Pesikeshü 21 - Angami Naga CL (Re-edited) Bible (BSI)

Tei Kesa mu Kijü Kesa

¹ Süsie a tei kesa puo tsiu kijü kesa puo ngu; tei kerieu mu kijü kerieu jüte ru, mu dzükezhau rei ba sa mote.

² Sitse a nadi kemesau Jerusalem kesau, yasapfü puo ketsopfü di puo nupfuu ki kevo tuoi, teigei Ukepenuopfü ki nunu kerkezhü ngu.

³ Sitse ae kedibau geinu mhapfhe meyiemeluokecü puo sie, “Harie, Ukepenuopfü pruu themia donu bate. Puo uko Kepenuopfü chü di uko ze lhoutuo; uko puo themia chütuo, mu Ukepenuopfü thuo uko ze batuo;

⁴ puo uko mhi nunu mhidzü pete süwatuo. Kesia ba sa motatuo; thekrü mu kekra tsiu kemezhiekecü ba sa motatuo, mha kerieko jüketa la,” idi pucü si.

⁵ Sitse kediba gei kebau sie, “Harie, a mha pete chü kesawazhie,” si. Süsie rei puo sie, “Hau thuliecie, hako ketho mu pelelie kesü die zokecü la,” si.

⁶ Süsie puo a ki, “Süu chüwate! Ae Alfa mu Omega, Therieu mu Thelau. Kehoupuorei keterhüu, puoma chü mo di kerhei dzüluou nunu krielieketuo a methuo khashütuo.

⁷ Kehoupuorei kuolieyakezhamia mha hako welietuo, mu a uko Kepenuopfü chütuo tsiu uko a nuonuo chütuo.

⁸ Derei u melou kesuoko, kepele kejüko, rhuketako, mia kedukhriko, pierüüko, themouyakecüko, terhuorhi kerüsuoko, tsiu tijüyakezha pete lawe mi mu mitsie tu sei bayakezha mizieu zo, süusü kesia kenieu” isi.

Jerusalem Kesau

⁹ Siro teigeidielie thenieko mhakhou thenie nu thepe thela thenieko pie tshupfü di pie kethako mia puo a ki phir di sie, “Vorlie, a yasapfü, Tekuonuou kimiapfü thashü n kietuo,” si.

¹⁰ Süki puo Ruopfüu nunu a ze kijüthou kezha kerükrie phi puo gei vota, sidi teigei Ukepenuopfü ki nu tsurkezhü Jerusalem nadi kemesau thapie a kie.

¹¹ Süu Ukepenuopfü zayieu thuo ziekruoipfü, mu puo kezie ketsie puoma kere, jasperpfü tuoi, mesapie kristal khrüvapfü tuoi zo.

¹² Puo dahou zha mu rükrie, siro puo kharu kerekenie tsiu kharu kerekenieko khieki teigeidielie kerekenie ba phre, mu kharuko gei Israel seyie kerekenieko za thupie zha;

¹³ niathutsa kharu se, pesotsa kharu se, pekhrotsa kharu se, mu niakratsa kharu se.

¹⁴ Siro nadiu dahou puo mvüdze kerekenie mu süko gei Tekuonuou apostel kerekenieko za ba.

¹⁵ A ze kerüchü ketha teigeidielieue nadiu, puo kharuko mu dahouko mejüketuo la suna pie kechü kemejü the puo pie tuo.

¹⁶ Siro nadiu ke diako ketou phre, puocha rei puozha rei ketou; mu puoe puo theu pie nadiu mejükesie maildo krie kerepengou; puocha puozha tsiu puo rükrie ketou phre.

¹⁷ Siro puo süu dahouu rei mejü sie ru süu thu krie puo di hiediaedia, teigeidielieu se mejükecüu rei themia se mejüyakecüu mhie zo.

¹⁸ Puo dahouu jasper tsiepfü pie chü, mu nadiu suna kemesatho se chü, mesapie khrüva tuoi.

¹⁹ Nadiu dahou mvüdzeko ketsie puoma kere neiüpfü se ketso; mvüdze kerieu jasper tsiepfü, kenieu safir, seu agat, diau emerald,

²⁰ pengouu onis, sorouu carnelian, thenieu krisolite, thethau beril, thepfüu topaz, ker-u krisoprase, kerepuokrüu jasint, kerekenieu amethist.

²¹ Tsiu kharu kerekeniekoe mukut tsiepfü kerekenie, kharu puo mu mukut tsie puopuo, tsiu nadi chaüu suna kemesatho se chü, mha ngu khrokecü khrüva tuoi zo.

²² A nadi nu rüsuoki puorei ngu mo, kekreilamonyü süu rüsuokiu sü Niepuu Ukepenuopfü Kuokejokejüu mu Tekuonuou zo.

²³ Mu nadiu va pezieketuo la niaki morei khrü se morei vi, Ukepenuopfü kesokezie zayieu thuo süu va pezieshüya, mu Tekuonuou sü süu mituu zocü la.

²⁴ Kijü nu seyieko puo kezie süu nu tuotuo, tsiu kijü nu kedimiako u zayie se sünu vortuo.

²⁵ Puo kharuko khinhie khawalie lho, mu sünu teizei jü.

²⁶ Siro mia bu seyieko therhu mu zayie se sünu vortuo.

²⁷ Derei mha mesa kemo puorei sünu lelie lho, morei kerütsekecü tho kechüko tsiu tijükecümia rei sünu lelie lho, derei Tekuonuou kerheiprü leshüdau nu u za thupie zhüketako rübei zotuo.