jakeshü

⁸ A, Johan mha hako si mu nguwe. Siro a mha hako si mu ngucü ki, ae mha hako pie a pengukeshü teigeidielieu phi nu puo rüsuotuoü zeretsu,

⁹ derei puo a ki, “No ci hie! A rei n ze n zenuoko siedzekesiko ze, mu leshüda hau nu dieko chüüzeyakezha mia kituo kechümia puo zowe. Ukepenuopfü rüsuolie!” si.

¹⁰ Mu puo a ki, “Leshüda hau nu siedzedieko zasi vüwa hie, puotei penuoteiketa la.

¹¹ Mha kesuo chüyakecümia bu kesuo chü ba zolie, tsiu rhukecümia bu rhu ba zolie, mu miathomia bu miatho ba zolie, tsiu kemesamia bu mesa ba zolie.”

¹² “Harie, A mhai vorzhie; kehoupuorei puo mhatho kheki sü chüpie tsüketuo la a zhakhra se tuo.

¹³ Ae Alfa mu Omega, therieu mu thelau.”

¹⁴ Kehoupuorei u pfhenei menyiwa di kerheiprü bo-u nu volie kesümia mu kharuko ze di nadiu nu lelie kesümia thejakepfütho.

¹⁵ Derei tefüko mu themouko siro pierüüko mu mia kedukhriko tsiu terhuorhi kerüsuoko, siro tijükecü mhatho chü u neikezha khe chazoutsa batuo.

¹⁶ “A, Jisu, kehouko la zhapu die hau a dielieu bu ketsepie nieko ki shü. A David mieu mu puo yieu, ziekruoikezha khisemvüu zo.”

¹⁷ Sitse Ruopfüu mu yasapfüe, “Vorliecie,” isi. Siro kehoupuorei rünyükeliemia, “Vorlie,” sicie. Tsiu kehoupuorei keterhüu vorliecie. Kehoupuorei kerheidzüu mengukezhamia methuo di lieliecie.

¹⁸ A kehoupuorei leshüda hau nu siedzedieko kesiu bu menuolienuya: Kehoupuorei mha huo pie süko pe ro, Ukepenuopfü rei leshüda hanu thupie keba thepeko pie puo petuo;

¹⁹ kehoupuorei leshüda hau nu siedzedieko vawa ro, Ukepenuopfü rei leshüda hanu thupie ketuo nadi kemesau mu kerheiprü bo-u geinu puo ya pejüwatuo.

²⁰ Mha hako zhapu chükeshüue puya, “Ketho zo, A mhai vorzhie,” Amen. Vorliecie, Niepu Jisu!

²¹ Niepuu Jisu ngukemezhieu bu kemesako pete ze baliecie. Amen.