Pesikeshü 20 - Angami Naga CL (Re-edited) Bible (BSI)

Teicie Nyie Puo

¹ Süsie a teigeidieliemia puoe puo dzie nu thekhe kesoutho cabiu mu thegiro kemesi puo se di teigei nu kerkezhü ngu.

² Sidi puo tinyhüu, thiedzütho tinyhüu, süu Terhuokesuou mu Satan-u telie di teicie nyie puo puo phapie bawata,

³ sidi puo kelhoupie thekhe kesoutho nu shüwa, siro teicie nyie puo tseita kemochie puo bu seyieko se sa molieketuo la süu khawa mu zasi rei vüwa. Hasie puotei keduo yopuo la puo phrei lashütuo.

⁴ Süsie a kediba kro puo ngu ru süko gei kebako bu mia nyie pepiketuo la kekuo pie tsüwa. Siro Jisu zhapuu mu Ukepenuopfü dieu la mia bu u tsü ziekewa ruopfüko rei a ngu. Sükoe nhachüu morei süu miarhi rüsuo mo tsiu süu zasi rei u teikhie gei mu u dzie nu vü mo. Süko rhei lalie di Khrista ze teicie nyie puo kedi chü.

⁵ (Kesiamia keshako teicie nyie puo tseita kemochie rhei lalie mo.) Hauha rheilakesie therieu.

⁶ Kehoupuorei rheilakesie therieu nu u ya kenyimia mesa mu thejakepfütho. Kesia kenieu süko mho puo kekuo jüte, süko bu Ukepenuopfü mu Khrista zievoko chü di teicie nyie puo puo ze dituo.

Satan Penyükewa

⁷ Siro teicie nyie puo tseita tse, puo kedie kechüu nunu Satan phrei lashütuo

⁸ mu puo kijü ke diako nu cüreketuo seyie neiüko selietuoü tuo pratuo, süu Gog mu Magog zo, tsiu terhükegeiketuo la süko pfhü kengulietuo; mu süko krapie dzükezha khie huocanyo tuoi.

⁹ Siro ukoe kijüu pfüthe vo kemesako razhüchüu mu nadi u keneitho-u houpfülie. Sitse teigei nu mi tetsur di süko peka phrewa.

¹⁰ Mu terhuokesuou, uko sewaketau kelhoupie mizie mu mitsie nu shüwa, sünu nhachüu mu ketijü siedzekesiu rei ba, sünu teizeiteiso telhekechachie uko pechütuo.

Dienya Thelau

¹¹ Süsie a kediba kekra kezha puo siro sügei mia puo keba ngu, kijüu tsiu teiu puo mhinguki nu tata, mu unie la thechü ngu salie mota.

¹² Sitse a kesiamia kecü rei kezha rei kedibau mhodzü thacü ngu, süsie leshüdako lhalie. Mu leshüda kekrei puorei lhalie, süu kerheiprü leshüdau. Siro kesiamiako mhatho leshüdako nu thupie kezhüu medzi di uko nyie kecü.

¹³ Siro dzükezhau kesiamia puo nu ketuoko khashü, tsiu Kesia mu Hades rei unie nu ketuo kesiamiako khashü, sidi themia pedekejüko u mhatho kheki sü chü u dienya kecü.

¹⁴ Süsie Kesia mu Hades kelhoupie mizie nu shüwa. Mizie, hauha kesia kenieu;

¹⁵ tsiu kehoupuorei u za thupie kerheiprü leshüda nu zhü kemoko kelhoupie mizieu nu shüwa.